Matius 7
7
Tia' mahtotoz ulit kaapa zéi'kan a liné'os né tou
(Luk. 6:37-38, 41-42)
1Kuan ni Yesus, “Ni kamu én tia' mahtotoz ulit kaapa zéi'kan a liné'os né tou walina, wo ni kamu zéi'kan totozen ni Opo Empung tanu niitu. 2#Mrk. 4:24 Pahpaan kuramo ni kamu i mahtotoz a liné'os né tou walina, téntumo si Opo Empung in tumotoz a liné'os niou. Wo kuramo um pakahilek niou wia sé tou walina, téntu kangkasii um pakahilek ni Opo Empung wia ni kamu. 3Kaa un emu' witu um weren ni katuarimu éng kaile-ilekannu, taan u salawako witu um werenmu én zéi'kan kailekannu? 4Kura ko toro kumua wia si katuarimu, ‘Wia'i, éndongkumokan un emu' witu um werenmu,’ taan ndéén witu um werenmu ém wéwéhan u salawako? 5É tou mahgau-gau lé'os! Éndompé'la u salawako witu um werenmu, wo taré kaile-ilekannu un emu' witu um weren ni katuarimu wo niitu taré éndonnu.
6Tia' mahwéhé u lenas wia si asu én taa si asu itii mézuméha ni kamu. Wo tia' mahwéhé u mutiara wia si wawi én taa niitu maipeléé-léékna uman.”
Mahaléila wia si Opo Empung
(Luk. 11:9-13)
7Kuano kasii ni Yesus, “Mahaléila, ni kamu ém wéhan. Menérola, ni kamu é makailek. Tuméngkorla, ni kamu ém wukaan um pepenet. 8Pahpaan séi uman si mahaléi ém wéhan, séi uman si mahpenéro é makailek wo séi uman si mahténgkor ém wukaan pepenet.
9Wéwéhan wé im wia ni kamu si méhé um watu wia si oki'na, sa si oki'na itii mahaléi roti? 10Kaapa méhé ulé', sa si oki'na mah- aléi seza'? 11Niitumo, sa kamu sé léwo' é mata'u mahwéhé am wangun wia sé oki' niou, apapé' kasii si Ama' niou witi kasendukan! Ni Sia é méhé am wangun wia sé tou mahaléi wia ni Sia.
12 #
Luk. 6:31
Péléng ang kapaaz niou im wangunené né tou wia ni kamu, téntu kangkasii um wangunen nioula wia ni séra. Nianamo a méipantik witu un ukum Torat wo wana ang kitap am pinantik né nabi.”
Um pepenet pesut
(Luk. 13:24)
13Ang kuan kasii ni Yesus, “Muntepa kumiita witu um pepenet pesut, pahpaan um pepenet loang wo u lalan lempaz é mangé witi naraka, wo lakez sé tou mahuntep mahkiita witu. 14Taan um pepenet i mangé witu ung katou-touan ém pesut wo u lalan mangé witu ém pesut wo toyo' uman sé tou kumiit witu.”
Tumoro an tutuzu' towo
(Luk. 6:43-44)
15Ang kuan kasii ni Yesus, “Mile-ilek im wia sé nabi towo! Ni séra méyé wia ni kamu é mahwangu-wangun lé'os tanu sé domba, taan ndéén ni séra é masuat wo si serigala meneza' tou. 16Ni séra én toro kata'uan niou im wana am wua'na am pahwangunen néra. Toro wé si tou i mupu'mé um wua'na un anggor wana am panga menulah kaapa um wua'na un ara wana an zukut menulah? 17Péléng ang kai wangun é méhémé am wua'na wangun, taan ung kai zéi'kan wangun é méhémé am wua'na zéi'kan wangun. 18Zéi'kan mamuali ung kai wangun wo am wua'na én zéi'kan wangun, kaapa ang kai zéi'kan wangun wo am wua'na ém wangun. 19#Mat. 3:10; Luk. 3:9 Péléng ang kai zéi'kan mahwua'mé wangun, niitu ém wanti'en wo ziketan. 20#Mat. 12:33 Niitumo, im wana am wua'na am pahwangunen néra, toro kata'uan niou sa séra ulit nabi kaapa zéi'kan.”
Zéi'kan péléng sé tou maéndo tou ni Opo Empung
(Luk. 13:25-27)
21Kuan kasii ni Yesus, “Zéi'kan péléng sé tou sé sekezé é mahtawah ni Aku, ‘Tuang, Tuang!’ é maéndo tou witi Kakolanoan ni Opo Empung. Taan akaz uman sé tou mahwangun ang kapaaz ni Ama'-Ku si witi kasendukan sé maéndo tou-Na. 22Im witu un endo kaakazan ung kaayahan, lakez sé matumawah ni Aku, ‘Tuang, Tuang, ni kai mahkua a méikua-Mumé karia u ngaran-Mu wo mahwoho sé sétang karia u ngaran-Mu wo ni kai kangkasii mahwangun a makakompo'en karia u ngaran-Mu.’ 23#Mzm. 6:9 In toro niitumo ni Aku makaulit ing kumua wia ni séra, ‘Ni Aku én zéi'kan nimahta'u-ta'ula ni kamu! Tumingkasa im witu u sinaru-Ku, ni kamu péléng sé memua-muali a léwo'an!’ ”
Un aandéan tumoro si tou tulap wo si tou lemou
(Luk. 6:47-49)
24Kuano kasii ni Yesus, “Séi sé mahtalinga an ipahkua-Ku kenu wo mahwangun niitu, ni séra é masuat wo si tou tulap si rimendai um walé witu un to'tolan watu. 25I muzané totoz repet makaz i mahlewuh wo kasii u reges repet tumoromé um walé itii, um walé itii én zéi'kan marewa. Pahpaan um walé itii é méirendai witu un to'tolan watu. 26Taan péléng sé mahtalinga an ipahkua-Ku kenu wo zéi'kan mahwangun niitu, ni séra é masuat wo si tou lemou si rimendai um walé witu um wawo un eris. 27I muzané totoz repet makaz i mahlewuh wo kasii u reges repet tumoromé um walé itii, um walé itii é rengan i marewama wo totoz maléwo- léwo'ma.”
Sé tou lakez in timalinga an tutuzu' ni Yesus
28I simampetoma si Yesus i mahtuzu', sé tou lakez itii é mengusi-ngusingsing in timalingama am pahtuzu'-Na, 29#Mrk. 1:22; Luk. 4:32 pahpaan ni Sia i mahtuzu' ni séra éng karia ung kawasa, zéi'kan tanu sé tou tulap un Torat.
Atualmente selecionado:
Matius 7: LAITOM
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão