TAUNET 1
1
Ng’olyot agobo yaetab ngony
1Eng’ taunet, ko kitoi Kamuktaindet koyai kipsengwetisiek ak ng’ony. 2Ak kima komi kiy ng’ony ak kima kotinyei iton; ak kimi mesundeito baragutab riret; kiwendoti Tamirmirietab kamuktaindet baragutab beek. 3Ak kimwa Kamuktaindet kole, Ingolapkeit; kolapkeit. 4Kigeer anyun Kamuktaindet lapkeiyet, kole mie: ak kiibesio Kamuktaindet lapkeiyet ak mesundeito. 5Kiguure Kamuktaindet lapkeiyet Bet, ak kiguure mesundeito Kemoi. Ak kiek koskoleny ak kiek karon, betut agenge.
6Kimwa Kamuktaindet kole, Ingobiit soet eng’ kwenutab beek, si kobesio beek chu ak beek chun. 7Ak kiyai Kamuktaindet soet, ak kiibesio beek che mi kureretab soet ak che mi baragutab soet; ak kiyaak ko u noto. 8Kiguure Kamuktaindet soet Kipsengwet. Ak kiek koskoleny ak kiek karon, betut ne bo aeng’.
9Ak kimwa Kamuktaindet kole, Ingoyumjigei beek yeto agenge che mi kureretab kipsengwetisiek, ak ingotook emet ne mami beek; ak kiyaak ko u noto. 10Ak kiguure Kamuktaindet emet ne mami beek Ng’ony; ak kiguure beek che kagoyumgei Nyanjosiek; ak kigeer anyun Kamuktaindet kole mie. 11Ak kimwa Kamuktaindet kole, Ingobityo suswek eng’ ng’ony - ketik alak tugul che mengechen che bo timin, che yiei keswek, ak ketik che bo logoek che yiei logoek ko u kergeindanywa che tinyei keswekwak eng’ orinywa eng’ ng’ony; ak kiyaak ko u noto. 12Kibityo anyun suswek eng’ ng’ony, ketik alak tugul che mengechen che bo timin che yiei keswek ko u kergeindanywa, ak ketik che yiei logoek, che tinyei keswekwak eng’ orinywa, ko u kergeindanywa, ak kigeer Kamuktaindet kole mie. 13Ak kiek koskoleny ak kiek karon, betut ne bo somok.
14Ak kimwa Kamuktaindet kole, Ingobiit tuguk che iluu eng’ soetab kipsengwetisiek si kobiit kobesio bet ak kemoi; si koek choto kaborunoik, che bo arawek, ak betusiek ak kenyisiek; 15ingoek choto che iluu eng’ soetab kipsengwetisiek si kobiit koluuchi ng’ony; ak kiyaak ko u noto. 16Kiyai Kamuktaindet tuguk che iluu aeng’ che eechen; si kobiit koboi ne o bet, ak koboi kemoi ne ming’in; kiyai kecheik agichek. 17Kiinde Kamuktaindet choto soetab kipsengwetisiek si kobiit koluuchi ng’ony, 18si koboi bet ak kemoi, kobesio lapkeiyet ak mesundeito; ak kigeer Kamuktaindet kole mie. 19Ak kiek koskoleny ak kiek karon, betut ne bo ang’wan.
20Ak kimwa Kamuktaindet kole, Ingochang’a koek ng’isiat tuguk che soptos eng’ beek, ingotirirenso taritik eng’ baragutab ng’ony eng’ soetab kipsengwetisiek. 21Ak kitoi Kamuktaindet koyai njirenik che eechen, ak kiy age tugul ne sobei, ne wendote beek, eng’ chang’indo, ko u kergeindanywa, ak tarit age tugul ne tinyei kebebaik ko u kergeindanyi; ak kigeer Kamuktaindet kole mie. 22Kiiberur Kamuktaindet ichek, kolenji, Oiiye, otesage, onyi beekab nyanjosiek, ak ingotesogis taritik eng’ ng’ony. 23Ak kiek koskoleny ak kiek karon, betut ne bo mut.
24Kimwa Kamuktaindet kole, Ingoii ng’ony tuguk che soptos ko u kergeindanywa, tuga, ak che ichuutegei, ak tiong’ik che bo ng’ony ko u kergeindanywa; ak kiyaak ko u noto. 25Ak kiyai Kamuktaindet tiong’ik che bo ng’ony ko u kergeindanywa, ak tuga ko u kergeindanywa; ak tuguk tugul che ichuutegei eng’ ng’ony ko u kergeindanywa; ak kigeer Kamuktaindet kole mie. 26Kimwa Kamuktaindet kole, Ongeyai chito eng’ itondanyo, ko u kergeindanyo: ak ingoboi ichek njirenik che mi nyanjosiek, ak taritik che bo barak, ak tuga, ak ng’ony komugul, ak tiong’ik tugul che ichuutegei ng’ony. 27Kitoi anyun Kamuktaindet koyai chito eng’ itondanyi, kitoi koyai chito eng’ itondab Kamuktaindet; kitoi koyai muren ak tie. 28Ak kiiberur Kamuktaindet ichek; ak kilenji Kamuktaindet ichek, Oiiye, otesage, si onyi ng’ony; ak obou; ak olaitorane njirenik che bo nyanjosiek, ak taritik che bo barak, ak kiy age tugul ne sobei ne wendote ng’ony. 29Ak kimwa Kamuktaindet kole, Ogeero, kaagonok ketik alak tugul che mengechen che bo timin che tinyei keswek che mi baragutab ng’ony, ak ket age tugul ne tinyei logoekyik keswek, koek amitwogikwok. 30Kaagochi anyun ketik alak tugul che mengechen che nyalilen koek amitwogikab tiony age tugul ne bo ng’ony; ak tarit age tugul ne bo barak, ak kiy age tugul ne ichuutegei ng’ony ne tinyei kabusetab sobondo; ak kiyaak ko u noto. 31Ak kigeer Kamuktaindet tuguk tugul che kiga koyai kole miachen mising’. Ak kiek koskoleny ak kiek karon, betut ne bo lo.
Atualmente selecionado:
TAUNET 1: BUKUIT
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
God's word open for all
©Bible Society of Kenya, 2020