Mphattuwelo 30
30
Yakopi ahoyariha ipottha piili asaana
1Vano ukati woonnyawe Rakeli wiira khannyaranne asaana Yakopi, ahopacera unrama munnawe ni ahomwiirela Yakopi: Ukiyarane asaana, atthuna phatari kikhwe. 2Yakopi ahorusiya ni Rakeli ni aheera: Mi kinokhala Nluku, owiira kiwaatelihile uyara?
3Vano ule ahaakhula eeraka: Haawo Piila ula, ipottha aka, unthukumananeke wiira aayare asaana toko waahalaka waayara mi, wiira mwa yeeyo kaakhalane asaana. 4Phimaana ule ahonvaha Yakopi uthela ipottha awe yeehaninya Piila, ni ahonthukumanana. 5Piila ahorupala irukulu ni ahonnyarana Yakopi mwana. 6Vano Rakeli aheera: Nluku hooluma, heewa ncu naka ni hokivaha mwana. Phimaana ahonvaha ncina na Tani.
7Piila, ipottha ya Rakeli, ahorupala tho irukulu ni ahonnyarana Yakopi mwana onayeeli. 8Vaavale Rakeli aheera: Kaari ni ikhotto yuulupale ni munnaka ni kihotthema. Phimaana ahonvaha ncina na Nafitali.
9Ukati woonnyawe Leya wiira hohiya uyara, ahonkusa Siilipa ipottha awe ni ahonvaha Yakopi wiira anthele. 10Siilipa, ipottha ya Leya, ahonyarana Yakopi mwana mmoca. 11Vano Leya aheera: Ila iparakha! Phimaana ahomwiihana Kaate.
12Wahoolo, Siilipa, ipottha ya Leya ahonnyarana tho Yakopi mwana onayeeli. 13Vano Leya aheera: Kiri ootteeliya! Athiyana ayo ankokiirela kihotteeliya, ni ahonvaha ncina na Aseri.
Yakopi nawaayariha asaarawe asaana akina
14Ukati woohephiya itiriku, Rupeni ahorwaa umattani ni ahophwanya mirette cooyariha ni ahaawiihera anumwane. Vano Rakeli ahomwiirela Leya: Ukivahe mirette cooyariha ca mwanaa nnyo. 15Nanso ule ahomwaakhula: Khawutosile wakaakhilyaa alopwana ayo? Umphavela ukaakha tho mirette ciwiihilyawe mwanaka nnyo? Vano Rakeli ahaakhula: Ula uhiyu ula Yakopi naahala wuthukumanana. Naakakhanihaka ni mirette ciwiihilyawe mwanaa nnyo.
16Ucoocilo, ukati waturuwilyawe Yakopi umattani, Leya ahomwiikamela numwiirela: Ilelo we unaahala ukithukumanana, kontha kihowuthumani ni mirette ca mwanaka. Ni yoole uhiyu ule ahonthukumanana.
17Nluku ahomwiiwa Leya. Ule ahorupala irukulu ni ahonnyarana Yakopi mwana oneethanu. 18Vano Leya aheera: Nluku hokiliva wavahilyaka ipottha aka waathukumanana awannyaka. Phimaana ahonvaha ncina na Isakari.
19Leya ahorupala tho irukulu ni ahonnyarana Yakopi mwana onasiita. 20Leya aheera: Nluku hokitthuva itthuvo yomaana. Ula nkwaha ula awannyaka anakunkomana, kontha kihaayarana asaana siita. Phimaana ahonvaha ncina na Sepuloni.
21Ukati vakani tho, ule ahonnyara mwana mwanthiyana ammahilyawe ncina na Tina.
22Vano Nluku ahomuupuwela Rakeli. Nluku aheewa ukhuwela wawe ni ahompanka mayoyara. 23Ule ahorupala irukulu n'unnyara mwana ni aheera: Nluku hotamiha ihaaya caka nnyo. 24Ahonvaha ncina na Yusufu ni aheera: Mwanene Nluku akivahe tho mwana nkina.
Unyakulihaninya wa Yakopi ni Lapanu
25Rakeli nannyanrene Yusufu, Yakopi ahomwiirela Lapanu: Ukihiye kituruwele uwani, ilapo aka. 26Ukivahe asaaraka ayo yuvarenlyaka nteko, na asaanaka ayo, kontha mi kimphavela urwaa uwani. We uhocuwela ciinryaka wowuvarela nteko.
27Nanso Lapanu ahomwiirela: Wakhala wiira kihophwanya iparakha wa miithoni waa kinawulepela wiira ukhale ni mi. Kihoona wiira Mwanene Nluku hokivaha iparakha nlattu wawaa we. 28Ni ahopwahera eeraka: Ukihimerye ihisapu yowuliva. Mi kinaahala wuuliva. 29Yakopi ahomwaakhula: We uhocuwela cuvarenlyaka nteko, ni mihuwo caa cihoncereryaa nlattu wowehaweha mi. 30Ni citthu vakani caarinaa kihinawa, cihoncereryaa venci, kontha Mwanene Nluku hovaha iparakha ukati uwilyaka uno. Vano mi kinhala upanka yakhani itthu yookavihera itthoko aka?
31Vano Lapanu ahonkoha: Untthuna kuuvaheke isiyani? Yakopi ahaakhula eeraka: Uhikivahe itthu. Kinaahokoleela uwacawaca n'uhakhela mihuwo cinyu wakhala wiira nnaakupali imphavelaka. 32Ilelo kinaahala uvira mmihuwoni mwinyu ni kimmothanla ikhontwaa co manepa ni co mitthottwe, ni asikhontwaa othene ooripa, ni ipuri co manepa ni co mitthottwe, commo phinhalaya ukhala mpokerero aka. 33Ni isariya aka inkowuvaha uhoolo usaahiti, ukati unhalaa uwehaweha mapokerero aka. Yakhalaka mmatatani mwaka ipuri yoohi manepa ni yoohi mitthottwe, ikhontwaa coohiripa, pooti wiira cowiinyiya.
34Lapanu aheera: Nihotthukelana, weerannyee toko cihimilyaa. 35Nanso, nenno nihuku nno Lapanu ahaakawaniha apeperu o mitthottwe ni o manepa ni ipuri cothene co mitthottwe ni co manepa cothene caari cotteelatteela ni asikhontwaa othene ooripa ni ahohiya mmatatani mwa asaanawe. 36Vano Yakopi ahokhuma nipuro nne arwaaka ncoko woweettiya mahuku mararu. Wahoolo Yakopi ahopwaherera uliha mihuwo ca Lapanu.
37Vaavale Yakopi ahokusa miri cikithi co mphari, ntholo ni rokoci ni ahokhava apankaka mitthottwe. 38Wakhavaawe, aheesa uhoolo waya mihuwo, mmakuwani, mawureryoni ni mapuro yarupaya ni caanapepheryana ukati waawaaya uwurya. 39Ni campepheryana uhoolo waya miritta, cantotholiya co marephurephu, co manepa ni co mitthottwe.
40Vano Yakopi anawawayaniha cikani nnyo, ni aanapanka wiira cennyo cikhale wamoca ni inama co marephurephu ni cooripa ca Lapanu. Commo antthonkomaniha mihuwo cawe woohitakanihera ca Lapanu. 41Ukati warupalaya ikhontwaa coonenevaca nnye, Yakopi anaweesa uhoolo waya nwo miritta, cineemelacilene mmasepani, wiira citotholele mmirittani mmo. 42Nanso kheesa miritta nnye uhoolo waya inama cookenkennya, kontha cookenkennya nnyo caakhala ca Lapanu ni cooneneva nnyo caakhala ca Yakopi.
43Phimaana Yakopi ahothaciri venci mpaka ahaana mihuwo cinci, ipottha cithiyana ni cilopwana, inkamira ni apuuru.
Atualmente selecionado:
Mphattuwelo 30: NNI
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
© 2021, Wycliffe Bible Translators, Inc. All rights reserved.