YOHANA 5
5
Yesu ahonia omundu owali niyakwa likara hetiba liamaatsi
1Olunyuma lwamakhuwa ako, Yesu yatsia Yerusalemu mwisabo lia Abayahudi. 2Nali ebweneyo, lialiyo litiba elilangwa muluheburania mbu, Betsizatsa, ahambi khushilibwa shilangwa mbu, Eshiamakondi. Litiba liamaatsi elo liali nebirookoola birano. 3Omukanda omukhongo kwabandu, abalwale, ababofu, abalema nende abakwa amakara, bali nibakonile mubirookoola ebio. 4#5:4 Amahandiko kandi kaboola mbu, Balindililanga amaatsi okhwirunda, shichila omumalaika wa Omwami yekhanga mwitiba elo eshise nalebe natuubuula amaatsi. Ne omulwale owaranjililanga okhwikha mwitiba elo amaatsi nikakhatubuukha yahonanga obulwalebwe. 5Ne yaliho omundu undi owali niyalwala khulwemiyika amakhumi kataru namunane. 6Olwa Yesu yamulola nakonileho, ne namanya mbu, omundu oyo yakhalwala khulwa oluhoono olurambi. Mana Yesu namureeba ari, “Wenya okhuhona?”
7Omulwale oyo namukalusia ari, “Omwami, shiendikhwo nende omundu owokhunzinjisia mwitiba olwa amaatsi kaba nikakhatuubuulwa tawe. Ne olwa embetsanga nindeema okhwinjilamwo, ne oundi aranjilila okhwinjilamwo isie neshili.”
8Yesu namuboolela ari, “Sinjila wituushe omukekwo mana ochende.” 9Mana omusaatsa oyo nahonibwa habwene nahabwene, niyetuukha omukekakwe mana nachaaka okhuchenda.
Ne amakhuwa ako kekholekha khunyanga eya Isabato. 10#Neh. 13:19; Yer. 17:21Kho abemilisi ba Abayahudi nibaboolela owali nahoniibwe oyo bari, “Inyanga yino neya Isabato, ne nomusilo iwe okhuchinga omukekakwo.”
11Naye nabakalusia naboola ari, “Omundu umboniye niye oumbooleele ari, ‘Wituushe omukekakwo mana ochende.’ ”
12Nabo nibamureeba bari, “Omundu oukhubooleele ari, ‘Bukula omukekakwo mana ochende,’ niwiina?”
13Nebutswa omusaatsa oyo shiyamanyilisia owali namuhoniye ta, shichila omukanda kwabandu kwali omukhongo, ne Yesu yali namalile okhurulaho.
14Olunyumakhwo, Yesu yamunyoola nali muhekalu, ne namuboolela ari, “Recheresia, bulano omalile okhuhona, khulweshio oleshe okhwonoona khandi, nebutswa likhuwa libi muno linyala okhukhwikholekhakhwo.”
15Mana omusaatsa oyo natsia naboolela Abayahudi mbu, Yesu niye owali namuhoniye. 16Mana nibachaaka okhufukula Yesu, shichila yali nahoniye khunyanga eya Isabato. 17Nebutswa Yesu yabakalusia naboola ari, “Papa wanje ashikholanga emilimo, nasi siesi okhuula ekhole emilimo.”
18 #
Obuch. 2:16
Okhuboola okhwo khwachila abemilisi ba Abayahudi nibakhaaba muno mbu bamwire, shichila mbu, shiyali nafunaache butswa amalako ka Isabato konyene ta, yali khandi naboolile mbu, Nyasaye niye samwana, ne munjila eyo, yali niyechelaasiye khu Nyasaye.
Obunyali obwa Omwana wa Nyasaye
19Mana Yesu nabakalusia naboola ari, “Emuboolela toto mbu, omwana shianyala okhukhola likhuwa liosi liosi khululwe omwene ta, habula akholanga kalolanga samwana nakhola. Amakhuwa koosi aka samwana akhola niko khandi aka omwana yesi akholanga. 20Okhuba samwana yaheela omwana, ne khandi yamumanyia emilimo chiosi echia ye omwene akholanga. Khandi alamumanyia emilimo emikhongo echiokhukhola echishila echio, nenywe mulahuka. 21Okhuba shinga olwa samwana alamusinjia abafu nabahelesia obulamu, nolwa Omwana yesi ahaananga obulamu ario khwabo aba achamanga okhuhelesia. 22Kata Samwana shiakhalachilanga omundu yesi yesi eshiina tawe. Nebutswa yamuhelesia Omwana obunyali bwosi bwokhukhalaka eshiina, 23kho mbu, boosi bahelesie Omwana oluyali shinga olwa bahelesinjia Samwana omwana oluyali. Oulahelesinjia Omwana oluyali ta, shiahelesinjia Samwana owamuruma oluyali tawe.
24“Emuboolela toto mbu, ouhulila amakhuwa kanje, ne nasuubilila owaruma isie, ali nobulamu bweinziayo. Shialakhalachilwa eshiina tawe, habula amalile okhubira okhurula mukhufwa niyenjila mubulamu. 25Emuboolela toto mbu, ebise bitsanga, ne khandi bimalile okhuula bulano, olwa abafu bakhahulile omwoyo okwa Omwana wa Nyasaye, ne abakuhulila balaba mwoyo. 26Okhuba shinga olwa Samwana ali eshinoko shiobulamu, nolwa khandi yakhola Omwana okhuba eshinoko shiobulamu ario. 27Mana khandi yahelesia Omwana obunyali okhukhalaka eshiina, shichila niye Omwana womundu. 28Mulahuka amakhuwa akemuboolelanga kano ta, ebise bitsanga, olwa abafu boosi bakhahulile omwoyokwe 29#Dan. 12:2ne nibarula mubilindwa. Abakholanga amalayi bakhalamusibwe nibaba mwoyo, nabo abakholanga amabi bakhalamusibwe nibakhalachilwa eshiina.
Obuloli khu Yesu
30“Isie shienyala okhukhola eshindu shiosi shiosi khulwa obunyali bwanje omwene ta, ekhalakanga butswa shinga olwa Nyasaye yamboolela. Obukhalachi bwanje nobwa habwene, okhuba shiekhaabanga okhukhola akokhwenya khwanje omwene ta, habula akokhwenya okhwa oyo owaruma isie.
31“Ne nimba nekhola obuloli khwisie omwene, obuloli bwanje obwo shibuba nibuli obwatoto tawe. 32Nebutswa aliho oundi oukholanga oubuloli mushilenje shianje, ne emanyile mbu, aka aboolanga khwisie nakobwatoto. 33#Yoh. 1:19-27; 3:27-30Mwaruma abaloli benywe khu Yohana, naye yarumbula obuloli khubwatoto. 34Shikali mbu obuloli khwisie burule khumundu namundu ta, habula emboola kano kho mbu muhonibwe. 35#Sira 48:1Yohana yali shinga itaha eyakhanga niyikhosia obulafu, nenywe mwafuchilila nimwikhoya khulwa obulafubwe tsinyanga tsindutu. 36Nebutswa obuloli bwekhola khwisie omwene, bushila obuloli obwa Yohana yarumbula. Okhuba emilimo chiekholanga, nechia Papa yambelesia okhukhola. Emilimo tsana chino chimurumbulilanga mushilenje shianje khandi chimumanyisinjia mbu, Papa niye owaruma. 37#Mat. 3:17; Mrk. 1:11; Luka 3:22Ne khandi Papa, mweneyo, ahaananga obuloli khwisie. Inywe mushili okhuhulilakhwo omwoyokwe, kata okhulolakhwo likondolie tawe, 38kata shimubikhanga likhuwalie mumioyo chienywe ta, okhuba shimusuubilanga owa yaruma oyo tawe. 39#Bar. 4:1Murunilisinjia mumahandiko, shichila mupaaranga mbu, nimwo omwa mulanyola obulamu obulahwaho ta. Ne Amahandiko katsana ako niko akarumbulanga obuloli khwisie! 40Nebutswa inywe shimwenyanga okhwitsa khwisie kho mbu munyoole obulamu bwatoto tawe.
41“Isie shiekhabanga okhuhebwa oluyali nabandu tawe. 42Nebutswa emanyile mbu, shimuli nobuheeli khu Nyasaye mumioyo chienywe ta. 43Isie ndetsa nende obunyali bwa Papa, nebutswa inywe mwaloba okhunzinjisia. Ne kata kario, oundi naba niyakhetsa nobunyalibwe omwene, ne omwene oyo mumufuchilila. 44Inywe mwachama okhufuchilila oluyali olurula khubashienywe, nebutswa shimukhabanga okhunyoola oluyali okhurula khu Nyasaye ouli niye mulala yenyene ta; kho mwakhanyala murie okhusuubila isie? 45Kho mulapaara mbu, isie ndalamwinjilila itookho khu Papa tawe. Musa niye oulamwinjilila shichila niye owamwasuubila. 46Okhuba nimwakhabele mbu mwasuubila Musa, mwakhasuubile isie siesi, shichila akayahandika kaboolanga khwisie. 47Nebutswa olwa mulasuubilanga akayahandika ta, mwakhasuubila murie amakhuwa aka emboola?”
Atualmente selecionado:
YOHANA 5: OLUDC
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão