Johan 5
5
Zingsuv Ta Sabbath Ning A Pasapa A Patluo Sa
1Cakhutaata Zingsuv ca Jerusalem lie Judah biena luo pyi suokha aw te a vaa.
2Jerusalem khy, tuv thlake ama tapa kielie Hebru ryi ta Beth-zatha#5:2 Hluo vie caa-uv lieca Bethesda tapata cuosechekha lieca Bethsaida tapata zaw a aw. ama tapa tiy-ang suokha aw te a kie lieta thluodaa suopangaa a aw. 3Capa thluodaa chunglie ca, mingcuepa, a phyi cabiepa, a pakyapa tapata a tluo lipa a hluvsa ama laa patlaw. 4(A cuocuo ta Abyipa avuoming kha za cung te tiy kha a za catlu taw. Cahaa cata tiy aa catlu pahne tiy chung luo aa thaw taapa ca ama pasana taata ama tluo. Caacuonakawta a pasapa tie ca tiy a catlu riypa kha ama huo.)#5:4 Hluo vie caa-uv chekha lierina tluo 4 hing aw vyi. 5Capa lieca kung sawthung kung cari a pasa tlipa capaa pakha a aw. 6Zingsuv ta capa lie a zie nguoluopa kha hmung te kha cuo kungnung a pasa tlipa kha a pachang nakawta, “Na tluo khing ma?” a ta. 7A pasapapaa cata, “Abyipa, tiy a vya catlupa hne tiyliy chung luo naa naw riypa hnyi va laa ang te cung naase ang i ta pahne ta a hrangpa pakhakha ta i naa naw chuv lawmaw yi,” a ta. 8Zingsuv ta, “Thu la na pangphaa kha a la la cakuo tie,” a ta. 9Cawsaapapaa ca sungkha ta tluo te a pangphaa kha la te a cakuo.
Capa ning ca Sabbath ning ta a cuo. 10Cacuonakawta Judah uvthyi tie ta tluona a hmungpapaa ca, “Ata ning hing Sabbath ning ta cuote na pangphaa naa puvlepa hing ma phung na a thlu,” ama ta. 11Ama ta, “Naa patluo sa papaa na na pangphaa kha a la lah cakuo tie, naa ta,” a ta. 12Iema ta, “Na pangphaa kha a la lah cakuo tie caa tapa ca ahungma?” ama ta. 13Cuorasala tluona a hmungpapaa ta pachang vyi, tahematapakieca capa lieca cawsaazaapuv kha aw yite Zingsuv ca dya a zuvpathla tli. 14Cakhutaata Zingsuv ta khapapaa kha Biena-ing lie hmung te, “Mang tie, patluo sapa na cuo tli hing; na cunglie a ruv viepa a tlung li riypata suena tue vie khatie lie ciy,” a ta. 15Cawsaapapaa ca pya te Judah ming kyihuo khata a patluo sa papaa ca Zingsuv ta a cuopa kha a va chang yi. 16Sabbath ning ta cahaapa hmang a tue nakawta Judah ming ta Zingsuv ca a du hruo ama pathaa. 17Zingsuv ta, “I Paa ca ata te hingta re a hrie nguoluo kalie, cacuonakawta kama zaw i hrie ra,” a ta yi. 18Sabbath ning a parapa dyi cuo li pata Khazing kha i Paa tana a cuo a ta nakawta Khazing hne tana aa pakhing ta yite, Judah uvthyi tie ca ama thie riypa khata luo ama huv hryly.
Saacapaa Nawhnyina
19Cacuonakawta Zingsuv ta iema kha, “Biehmisi tana ica chang yi: Saacapaa hing ama ta tah khaahmuo tue khu vyi; a paa ta a tuepa a hmungpa dyi khana a tue. Paa ta a tuepa haa khatana Saacapaa ta a tue ra. 20Paa ta Saacapaa ca due te a tuepa bangkhuo kha a pahmung sa. Nama nang a uo sa riypata hingpa laa hing ta tue riypa a le viepa kha a pahmung sa kalie aa. 21Paa ta a thiypa pathu sa te hringna a pipa haata Saacapaa zaw ta a khingpa kha hringna a pi ra yi. 22Paa ta ahung hing hmuo bie ripa vayi, cuorasala Saacapaa kha bie ripa khuna naw a pi. 23Cacuonakawta Paa a pa-uvsathyipa bangkhuo ta Saacapaa kha ama pa-uvsathyi ra aa. Ahunghmuo cuose Saacapaa a pa-uvsathyi lipa ca a pathlietuv Paa a pa-uvsathyi lipa tana a cuo. 24Biehmisi tana ica chang yi: i bie thyi te naa pathlietuv a zangpa ca chuozaa hringna a hnyi. Bieripana ang'a vyi; cuorasala thiyna taata hringna luo a caluo tli.
25Biehmisi tana ica chang yi: Athiypa tie ta Khazing Saacapaa ueryi thyi'a yite, a thyipa bangkhuo ta hringna ama hmungna cuo kha a vaw'a te ata zaw hing a vya tlung nguoluo tli. 26Paa ta ama hrahring chunglie hringna a hnyipa haata Saacapaa zaw hing ama hrahring chunglie hringna hnyi riypata naw a pi. 27Cakhutaa ta ama ca Cawsaa Saacapaa a cuo nakawta bieripana naw kha a pi. 28Hingpa kawlie hing nama nang uo kha se; a thiypa bangkhuo ta a ueryi kha thyi'a yite ama thluo taata ama kya thuna cuo ca a vaw nguoluo tli; 29hmangpha a tuepa tie ca hringna luo thupakhaa'a yite; hmangpha lipa a tuepa tie ca suebie ripana luo ama thupakhaa aa,” a ta.
Zingsuv Cuota Pachangkhyituv Tie
30Kama se ta khaapahmuo tue khu va ang. I thyipa haa dyi tana bie i ripa yi; cacuonakawta i bieripana ca aa dang, tahematapakieca kama khingna haata tue lipa angta naa pathlietuv khingna haata i tue nakawta a cuo.
31Kama ta kama kaw kha i ri kieca i ripa ca a hmuo'a vyi. 32Cuorasala kama cuopa ta i kaw naa rituv pakha aw te kama kaw a ripa kha a hmuo tapata i pachang. 33Niema ta Johan'a luo kha biephyatuv pathlie ung cate biehmisipa kha a ri. 34Khahaapa pachangkhyituv cawsaa i hu nakawta cuo vyi; khuona nama hmung thena riypata i ripa tana a cuo. 35Johan ca ie te a khepa myi-ing haatana a cuo; cuo pachangta chung kha a khena lie a nuopa nama khing. 36Cuorasala kama ca Johan laata a le viepa tehtekhuo riypa na i hnyi. I Paa ta palang riypata ina pipa re hingta kama cuota tehte khuo te i Paa ta pathliepa i cuopa kha a paluo sa. 37Cakhutaata naa pathlietuv i Paa hrahring ta kama cuopa ta tehte a khuo. A ueryi thyi buo va ungciy, a hmingsuo zaw hmung buo va ungciy, 38cakhutaata a bie ripa zaw nama palung chunglie pari va ungciy, tahematapakieca a pathliepa hing nama zang li nakawta a cuo.
39Niema ta Caapathepa chunglie nama huv, tahematapakieca capa chunglie ca chuozaa hringna kha ma hmung thlu'a mang tapata nama rue. Hingpa Caapathepa hing kama kaw a ripa tana a cuo! 40Cuorasala hringna hmung riypata kama'a luo kha a vaw khing hyi va ungciy. 41“Cawsaapa'a taata rungnaana kha cuhluo va ang. 42Nama chunglie Khazing duena nama hnyi lipa kha ica pachang yi. 43I Paa nawhnyina hneta i zuv raalaa pata na cuhluo va ungciy; cuorasala cawsaa pakhakha ama nawhnyina hneta a vaw kieca nama za cuhluo hyi tlung aa. 44Niema ca pakha hne pakha cung taata rungnaana kha a cuhluo ung cate Khazing'a taata rungnaana kha nama huv li kieca tuokhaatama kama ca ina zang khu'a ungciy? 45Kama hing i Paa hmielie sue malie a phawtuv tana a cuo aa tapata na rue kha ung. A cunglie a nguopuona nama hnyipa Moses hingna sue caa phawtuv riypa yita a cuo. 46Moses hing nama zang kieca kama zaw hing ina zang raa ungciy, tahematapakieca ama ca kama kaw kha muo a cape ta. 47Cuorasala a capepa kha nama zang li kieca i ripa ca tuokhaatama nama zang the aa?” a ta yi.
Atualmente selecionado:
Johan 5: LNT1
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
New Testament in Chin Lautu © Bible Society of Myanmar, 2015.