KUPUTUKA 6
6
1Jino casolokele, omu vaputukile vatu kuvula kwilu lyamavu, omu vasemene vana vavo vamapwevo,
2kaha vana vaKalunga hivamwene vana vavatu vamapwevo ngwavo, vanawahe, kaha vambacile mapwevo vosena vaze vasakwile.
3Yehova ambile ngwenyi, Xipilitu yami kexi kuxinjila vatu haya myaka yosena ko, mwomwo vakivo vanapu vakweci mijimba yanyama. Oloze makumbi avo nawakaheta mumyaka likulukaji namakumi avali.
4Makumbi aze hamavu hapwile vatu vakutaluka cikuma, nahakukumisa makumbi aze nawa, haze vengilile vana vaKalunga muli vana vavatu vamapwevo, kaha vasemene navo Vana, vakivo vapwile vindume vaze vapwileko kuxikulu, vatu vapuho.
5Yehova amwene kupuya cavatu ngwenyi, cinatoho cikuma hamavu, ngwenyi, #Samu 14.1-3.Kujina cavixinganyeka vyamicima yavo cosena cinapihi lika makumbi osena.
6Yehova apihililile mwomwo atengele vatu hamavu, kaha alinyengele mumucima wenyi.
7Yehova alyambile ngwenyi, Nangunongesa vatu ngunatenge kwilu lyamavu, navatu natunyama, navaka-kuhalala, natujila vahelu, mwomwo ngunapihililomu ngwavatengele, xikaho.
8Oloze Nowa awanyine likoji kumeso aYehova.
Nowa mwasonga wato
9Eci cikiko kusemunwina caNowa. Nowa apwile muka-kwoloka, ikiye wakulonga muli vaka-myaka yenyi. Nowa atambukilenga naKalunga.
10Kaha Nowa asemene vana vamalunga vatatu, ou Xeme, ou Hame, ou Yafwete.
11Hamavu hapihile kumeso aKalunga, hamavu hosena hapwile ulyanyi lika.
12Kalunga amwene hamavu, kaha kumana, hanapihi, mwomwo vatu vosena vapihixile jila yavo hamavu.
13Kaha Kalunga ambile kuli Nowa ngwenyi, Ngunajinyi kuvalalisa vatu vosena, mwomwo hali vakivo hamavu hosena hali ulyanyi lika, kaha tala, nangukavanongesa namavu hamwe.
14Lipacile wato wamungofwele. Kavatulemo mazuvo muwato, kaha ukaujika naukokotwa namutulo yawo nakusali yawo.
15Ukaupata ngana. Kusuhwa cawo cikahete #6.15 Kuvite yimwe yapwile kafwe mucitenda camukonekelo.mujikuvite makulukaji atatu, kutohwa cawo jikuvite makumi atanu, kusuhwa cawo helu jikuvite makumi atatu.
16Ukasonga njanena muwato, ukayilinge yakweseka mukuvite yimwe kutala kwilu, kaha cikolo cawato ukacihaka kuluhaci lwawo. Kaulinge najizuvo kumavu, najizuvo hakaci, najizuvo helu.
17KahAmi, tala, Ami nangukatuma livaji lyameya hamavu nakunongesa vakweci mijimba vosena muli kuhwima cakuyoya muxi yalilu, vosena vali hamavu navakafwa.
18Oloze nanguzamisa luxiko lwami nayove, kaha naukengila muwato, nayove, navana vove vamalunga, napwevo lyove, namapwevo javana vove nayove hamwe.
19Kaha kuli vaka-kuyoya vosena vakweci mijimba vosena ukaneha vavali kumuyaci vavali kumuyaci muwato, ukavalame vavatonyi nayove hamwe. Vakapwe cilunga nacipwevo, cilunga nacipwevo.
20Natujila nawa kumiyaci yavo, navimuna kumiyaci yavo, navaka-kuhalala hamavu vosena kumiyaci yavo, kumuyaci vavali kumuyaci vavali vakeze kuli ove ukavalame vavatonyi.
21Kalitalile nawa vyakulya vyosenovyo veji kulyanga, ukalikungulwilevyo, kaha navikapwa kulya kuli ove nakuli vakivo.
22Mukiko vene mwalingile Nowa, nge kutesa namwosenomwo vamulwezele kuli Kalunga, ngoco mwalingile.
Livaji
Atualmente selecionado:
KUPUTUKA 6: LUE70
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
Luvale Bible © Bible Society of Zambia, 1970.