Toango 7
7
Mpela eoya ndʼokili
1Nkako Yawe aokela Noa, “Otswaka, we lʼilongo ike iuma nda basua, elʼemi njokena we weji nda joso likami ndʼeotswelo ene. 2Tomba la we nsambo nsambo ya wengi nyama ya feto, baende nsambo ko la bamato nsambo; ko bafafe ba nyama ifa feto, wae jende lʼomoto okae. 3Ko lima tofulu tʼaliko nsambo nsambo, wengi jende lʼomoto okae; wae bafongʼoata bana baike ndʼokili bouma. 4Ele bembile beciki nko nsambo, mpanga njweya mbula ndʼokili lʼembile ntuku inei lʼetso ntuku inei, mpanga mpofya limʼokili wengi oyoike okiʼmʼemaka.” 5Ko Noa akelaki baoyiʼauma baki Nzakomba otomakʼende lotomo.
6Noa aokita mbula benkamʼotoa aki mpela oyaka ndʼokili. 7Ko Noa aolotswa ndʼasua, ende lʼanaʼakande bʼaende, la waji okae, la baaji ba bana bakae, wae balote basi ba mpela. 8Nyama ya feto, la nyama ifa feto, ko la tofulu, ko la wengi nyama la towawa bandakula ndʼamoci, 9baolotswa la Noa ndʼasua bafʼafe, jende lʼomoto, ngoki Nzakomba otomaka Noa. 10Ko aki bembile nsambo olekaka, basi ba mpela baoliela ndʼokili. 11Aki Noa okitaka mbula benkama botoa, nda nsanza eʼife, nda mbile ea jom la nsambo, o nda mbile eko, bikuke biuma bia bitoko biʼofoku wa njindo biolatsa, ko ba-fenêtre ba loola baokombwa. 12Ko mbula eojwa ndʼokili bembile ntukʼinei la betso ntuku inei. 13Nda mbilʼeko Noa aolotswa ndʼasua la Seme, la Ama, la Yefete, bana ba Noa, ko la waji okande la baaji ba bana bakande. 14Iyo la wengi bilenge bia nyama, la nyama ya mbongola iuma la bilenge bikiyo, ko la wengi nyama la towawa bandakula ndʼamoci la bilenge bikiyo, ko la wengi tofulu touma ta bilenge la bilenge; 15baolotswa la Noa ndʼasua, bafʼafe, lima wunyu bouma, wae wengi oyoike oki la loe ja loiko. 16Iyʼandotswaki baki jende lʼomoto lima bayoike bauma, ngoki Nzakomba okaakʼende lotomo; ko Yawe aolakomba ndʼetei.
17Mpela eki ndʼokili bembile ntuku inei; ko basi baofula ko baotefya basua, ko bako baosangwa limʼokili. 18Ko basi baokaka ko baofula la ndekola ndʼokili; ko basua baotefa ndʼasi. 19Ko basi baokaka o nkakaka ndʼokili; ko ngongo iuma ya ntale ile ndʼase ba loola yokukama. 20Basi bayounde coudées jom lʼitano ndʼaliko ba ngongo, ko ngongo yokukama. 21Ko bauma baikaki ndʼokili bawaki, la tofulu, la nyama ya mbongola, la nyama yʼokonda, la wengi nyama la towawa bandakula ndʼokili, ko la wengi bonto. 22Bayoike bauma, wete bako baki la loe ja loiko, ko baki ndʼokili wa kotukotu bawaki. 23Baikaki ndʼokili bauma baofofa, wae banto, la nyama ya mbongola, la nyama la towawa bandakula, la tofulu tʼaliko, baofofa limʼokili. Noa akociki, nkʼende lʼiyʼaki lʼende nda basua kika. 24Ko basi baokongʼosangwa ndʼokili bembile bonkama la ntuku itano.
Atualmente selecionado:
Toango 7: LOL87
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
La Bible en Lomongo © Societe Biblique de la R.D. Congo 1987