Mataio 10
10
1Wia nou 12 kitomudio merei nouro nei naibaha itua nou mabuito wia pupuo nouro neido naibaha imaai ubauba urio iheemoi wia uba kiro’uti oubi wia temeteme oubi auwoha nei meaha iwaimoi.
2Ina nouri 12 koromododiai oubi nei himia painari; Simona nou opuitori, paina ata Pita, wia Anederea nou niamari, Iakobo Sebedaio mere, wia Ioane nou niamari; 3Pilipo wia Batolomaio wia Toma wia Mataio, nouri gavana wiha keauri dubu, wia Iakobo, Alepaia mere, wia Tadio; 4wia Simona Kanenia dubu, wia Iuda Isakarioto, Iesu piroha kowahuo dubu. 5Nouri 12 oubi, nei himia, Iesuro naibaha imododiai wia neido nou modoboito naibaha iaowa:
Doboi oubi mabuito rio orohomo aue wia Samaritana oubi oopo amida rio idoutimo aue; 6na’u Isaraela oubi kaatoai mamoe aibo, neido gauwoha rio ta’umo. 7Ina rio ida’umo rio naibaha itomututimo naiba iaotutiumo Toboro‐bububati nou tariwari. 8Uba kiro’uti oubi rioo meaha taiwaimo wia koroihi oubi rioo taiitoutimo, Lepera ramu oubi rioo sovio taiwaimo wia ubauba urio rioo taiiahoiutimo. Nana godo wiha tato rio tau oweaumo, nana godo wiha tato rioo naibaha taimaatimo. 9Kaikarawi moni wia bohoboho moni wia wibuwibu moni rioo ba’ewa iworohoumo aue. 10Navewa kiworoho ha’o iworohoumo aue, neewatoi uduuduo wia doboi konoha wia bugu rioo iworohoumo aue, mabu nouri kowaati mere nou meaha oubio kihona nouido emaatimoi. 11Ina oopo auwoha rio naibaha taiidoutimo, auwo oopo wia keke oopo, taiatoromo boti meahari wia nouowa tamidioumo rio noudo ira’edumo. 12Ina rio motoito idowa neido niainiai wade taromo. 13Ina oubi meahari rio amea nouri motoito mo’umo: ina oubi mea biahai rio amea rioido maraiwaimo. 14Ina oubio rio niro biahai wia rio wade neiio irovidiomo tatowa, nou ta’uwa nei himia moto noudo wia nei himia oopo noudo rio imeheaimowa, tuo tuo rio himia konoudo taimomidimo. 15Naiheha mo rioido ainaro; kiwotoi hiwiowa Sodoma wia Gomora neitio keke uba wiha aiwaido‐oweai, wia oopo nouri nouro auwo uba wiha aiwawe’ai.
16Nouri rio moro ainitiodoi mamoe aibo heauwo kaukau turi goroito, mabu nouri imini mea taimowaimo ede aibo wia muni aibo taitimo badu aibo. 17Ata rioo oubi tore‐toreha taiaurimo mabu nouri neiio rio wade kiao oubido aiwaimo‐iwoi wia nei himia sunagowa neiio rio aiwaimo‐imowotodioi; 18wia gavana oubido wia pai oubido neiio rio aiwaimo‐iworohotuti mo himia painawa, mo himia wade neido wia douboi oubido iaomoi. 19Ina hiwio’i nouowa neiio rio aiwaimo‐iwoi, rio kiao wade pauwo araromo aue mabu nouri kiao wade’i rioo aiwaimo iaoi, nouri wade rioido aiwai‐maati hiwio’i nouowa; 20mabu nouri rioo iaomo biahai, rio Abea, nou himia Tana‐urioito, nouvia rio iminiwa riao. 21Namuro nou niama aiwamaai epiai, wia abea nou himia mere naiba wia mere amida heauwo owarariumo nei himia abeamiora mamiora iwotomoi. 22Oubio auwoha rioido oriha waimo‐emeauri mo himia painawa ina dubu nou giieiha ohidioi nou himia hiwio auwoha nouvia kiiro aiwaveai. 23Ata nou ta’uwa neiio rioido oopo’i nouowa gooa iwaimowa rio ata oopoito tadaumo. Naiheha mo rioido nou naro, Isaraela oopo oopo rioo iohodiomo biahai ta’ui nouowa Oubiha‐mere nou aiwau‐rou’i.
24Kitomudio mere opuito biahai kiapo‐dubumu; kowaati mere opuito biahai pai‐dubumu. 25Nou meaha kitomudio mere kiapo‐dubumu neiti na’u aibori, wia kowaati mere pai‐dubumu neiti na’u aibori. Ina neivia moto pai‐dubu paina tau idodoumo Belesebulo, taiba auwori neiio nou himia moto mere’i paina nou aibo aiwaimoidodoi. 26Nouri nei tore imaatimo aue mabu nouri kopiraa nana auwoha pidaito aiwaimo‐iwoi wia sisibo nana auwoha doo nei aiwaimo oboduti. 27Nouri wade mo rioido nou naro durii batiwa, rioo pida batiwa taiwaduutimo, wia nouri wade rio gareito orovidioumo rioo moto hoa giminiudo taiwaduutimo. 28Nouri oubi neiio rio goho iwotomowa wia rio urio iwotomo raihe, rio nei tore imaatimo aue. Ata nouri nou umo uriora gohora uba urio batiwa oropoiiotoiwa, rioo nou tore tamaatimo. 29Keke pahagama neewa na’u keke monito orowametoi tatora wia na’u pahagama hopuwa omoa raihe ina rio Abea nou niro biahai. 30Wia rio opu hoobo’i nei auwoha tau iapo. 31Nouri tore iatimo aue, rio korowame auwori pahagamawia korowame kekebuori. 32Mo botiro nabodoi oubi hohowa, nouido mo Abea hohowa toborowa moro ainabodoi. 33Wia mo botiro namatioi oubi hohowa, nou moro ainamatioi mo Abea hohowa toborowa.
34Rio naiba araromomo aue, amea amea batibatito iwoumoi mo nou no’uro. Amea amea iwoumoi mo ko’u biahai, na’u korowoto garaara nou himia. 35Dubu nou himia abearo emaboatidioi naiba behe nou himia mamuro emaboatidioi naiba etera nou himia damuro emaboatidioi, mo nouri no’uro. 36Wia nou himia oubi nei nou bauurowaro oubi aibo aiwaimoiti. 37Nouri dubu nou abeara mamura niro imahebidioi opuito ina nou mo dooudo niro emahebidioi, nou mea biahai nou momu emidioi; wia nouri dubu nou merera behera niro imahebidioi opuito ina nou mo dooudo niro emahebidioi, nou mea biahai nou momu emidioi. 38Wia nouri dubu nou himia satauro emidai tatowa wia mo dooudo orobodo tatowa nou mea biahai nou momu emidioi. 39Nouri dubu nou himia kiiro aiwararomodioi doo nouro aiwatoai, wia nouri dubu nou kiiro owateaiwa mo painawa nourowia kiiro aiwaveai.
40Nouri dubu nou rio iaubuaiwa nou moro kiaubuairi, wia nouri dubu nou mo aubuaiwa, mo nouro notiodoiro nouro nou kaubuairi. 41Nouri dubu nou peroveta dubu peroveta painawa naibaha kaubuairi, nourowia peroveta wiha aiwaweai; wia nouri dubu nou meamea dubu, meamea dubu painawa naibaha kaubuairi, nourovia meamea dubu wiha aiwaweai. 42Wia nouri dubu nou na’u koimo uuto obo ramu, nou gauwoha, na’u keke mere nouri nouido aiwamaai, kitomudio mere painawa, nou himia wiha nana’i nouro iatoai raihe.
Atualmente selecionado:
Mataio 10: KXW1941
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
Published by the British and Foreign Bible Society in 1941.