Kub 48
48
Yakobbo naasabira Efuraimu na Manaase omugisa
1Obu haahingwireho akasumi, abantu baija baagambira Yosefu bati: “Sso murwaire.” Aho Yosefu yatwara abatabani babiri, yagenda nabo. 2Abantu baagambira Yakobbo bati: “Mutabani wawe Yosefu aizire kukurora.” Nubwo Isirairi yayekwatiriza, yaikarra ha kitabu kye. 3#Kub 28:13,14.Yagambira Yosefu ati: “Ruhanga ow'obusobozi bwona, akambonekera ndi omu kiikaro Luuzi, omunsi Kanaani, yampa omugisa, yangamba ati: 4‘Ndikuha oruzaaro nkukanyise nkwihemu amahanga maingi, kandi ensi enu, ndigiha abaijukuru bawe, ebe nsi yaabo ey'ebiro byona.’ 5Okuruga hati, batabani bawe ababiri, aba wazaaliire Misiri ntakakwebingire, bafokere baana bange. Efuraimu na Manaase baraaba bange nka Rubbeni na Simyoni oku bali. 6Kandi abaana abandi obubalizara abo baliba bawe, balirukwa amabara ga bagenzi baabo nigaijukurana, nukwo batunge omugabo gw'obugwetwa bwabo. 7#Kub 35:16-19.Habwokuba obu nkaba ninduga Padani, tuli omu muhanda, omunsi Kanaani, tuli haihi kuhika Efurati nkaferwa nyoko Rakeeri, namuziika ha rubaju rw'oruguudo orunyakutwara Efurati, niyo Beterehemu.”
8Isirairi obu yaboine batabani ba Yosefu yakaguza ati: “Banu nibaha?” 9Yosefu yagarukamu ise ati: “Abo nubo batabani bange, Ruhanga aba yampeeriire kunu.” Isirairi yagamba ati: “Banyirize haihi mbahe omugisa.” 10Omu kasumi ako, amaiso ga Isirairi gakaba gahimbaire, atakyahweza. Aho Yosefu yabamwiriza haihi, Isirairi yabanywegera kandi yababumbaatira. 11Isirairi yagambira Yosefu ati: “Nkaba ntarukunihira kugaruka kukurora, baitu Ruhanga andoleze n'abaana bawe.” 12Aho Yosefu yaiha abaana ha bibero bya isenkurubo, yajuumara hansi. 13Yosefu yakwata abaana bombi, Efuraimu yamukwasa omukono ogw'obulyo, yamuta ha rubaju rw'emoso orwa Isirairi, kandi Manaase yamukwasa omukono ogw'emoso, yamuta ha rubaju orw'obulyo orwa Isirairi, yabamwiriza haihi. 14Isirairi yagorra emikono ye, yagisoberaniza ogw'obulyo yaguta ha mutwe gw'Efuraimu omuto, kandi ogw'emoso, yaguta ha mutwe gwa Manaase, habwokuba Manaase nuwe akaba ali muzigaijo. 15Yaha Yosefu omugisa naagamba ati: “Ruhanga owa baisenkurwinywe, Abburahamu na Isaaka ou baaherezaaga, ayandinzire ira lyona okuhika na hati, 16malaika ayanjunire obubi bwona, Ruhanga ogu, abaana banu abahe omugisa beeyongere bakanye muno omunsi, kandi ibara lyange, n'amabara aga baisenkuru-nyowe Abburahamu na Isaaka, galeke kweba ebiro byona.”
17Yosefu obu yarozire ise naata omukono gwe ogw'obulyo ha mutwe gwa Efuraimu, yabiihirwa, yakwata omukono gwa ise, agwihe ha mutwe gwa Efuraimu, agute ha gwa Manaase. 18Yosefu yagambira ise ati: “Taata, eki orukukora tikihikire, habwokuba, onu nuwe muzigaijo, nuwe oteho omukono gwawe ogw'obulyo.” 19Baitu ise yayanga naagamba ati: “Mwana wange, nimmanya, mmanyire onu, na uwe alirugwamu abantu baingi, kandi aliba w'ekitiinisa, baitu muto we alimukiza ekitiinisa, kandi baijukuru be baliba ihanga likooto.” 20#Baheb 11:21.Ha kiro eki, bombi yabaha omugisa naagamba ati: “Abantu ab'omu Isirairi, obu baraabaga nibasaba omugisa, baraayaturaga amabara ganyu nibagamba bati: ‘Ruhanga atukorre nk'ebi yakoliire Efuraimu na Manaase.’ Yakobbo, nukwo yakulize ati Efuraimu, yamukiza mugenzi we Manaase.”
21Kandi Isirairi yagamba Yosefu ati: “Hati ndi haihi kufa, baitu Ruhanga araikaraga na iwe, kandi alikugarrayo omunsi eya baaswenkuru. 22Nkuhaire orubaju rumu orw'orusozi, nakukizaaho bagenzi bawe ensi ei nabahaire, ei nanyagisize empirima n'obuta, naginyagaho Abamooli.”
Atualmente selecionado:
Kub 48: BRR2008
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
Bible in Runyoro/Rutooro Interconfessional Translation © Bible Society of Uganda, 2008.