Logótipo YouVersion
Ícone de pesquisa

Lucuotuv 19

19
Efesa Khy Lie Paul
1Korin lie Apolos a aw ning kha Paul ca capa ruochung kha tlaw te Efesa luo a chiy. Capa lieca zangtuv chekha kha va hmung yite, 2“Zangtuv cuo tli ung cate, Thlaapa Pathe kha nama ting ma?” a ta yi. Iema ta, “Ting va puv, Thlaapa Pathe a aw tapa hmuo thyi buo va puv,” ama ta. 3Cakhutaacata ama ta, “Cacuokie, tuokhaapa tiynawna ma nama ang?” a ta yi. Iema ta, “Johan tiynawna,” ama ta. 4Paul ta, “Johan tiynawna ca sue a ngiepachiynapa tiynawna tana a cuo. Ama hnang taata a vaw riypapaa Zingsuv ama zang riypatana cawsaa kha a chang yi,” a ta. 5Capaca ama thyi tiyta Zingsuv ming ta tiy amaa naw. 6Paul ta ama cunglie a kuv a khang tiyta, iema cung luo kha Thlaapa Pathe za cung te, thyiliparyi kha cyi yite Khazing bie zaw kha ama ri. 7Iema ca ama bangkhuo ta hlyihning hraw ama ta.
8Paul ca apungna-ing luo kha a ngie te Khazing pena kaw kha riephasa pata hne cawsaa ta ama thyi thesa riypata thlathung chung a ri. 9Cuorasala cawsaa chekha ca ama palung a khungsa te, zang khu lipa yi ta Phungluo kha cawsaa hmiekunglie ama rithuochi. Cacuonakaw Paul ta pya se yite, a ziytuv tie kha a chiyle yite Tirannas#19:9 Hluo vie caa-uv lieca capa Tyrannus lieca maw siymaluo hlyikha taata zuoluo siymaluo papaliy te a pacuv yi a ta bierina ing tapa chunglie kha ningting ta a pacuv yi. 10Cahaa cata kung hning chung pazue te Asia ruo chunglie a awpa Judah ming hne Grik ming bangkhuo ca Abyipa bie kha ama thyi diy.
Skeva Saacapaa Zaw
11Khazing ta ning hrang a aw buo lipa kharuehaa hmang kha Paul kuv ta a tue. 12A pavya hne a ruepaze kha hmuota a tluo lipa tie'a luo ama cyile tiyta, tluo yite thlaapa chiepa kha ama chung taata a pya. 13Hmangting ta a khielepa khachie a papyapa tie Judah ming khata thlaapa chiepa a hnyipa tie cunglie kha Abyipa Zingsuv ming kha hmuo yite, “Paul ta a ukhyipa Zingsuv ming tana ica papya,” ama ta 14Judah ming tluobyilepa Skeva saacapaa pasariy tie ta capaca ama tue. 15Cuorasala thlaapa chiepa ta, “Zingsuv i pachang, Paul zaw i pachang; cuorasala niema hing ahung zaw tama nama cuo?” a ta yi. 16Cakhutaata thlaapa chiepa a hnyipapaa cata a vya zuchiy yite tuv yite a te nakaw yi ta ama thiy ama hnie hne ama cahri pata ing taata amaa ruo. 17Capa bie ca Efesa lie a awpa Judah ming hne Grik ming bangkhuo ta ama thyi tiyta, ciysa yite Abyipa Zingsuv ming kha ama pathuosa. 18Zangtuv a vya cuopa a hluvpuv zaw khata ama za tue tawpa kha zaapuv hmielie ama phu. 19Pacuo a thepa tie zaw ta ama caa-uv kha pakhaw yite zaapuv hmielie myi ta ama rue. Capa caa-uv muo ca ama tue tiyta ngu tuokaa thaw sawngaa muo a ta. 20Cahaa cata Abyipa bie ca cahrana hne aa ze hryly.
Efesa Khy Lie Hnaahnawna
21Capa hmang bangkhuo a cuo khu taata, Paul ca Masidonia ruo hne Akhaia ruo kha cahrawpaale pata Jerusalem luo tlaw riypa aa ting. “Jerusalem i chiy khu taata Rom zaw i hmung hrahring aa hu,” a ta. 22Cacuonakawta ama a byatuv a cuopa Timote hne Erastas kha Masidonia luo pathlie yite ama ca Asia ruo lie kha cuo syi vie a hmuo.
23Hingpa hrawning hing Phungluo kawlieta hnaahnawna khuopuv ta a aw. 24Ngu a patle thepa Demetrias ama tapapaa ca Artemis khazingnung biena-ing zuvta kha ngu ta patle te capa re lie rehrietuv tie ca ama tuokaa hmungna luopuv a phasa. 25Ama ta a rehrietuv tie hne iema haapa re a hrie rapa tie kha kupakhaw yite, “Uvnu zaw, hing rehriena taahingta hnyirungna ma hmungpa ungca nama pachang. 26Niema zaw hmung ung cate nama pachangpa haata hingpa Paul hingta Efesa lie dyi cuo li pata Asia ruo bangkhuo lie a awpa cawsaa hluvpuv kha, cawsaa ta tuechawpa Khazing ca Khazing ta cuo vyi, tapata chang yite a pa zang sa diy tli yi. 27Cakhutaata ima sungpalina zaw mingchiena aa taw'apa dyi cuo li pata khazingnung Artemis biena-ing zaw hing a ling zue'a te, Asia ruo bangkhuo hne chuelyi puv ta ama biepa a lesyina zaw hing a cungbung aa,” a ta yi.
28Ca bie ca ama thyi tiyta ama hihaa te, “Efesa lie a awpa Artemis ca a lesyice!” tapata khuopuv ta ama u. 29Khy chunglie ca cahaa cata khi-una ta a bi; cawsaa ta Paul khytlawhnepa Masidonia ming Gaius hne Aristarkas kha a vya dale yite pyi mangna ing luo kha ama vya chiykhyi. 30Paul ca ama pangpa ta cawsaazaapuv hmie luo pya riypa kha a khing, cuorasala zangtuv tie ta ama thlu. 31A viesaa ta a cuopa Asia pe uvtuv chekha zaw ta pyi mangnapa ingchung luo hrahring a ngie li riypata bie ama vya taa. 32Capa cuo ning ca, chekha ta a phang hrang, a hrangpa chekha ta a phang hrang khata khi patlaw yite, hluv vie bangkhuo khata khaapanakawma hingpa luo hing maa vya hmya tapa hmuo pachang vayi. 33Judah ming ta Alekzandar kha hmie luo ama vya papya nakawta cawsaazaapuv chekha ta amapaa hingna hingpa hmang a chiykhyituv ta a cuo thlu'a mang ama ta. Alekzandar ta cawsaazaapuv ca a kuv pazuu te a padie sa khu taayita, ama a cuo lina kaw ri aa pachie. 34Cuorasala Judah ming a cuopa kha ama pachang tiyta, “Efesa lie a awpa Artemis ca a lesyice,” ta yite siymaluo pahning chung ama u. 35Cuorasala khy caziypa ta cawsaazaapuv ca padie sa yite, “Efesa khy ming, ahung hingma Efesa khypuv ca a lesyipa Artemis biena-ing hne vuoruo taata zaa tlapa ama hmingsuo kuvtuezuv a awnapa tana a cuo tapa a pachang lipa a aw ungciy? 36Capaca ahungtahmuo i khu'apa a cuo li nakawta a dieta tah nama aw riypa hne khuerue taa li pata hmang nama tue cakhaw riypata cuo vyi. 37Niema ta, ma biena-ing hmang zaw a paruv buo lipa hne ma#19:37 Hluo vie caa-uv lieca, ‘niema,’ a ta khazingnung thuopachina bie zaw a ri buo lipa hingpa cawsaa zaw hing hingpa hmang luo nama vya chiykhyi. 38Demetrias hne a rehriehne tie ta, ahung cunglie a cuo zaw ta, bie ama hnyi khing kieca bierina zung pahaw yite bieripatuv tie ama aw thluo. Capa lieca tazaa vaa cyi thluo yi se. 39Capa laa cata#19:39 Hluo vie caa-uv lieca hmang hrangpa kaw kha a ta nama pachang khing vie kieca khy ming bangkhuo a hmyana lie kha bie chi riypata a cuo. 40Ata ning a puvpa hmang kawlie hingta kiema hing hnaahnawnapa na nama chiykhyi tapata pasuena maa taw khu. Tahematapakieca hingpa hmang a cuona kaw hing a siesa pata ma ri khu riypa suokha hmuo aw vyi, a ta. 41Capa bie a ri khu taacata a hmyapa tie kha a padiy sa diy yi.

Atualmente selecionado:

Lucuotuv 19: LNT1

Destaque

Partilhar

Copiar

None

Quer salvar os seus destaques em todos os seus dispositivos? Faça o seu registo ou inicie sessão