Gyenesise 3
3
Kuro sona asefinɛ
1 #
Nye 12.9; 20.2 Né ewoo te kanda tra eburo kaka biala bɔ AWURADE Nyameɛ ayɔ ɔ. Na obisale braa ne kyɛ, “Yiti Nyameɛ aha kyɛ, ‘Nnɛma ɛmɔdi turo ye anu bakaammaa biala bie’?” 2#Gye 2.16 Na braa ne buale ewoo ne kyɛ, “Atee wɔ berɛ kyɛ yɛdi turo ne anu mmakaammaa ne bie; 3nakoso Nyameɛ nwa: ‘Bakaa bɔ ogyi turo n’afia ne mma de, nnɛma ɛmɔdi bie, yeɛ nnɛma ɛmɔfa bɛ sa bɛka ye. Sɛ ɛmɔdi a, ewue yeɛ ɛmɔkowu ɔ.’ ” 4#Yoh 8.44 Nakoso ewoo ne sele braa ne kyɛ, “Ɛmɔngowu biala. 5Ofikyɛ Nyameɛ se kyɛ kyẽa bɔ ɛmɔkoli bie ne, ɛmɔ nye kobukye, na ɛmɔkɔyɛ kyɛ Nyameɛ#3.5: NYAMEƐ: Hebri dwudwolɛ nu, ye bo kora kyire: nyameɛ mɔ. ala, na ɛmɔanwu paa ne bɔne.” 6#Ɛks 20.17; 2 Kor 11.3; 1 Yoh 2.15-17 Na braa ne nwuni kyɛ saa bedi bakaa ne mma a ɔyɛ yee, ɔyɛ nyemene, na ɔkora ma sona nwu nworɛ. Yiti ɔtele ye mma ne bie lili, ɔmane ohu ne koso bie, na ye koso olili. 7#Gye 2.25 Afei bɛ munyɔ bɛ nye wale bɛ nwo so, na benwuni kyɛ bɛ nwo lela so; yiti bɛpale borɔdoma nyaa bɛfa bɛkatale bɛ nwo.
8Na aleɛ dwole ne, bɛtele AWURADE Nyameɛ gya boso kyɛ ɔnatenate turo ne anu, yiti biaa ne ne ɔye ne bɛɛfeale AWURADE Nyameɛ wɔ turo nu berɛ mmakaa ne anu. 9Nakoso AWURADE Nyameɛ frɛle biaa ne bisale ye kyɛ, “Ɛwɔ nisua?” 10Na biaa ne buale kyɛ, “Ndele wɔ gya boso wɔ turo ne anu, na ɛserɛ hane me, ofikyɛ né me nwo la so, yiti ngɔmveale.” 11Na Nyameɛ bisale ye kyɛ, “Nwa yeɛ osele wɔ kyɛ wɔ nwo la so ɔ? Bakaa bɔ nganzole wɔ kyɛ nnɛdi ye mma ne bie ne, ali bie hɔ ɔ?” 12Na biaa ne buale kyɛ, “Braa ne bɔ ɛfale ye ɛɛbokale me so ne, ye yeɛ ɔfale bakaa ne mma ne mane me ɔ, yeɛ me koso nnili ɔ.” 13#2 Kor 11.3 Na AWURADE Nyameɛ bisale braa ne kyɛ, “Nzikyɛ nikye yeɛ ayɔ ye?” Na braa ne buale kyɛ, “Ewoo ne yeɛ ɔlakalakale me maa nnili ɔ.”
14 #
Mika 7.17; Nye 12.9; 20.2 Na AWURADE Nyameɛ sele ewoo ne kyɛ,
“Ɔnate ɛhe bɔ ayɔ ne ati,
musue to wɔ wɔ kuro ngaka mukoraa,
ɔne eburo ngaka mukoraa nu.
Ɛkɔhwe wɔ nwo ase wɔ ko so,
na ekoli nnɛterɛ w’asetena nu amukoraa.
15Ngɔfa ɛpɔen ngɔto wɔ ne braa n’afia,
yeɛ wɔ boso ama ne ye boso ama b’afia;
ɔkɔgyerɛgyerɛ wɔ ti,
na wɔ wora aha ye gya si.”
16Na braa ne wora, Nyameɛ sele ye kyɛ,
“Ngɔmaa ɛkɔte aworɛ nu yealɛ paa,
na yealɛ nu yeɛ ɛkɔwo mmaa ɔ.
Nakoso wɔ wora kɔlɔ ehu,
na okoli wɔ so.”
17 #
Yer 12.4; Hos 4.3; Heb 6.8 Na Nyameɛ sele Adam koso kyɛ,
“Kyɛbɔ atie bɔ ɛye hane,
na ali bakaa bɔ nganzole wɔ kyɛ ‘nnɛdi ye mma ne bie’ ne ati,
ɔnate wɔ ti, musue aha aseɛ.
Na ɛfɛɛ paa yeɛ ɛkɔfɛ koraa né adidi so w’asetena mukoraa nu ɔ.
18Okofifi mmowue ne ɛfone kɔma wɔ,
na eburo mmakaa so aleɛ yeɛ ekoli ɔ.
19Mvifire kosongyi wɔ ti anwo
koraka né anya aleɛ ali,
kɔpem kyɛ ekosa kɔhɔ nnɛterɛ nu ɔ;
ofikyɛ nnɛterɛ nu yeɛ nyele wɔ mvili ɔ,
ɛte nnɛterɛ, na nnɛterɛ nu ala yeɛ ekosa kɔhɔ ɔ.”
20Na biaa ne tole ɔye ne dumaa Hawa, ofikyɛ ɔte teasefoɛ mukoraati bɛ ni. 21Na AWURADE Nyameɛ fale nwomaa pombale ɛtena mane Adam ne ɔye maa bɛherale.
Nyameɛ foa Adam ne Hawa fi Eden
22 #
Nye 2.7; 22.2, 14, 19 Afei AWURADE Nyameɛ sele kyɛ, “Nea, kuro sona ne ayɛ kyɛ yɛ nu ko ala, wanwu paa ne bɔne. Annea a, né watengyɛ ye sa wate ngoa bakaa ne koso bie wali, ná watena ase daa.” 23Yiti AWURADE Nyameɛ foane ye fili Eden turo ne anu, kyɛ ɔɔyɔ kua wɔ aseɛ bɔ ɔyele ye fili nu ne aso. 24Ɔfoane kuro sona ne fili berɛ, na ɔfale kɛrubim, ɔne ngrandɛ bɔ ogye wuronyiwuronyi, na osa pɛ ye nwo osiele Eden turo ne nyunu wɔ eyia afiteleɛ, kyɛ ɔbɔ atee bɔ ɔkɔ ngoa bakaa ne nwo waen.
Atualmente selecionado:
Gyenesise 3: EBP
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
Esahie Bible © Bible Society of Ghana, 2018.