Mphattuwelo 13
13
Umwalananaca wa Aparamu ni Loti
1Vano Aparamu ahokhuma wIciipitu ni ahorwaa uNekepi na amwaarawe ayo, ni citthu cothene caarinawe ni Loti ahontthukana ikwaha. 2Aparamu ahothaciri venci, ahaana inama, ipheeta ni iwooru. 3Ule ahokhuma uNekepi arwaaka uPeteli, mpaka ahophiya nipuro naapacenryawe unkhurutula heema nipuro niri iriyari uPeteli ni wAyi. 4Ahophiya nipuro naapacenryawe uteka ikhilompi ni Aparamu ahonlapela Mwanene Nluku.
5Ciicammo Loti, antthukannyawe ikwaha Aparamu ahaana mihuwo cawe, imope na aheema. 6Vano nipuro nno khanaatosa wiira oyeeli akhalace nttetthe mmoca, kontha yahaanaca mihakhu cinci cahaalamuliyaya ukhalakhala nipuro nimoca. 7Phimaana yahokhuma ipokoho ya ahakheli a Aparamu na ayo a Loti, ni yooyo ukati uyo annakanani ni maperesii yaakhalaca yeeyo ilapo eyo.
8Vano Aparamu ahomwiirela Loti: Va ihikhume ipokoho we ni mi, ni ihikhume ipokoho ya ahakheli aa na ahakheli aka kontha va niri ayaayoru. 9Ila ilapo ila khimala, va nrwee nimelane. Weeraka kinthanla moono nthiyana mi kinhala urwaa moono nlopwana; atthuna weeraka kinthanla moono nlopwana mi kinrwaa moono nthiyana.
10Vaavale Loti ahoweha micoko cothene niwahoncivela uthako wo Yortani, waari wowunttelana ratta mpaka uSowari, waari toko iluwani ya Mwanene Nluku, toko wenryaya itthaya yo wIciipitu. Iyo yeeranele Mwanene Nluku hinakwanyula uSotoma n'uKomora. 11Loti ahothanla uthako wo Yortani eettaka arwaaka unkhuma ncuwa, ni oyeeli yahomwalaanaca. 12Aparamu ahokhala ilapo yo'Kanaa. Nanso Loti ahorwaa wakhurutula aheema awe mmaparasa ciri muthakoni cooco uSotoma. 13Nanso alopwana yaakhalakhalaca uSotoma ayo yaari oohiloka ni yaanankosera Mwanene Nluku.
14Aparamu umwalana wawe ni Loti, Mwanene Nluku ahomwiirela: Uwuse miitho aa ayo ni uwehe ukhuma nipuro niryaa mpaka mphantte wooculu ni woohitto, unkhuma ncuwa mpaka unkela ncuwa. 15Kontha ilapo yothene inoonaa eyo, kimmowuvaha we ni ucuulu aa wothene mpaka khalayi. 16Ni ipyo aa kinopanka toko ntthupi no mwiilaponi mothene. Maanaya ntthu ooryaka waalikela ntthupi no mwiilaponi mothene, ciicammo ni ipyo aa naahala woorya waalikela. 17Wunwe ni weettakace ilapo yothene. Mwittayi waya ni mwikhuvi waya kontha kimmowuvaha we.
18Ni Aparamu ahonkhuna heema awe, mpaka urwaa ukhala ilapo yo'Manree iri cooco Heporoni, ni anttitthimihaka Nluku ahontekela ikhilompi.
Atualmente selecionado:
Mphattuwelo 13: NNI
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
© 2021, Wycliffe Bible Translators, Inc. All rights reserved.