Ko-Dabirɛnu 4
4
Ken anubɛ Ebɛli Wara-Koe
1Nba, Hadama ya ala musi Hawa latenbi a kɔma. A ya buyi bi ka den-kei sɔrɔn. Hawa ko, “N bara den-kei sɔrɔn Marita dɛnbɛnɛ fɛ.” A ya dan wo tɔgɔ sa Ken bawo tɔgɛ wo kɔrɛ le iko mɔgɔ wa a fɔ ko, “N bara fen sɔrɔn.” 2Wo kɔma, a ya Ken wo tagbara-sɛ sɔrɔn. A ya den-kei wo fanan tɔgɔ sa Ebɛli. Saga-fɛ-biralɛ le wo la kɔnɔ Ken, sɛni-salɛ le wo la.
3Lunyɛ do, Ken nara fan do la ka bɔ ala sɛnɛ rɔ ka a ma Mari kɔ-fan la. 4#Hiburunu 11.4 Ebɛli fanan nara ata saga-den-fɔlɔ-hakikɛ do la. Mari sɔnta Ebɛli anubɛ ala kɔ-fan la 5kɔnɔ a ma sɔn Ken anubɛ ala kɔ-fan la. Woletɔ Ken diminyara bɛrɛkɛ! A ya a yakɔrɛ sisi yisi-bɔɛ bolo. 6Mari ya a fɔ ale Ken ye ko, “I diminyanɛ nfen na? Nfenna i wara i yakɔrɛ sisi? 7Ni i ya ko-nyimɛ le ma nun, n si n ban ila kɔ-fan la nun, wa? Kɔnɔ bawo i wara ko-yogomɛ ma min kɛ, hakɛ ye i manɛgɛnna. A sɔgɛ ye hakɛ la, a ni i bira kɔnɔ ile kana sɔn, a ni i nɔ.”
8 #
Matiyu 23.35; Luka 11.51; 1 Yɔni 3.12 Wo kɔma, Ken ya a fɔ a dɔgɛ ye ko, “Ma ta binyɛ rɔ.” Anu tara binyɛ rɔ. Anu bi nyɔ tumɛ min, Ken kɛra a dɔgɛ Ebɛli ma ka a faga.
9Mari ya Ken manyinika ko, “I dɔgɛ Ebɛli ye mintɔ?”
Ken ko, “Nde ye wo kalama? Ile ya n lɔn n dɔgɔ-makandannɛ le la, wa?”
10 #
Hiburunu 12.24
Wo kɔma, Mari ko, “I wara nfen ma kɛ la? I tole masɔ! I dɔgɛ yele ye dila n dala ka bɔ dugi rɔ a tayili-sara-koe la. 11Ile min bara i dɔgɛ faga, i si dankɛ sɔrɔn ka tenbi dugi wo la min bara a dɛ laka ka i dɔgɛ yele lakunu i bolo, ado i ti tɔnɔ sɔrɔn dugi rɔ tun. 12Ni i ya i tui ka dugi wɔli, i ti fen sɔrɔn a rɔ muk! I si ma yilan-yilantoe la dugu-kole kuma.”
13Wo kɔma, Ken ya a fɔ Mari ye ko, “Nna tɔrɔyɛ kɛ da rakolo n kuma. N ti a nɔ. 14Bawo i wara i yakɔrɛ firindi n ma min kɛ ka n gben nna sɛnɛ kuma, ka a dabira bi ma fɔ n ba ma yilan-yilantoe la, ado ni mɔgɔ-wo-mɔgɔ ya n yen, wo si n faga.”
15Mari ya lanyiri kiri Ken ye, a ko, “Ni mɔgɔ-wo-mɔgɔ ya ile faga, n si i tayili sara wo la iko wɔrɔnfila.” Wo le ya a ma, Mari ya tamasere sa Ken ma alako mɔgɛ min ba tamasere wo yen Ken ma, wo kana a faga. 16Ken bɔra Mari fɛ ka ta Yilan-yilan Tinɛ#4.16 Yilan-yilan Tinɛ: Ni i ya a lamɔɛn “Nɔdi” Hiburu-kan rɔ, wo kɔrɛ le “Yilan-yilan Tinɛ.” Idɛn nakɔɛ tele-bɔɛ wara la.
Ken Bɔnsɔnnu Bara-Koe
17Ken ya ala musi latenbi a kɔma. Wo ya buyi bi ka Inɔki sɔrɔn. Ale Ken ya soe min datɛgɛ, a ya ala dan wo tɔgɛ sa soe wo kuma Inɔkiya. 18Inɔki wo ya Iradi sɔrɔn, Iradi wo ya Mehuyɛli sɔrɔn, Mehuyɛli wo ya Metusayɛli sɔrɔn, Metusayɛli wo ya Lamɛki sɔrɔn.
19Lamɛki wo ya musu fila furu. Kelan tɔgɛ Eda. Doi tɔgɛ Sila. 20Eda ya Yebɛli sɔrɔn. Yebɛli wo bɔnsɔn denu siginɛ fani-bɔnnu na nun. Wonu mara kolo-fen-tiginu na. 21Yebɛli dɔgɔ-kei tɔgɛ le Yubɛli. Bɔlon-fɔlɛnu anubɛ fuli-fɛlɛnu benba le wo la. 22Lamɛkila musi Sila ya Tubali-Ken sɔrɔn. Siyakinu anubɛ nunakɛnu benba le wo la. Tubali-Ken wo tirisan-musi le Nama la.
23Lamɛki ya ala musi Eda anubɛ Sila rakele ka a fɔ anu ye ko, “Wo ni wo tole masɔ.
Keminɛ min ya n tanban, n bara wo faga.
24 #
Matiyu 18.22
Ni niyi wɔrɔnfila bɔra n benba Ken niyila ko la,
ni anu ya nde, Lamɛki faga,
niyi bi-wɔrɔnfila ani niyi wɔrɔnfila si bɔ nde niyila ko la.”
Sɛti anubɛ Inɔsi Wara-Koe
25Hadama anubɛ ala musi ya den-kei do sɔrɔn tun. Ala musi ya wo tɔgɔ sa Sɛti bawo tɔgɛ wo kɔrɛ le iko mɔgɔ wa a fɔ ko, “ka a di.” A ya a fɔ ko, “Alla ara den-kei do di n ma Ebɛli gbɛ rɔ tun, Ken ya min faga, kɔni.” 26Sɛti wo fanan ya den-kei sɔrɔn. A ya a tɔgɔ sa Inɔsi.
Mɔgɛnu ya Mari batoe dabira wati wo le tɔ.
Atualmente selecionado:
Ko-Dabirɛnu 4: KCLB
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
Kuranko Common Language Bible © The Bible Society in Sierra Leone, 2006.