Johan 7
7
Zingsuv Uvnu Zaw Zang Lina Kaw
1Cakhutaata Zingsuv ca Galilee pe chung kha a tlaw. Judah uvthyi tie ta ama kha ama thie khing nakawta Judea pe ca tlaw khing vyi. 2Judah ming Thluodaa Pyi kha aa ngie tli. 3Cacuonakawta a nuta zaw ta Zingsuv ca, “Na hmang tuepa hing caa ziytuv tie ta ama hmung riypata hingpa taahingta pya la Judea pe luo si tie. 4Cawsaa ta na pachang yi se tapa a khingpa taca hmang kha a paruvta tah tue vayi. Hingpa hmang hing na tuepa a cuo kieca chuelyi hing a pahmung sa thluo tie!” ama ta. 5(A uvnu zaw tahmuo ama kha zang vayi.) 6Zingsuv ta, “I cuo tling valie. Niema cuota ca cuo bangkhuo hing nama cuota na a cuo thluo. 7Niema ca chuelyi hingta ca hue khu vayi, cuorasala kama ca ina hue, tahematapakieca a hmang tuepa a pha li nakaw kha i ri pari nakawta a cuo. 8Niema kha pyi luo ca cakuo tie ung. Kama ca cakuo'a va ang, i cuo tling valie,” 9ta yite Galilee lie kha a aw thluo.
Thluodaa Pyi Luo Zingsuv A Vaa
10A nuta zaw pyi luo ama cakuo khu taata Zingsuv zaw a cakuo ra; cadyiseca a luohuo ta cuo li pata a paruv ta tah a cakuo ra pata a cuo. 11Pyi chunglie ca Judah uvthyi tie ta huv yite, “Khaapaliema a aw'a e?” tapata ama hiehriy. 12Cawsaazaapuv ta a kaw kha ri yite amaa cie. Chekha ta, “Ama ca cawsaa phapa tana a cuo,” ta yite chekha ta, “Cuo vyi, cawsaa a sikhyichiepa tana a cuo,” ama ta. 13Cuorasala Judah ming kha ama ciy nakawta ahungtahmuo a luohuo ta a kaw ri vayi.
14Capa pyi khingkhuo hraw taakhata Zingsuv ca Biena-ing chung luo kha va kie te pacuv hruo a thu. 15Judah ming ca ama kharue haasa te, “Caa hmuo a caw buo li pata tuokhaama hing tluv nanaa hingta a the khu,” ama ta. 16Zingsuv ta, “I ca pacuvpa yi hing kama'a taata cuo vyi, naa pathlietuv'a taata na a cuo. 17Khazing khingna tue a khingpa bangkhuo taca i pacuvna hing Khazing'a taata ma a cuo kama khingna ta i pacuvpa ma tapa kha ama pachang aa. 18Ama khingna haata dyi bie a ripa ca ama rungnaana dyi a huvpa cuote cuorasala ama a pathliepa huota rungnaana a huvpa ca aa dangpa ta a cuo, a chunglie hanghiena aw vyi.
19Moses ta phungbie ca pi vayi ma? Cuorasala ahungtahmuo ziy va ungciy. Khaapanakawma ina thie khing ungciy?” a ta yi. 20Cawsaazaapuv khata, “Khuevuo na na hnyi! Ahungma thie acaa nang?” ama ta. 21Zingsuv ta, “Kharuehaa hmang suokha tue ang te nama bangkhuo ta nama kharue a haa. 22Moses ta vangdaw te riypata bie ca pi yite (a pathutuv ca Moses cuo li pata mingpa tie zaw khatana ama cuo) Sabbath ning ta cawsaa kha vangdaw nama te. 23Moses phungbie para li riypata cawsaa pakha kha Sabbath ning ta vangdaw nama te kieca khaapanakawma Sabbath ning ta cawsaa kha tluotlingsa pata i patluo sa tiyta i cunglie nama hi a haa? 24Le luo cuona dyi mangpa ta bie chi kha ung, biedangpa tuv kha mang ungla bie chi tie ung,” a ta yi.
Khrih Ta A Cuo Ma?
25Jerusalem khy ming chekha ta, “Thie amaa nangpapaa ca ama hing cuo vama?” amaa ta. 26Mang tie ung! a luohuo ta bie ri te khaahmuo ta hyi tlung vade yi. Messiah#7:26 Or Khrih tana a cuo tapa kha uvtuv tie ta ama pachang tli nakawta a cuo'a ma? 27Cuorasala hingpapaa hing khaapa taata ma aa vaw tapa kha ma pachang. Cadyiseca Messiah aa vaw thueta ca ahungtahmuo khaapa taata ma aa vaw tapa kha pachang'a vayi,” ama ta. 28Zingsuv ta Biena-ing chunglie a pacuv nguoluo pata khuopuv ta khi te, “Niema ta kama kha na pachang ung cate khaapa taata ma i vaw tapa zaw kha nama pachang. Kama ri ta a vaw va ang. Cuorasala naa pathlietuv hing zangtluo a tla hrahringpa a cuo. Niema ca pachang va ungciy, 29cuorasala kama ca i pachang, tahematapakieca ama ta na pathlie te ama'a taata a vawpa i cuo,” a ta yi. 30Catiyta iema ta patuv amaa ting, cuorasala ahungtahmuo patuv vayi, tahematapakieca a cuo kha tling valie. 31Cawsaazaapuv chung taata a hluvpuv ta zang yite, “Messiah aa vaw thueta hingpapaa a tuepa laa hing ta kharuehaa hmang a hluv vie a tue'a ma?” ama ta.
Zingsuv Patuv Riypata Cawsaa Ama Pathlie
32Cawsaazaapuv ta cahaa cata a paruvta tah a kaw ama ri pakha Farasi tie ta ama thyi tiyta, tluobyilepa tie hneta Zingsuv patuv riypata biena-ing a huopa paliy tie kha ama pathlie. 33Zingsuv ta, “Niema'a lie cuo pachangta chung aw'a ang te naa pathlietuvpa'a luo i si aa. 34Ina huv'a ungciy, cuorasala na hmung'a va ungciy, i awna luo zaw kha a vaw khu'a va ungciy,” a ta. 35Judah ming ca pakha hne pakha kha, “Ima hmung khu li riypata khaapa luo ma vaa a ting? A chepatlaapa Grik ming'a luo si pata va pacuv a ting kanaa? 36Na huv'a ung cate na hmung'a va ungciy, i awna luo zaw a vaw khu'a va ungciy,” a tapa a ri khingpa hing khaapatama a cuo aa? amaa ta.
Hringna Cavaa
37Pyi chuoningpa hne a biepuvcepa ning ningta kha Zingsuv ca a daa te, khuopuv ta khi te, “A tiy a hriepa ahunghmuo kama'a luo a vaw ungla 38vya dang se. Caapathepa ta a ripa haata, ‘Kama naa zangpa bangkhuo ca a palung chung taata hringna tiy kha cavaa haata a lang aa,’” a ta 39Zingsuv ta hinghaahingta a ri tiyta, ama a zangtuv zaw ta ama hmung riypa Thlaapa kaw kha a ripa a cuo. Capa cuo ning ca Thlaapa kha pipa ta cuo valie yi, tahematapakieca Zingsuv kha rungnaana hne pathupa cuo valie.
Cawsaa Amaa Che
40A ripa kha ama thyi tiyta Cawsaazaapuv chung taa chekha ta, “Hingpapaa hing Profet ta a cuo hrahring,” ama ta. 41Chekha ta, “Messiah tana a cuo,” ama ta. Cuorasala chekha ta, “Messiah ca Galilee taata aa vaw riypa cuo vyi! 42Caapathepa ta Messiah ca David ciypathla cuo'a te David awna khy Bethlehem taata na a cuo aa, a ta pakha,” ama ta. 43Cacuonakawta cawsaazaapuv ca Zingsuv kawlie amaa che. 44Chekha ta ama patuv khing, cuorasala ahungtahmuo patuv hmisi vayi.
Judah Uvthyi Tie Zang Lina
45Biena-ing a huopa paliy tie ama vya kaa tiyta tluobyilepa tie hne Farasi tie ta, “Khaapanakawma nama patuv va?” ama ta. 46Paliy tie ta, “Ahungtahmuo hingpapaa haahingta bie ri buo vayi,” ama ta. 47Farasi tie ta, “Aca dung ra tli yi ing. 48Ma uvthyi tie hne Farasi tie pakha chuo ta ama zangpa nama pachang ma? 49Cuorasala hingpa cawsaazaapuv, Moses phungbie a pachang lipa tie hing ca Khazing chiesapa tana ama cuo! ama ta. 50Iema hrawlie pakha ta cuote, a hluo ta Zingsuv'a luo a vawbuopa paa, Nikodemu ama ta papaa ta iema kha, 51“Ma phungbie taca, ahunghmuota a tuepa pachang riypata a bie naathliepa taa hluo taca biechina tue vyi cuo vama?” a ta yi. 52Iema ta, “Nama zaw Galilee taata cuo ra kanaa ciy? Caapathepa kha va ri la, Galilee taata profet pakha hmuo pya buo vyi tapa kha na hmung aa,” ama ta. [53Cakhutaata cawsaa bangkhuo ca ama ing luo kha ama kaa diy.
Atualmente selecionado:
Johan 7: LNT1
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
New Testament in Chin Lautu © Bible Society of Myanmar, 2015.