Johan 3
3
Zingsuv Hne Nikodemu
1Judah ming uvthyi pakha, Nikodemu ama tapa za aw te; ama ca Farasipa ta a cuo. 2Zuokha ca Zingsuv'a luo kha vaa te, “Rabbi, nama ca Khazing'a taata a zuvpa pacuvtuv na cuo tapa kha ma pachang. Khazing ta a aw puo li kie yi ca, kharuehaa hmang na tuepa zaw hing ahungtahmuo tue khu'a vayi,” a ta. 3Zingsuv ta, “Biehmisi tana ica chang: ahunghmuota cung luo taata papuvsapathiypa a cuo li kieca Khazing Pena kha hmung khu'a vyi,” a ta. 4Nikodemu ta, “Tuokhaatama uvthyita pakha ca a puvpathiy khu aa? A nung riy chung luo a ngie pakhaa pata yihning puvpathiypa ca a cuo khu'a ma?” a ta. 5Zingsuv ta, Biehmisi tana ica chang: ahunghmuota tiy hne Thlaapa ta papuvsapathiypa a cuo li kieca Khazing Pena chung luo ca a ngie khu'a vyi. 6Saapa ta sapa ca saapa cuote, Thlaapa ta sapa ca thlaapa ta a cuo.#3:6 Thliy hne thlaapahing Grik biesuo lieca aa lu. 7‘Cung luo taata papuvsapathiypa nama cuo hrahring na a hu,’ ica ta nakaw yi ta nama kharue haa kha se. 8Thliy ca a khingna luo na a hruo; a pu ca na thyi, cuorasala khaapa taata a vaw tema khaapa luo a si tapa kha pachang vaciy. Thlaapa ta sapa a cuopa ca cahaacatana ama cuo ra,” a ta. 9Nikodemu ta, “Tuokhaatama capa ca a cuo khu aa?” a ta. 10Zingsuv ta, “Nama ca Israel ming pacuvtuv saya na cuo pata ama hing hmuo pachang va cama? a ta.
11Biehmisi tana ica chang: kiema ca ma pachangpa kha tehtekhuo pate ma hmungpa kha ma pathyi sa, cuorasala ahungtahmuo ma tehtekhuopa kha cuhluo khing va ungciy. 12Hingpa alyi hmang kaw ica changpa yi hmuo nama zang li kieca tuokhaatama vuoruo hmang kaw ica chang tiy yi ta nama zang khu the aa? 13Vuoruo taata zaa cungpa Cawsaa Saacapaa ri li pata ahunghmuota vuoruo luo a kiepa aw buo vayi,” a ta. 14Moses ta ruochung lie, atung cunglie daa pariy a taa pahaata, Cawsaa Saacapaa ca taa pata a cuo aa; 15cahaa cata ama a zangpa bangkhuo ca chuozaa hringna ama hmung aa.
16Khazing ta chuelyi hing a due hringhruo nakawta a hnyi tlakuopa a Saacapaa kha a pi, cacuonakaw ta ama a zangpa bangkhuo ca thiy'a vayi, chuozaa hringna ama hnyi aa.
17Tahematapakieca Khazing ta a Saacapaa kha chuelyi luo hing chuelyi bie ri riypata za pathlie vyi, chuelyi khuo riypatana a za pathlie. 18“Ama a zangpa ca suebieripana ang'a vyi, cuorasala a zang lipa ca suebieripana a ang tli, tahematapakieca Khazing ta a hnyi tlakuopa a Saacapaa ming kha a zang li nakawta a cuo. 19Bieripana tapa ca hinghaahingtana a cuo: khena ca chuelyi luo hing a vya chiy tli; cuorasala cawsaa ta khena laata zingna kha ama khing vie, tahematapakieca ama tuepa kha hmangpha lipa ta a cuo nakawta a cuo. 20Hmang pha lipa a tuepa bangkhuo ca khena kha hue yite khena luo a vaw khing vayi, tahematapakieca hmang pha lipa ama tuepa kha aa luo riypa khing vayi. 21Cuorasala aa hmuopa a tuepa ca khena luo kha a vaw te a tuepa ca Khazing khingna haatana a cuo tapa kha khena ta a siesa pata a paluo sa,” a ta.
Zingsuv Hne Tiynawtuv Johan
22Cakhutaacata Zingsuv hne ziytuv tie ca Judea pe khyta luo kha si yite iema'a lieca cuokha chung aw te tiynawna zaw a pi yi. 23Johan zaw ta Aenon ama tapa, Salim taata a hla li napa hmang lie kha tiynawna a pi ra yi, tahematapakieca capa hmang lieca tiy a hluvsa a aw. Cawsaa ca ama'a luo kha a vaw yite tiynawna kha a pi yi. 24Hingpa hing Johan thaw a tla hluo ta a cuopa hmang tana a cuo.
25Johan a ziytuv chekha zaw ca Judah ming pakha hneta a pathe sana kawlieta bie amaa i. 26Cacuonakaw Johan'a luo kha a vaw yite, “Rabbi, Jordan cavaa huesuo lie nama hne zaa aw papaa, a kawluo tehte na khuopapaa khata tiynawna pi nguoluo te cawsaa bangkhuo ta ama'a luo ama vaa nguoluo,” ama ta. 27Johan ta, Vuoruo taata pipa a cuo li kieca ahungtahmuo khaapahmuo hnyi khu'a vayi. 28Kama pangphie ta, ‘Kama ca Messiah#3:28 Or Khrih ta cuo va ang, a hmie luota vya pathlie lupa tana i cuo,’ i tapa kha a thyipa ca niema tana nama cuo. 29Chiyhiepa lesaanung a hnyipa ca a chiyhietuv satliepa tana a cuo. Nungchiytuv satliepa a thaa lie a daa te a ueryi a thyipa a daakhyituv a viesaapa ca khuopuv ta a palung a tluo. Capacana i palungtluona a kyna ta a cuo. 30Ama ca lethaw'a te, kama ca i cungbung aa,” a ta.
Vuoruo Taata Azaa Cungpapaa
31A cung taata a zaa cungpapaa ca a hrangpa bangkhuo laata a le vie. Alyi taata a vawpa ca alyi hmang kaw kha a ri. Vuoruo taata a zuvpa ca hmangting bangkhuo cunglie tana a aw. 32Ama ta a hmungpa hne a thyipa kha tehte a khuo raalaa pata ahungtahmuo a tehte khuopa kha cuhluo vayi. 33A tehte khuopa kha a cuhluopa ca Khazing ca a hmisipa tana a cuo tapa khana a pacu sa. 34Khazing ta a pathliepa ca a Thlaapa kha tluotling pata a pi nakawta Khazing bie kha a ri. 35Paa ta a Saacapaa kha due te hmangting bangkhuo kha a kuv cung luo a pi diy. 36Saacapaa a zangpa bangkhuo ca chuozaa hringna ama hnyi, Saacapaa ri a ngie lipa bangkhuo ca hringna hmung'a vayi, Khazing hihaana na ama ang aa.
Atualmente selecionado:
Johan 3: LNT1
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
New Testament in Chin Lautu © Bible Society of Myanmar, 2015.