Lucuotuv 17
17
Thesalonika Khy Ama Pha
1Paul hne Silas ca Amfipolis khy hne Apollonia khy kha vya capiepaa yite Thesalonika khy luo kha ama pha. Capa lieca Judah ming apungna-ing kha a aw. 2Paul ca a tue tawpa haakhata apungna-ing luo vaa te Sabbath ning ningthung chung bangkhuo iema hne khata Caapathepa bie lie'a pakha amaa i. 3Messiah ca ruvnaana a ang riypa hne thiy te a thupakhaa hrahring a hunapa kaw kha ri pasie te a paluo sa. “Kama ta ica chang nguoluopa yi hing capa Messiah,#17:3 Or Khrih Zingsuv catana a cuo,” a ta yi. 4Chekha ca ama palung sie te Paul hne Silas kha amaa hlaw, cahaa cata Khazing a biepa Grik ming hluvpuv hne canung uvthyi hluvpuv zaw kha amaa vya hlaw ra.
5Cuorasala Judah ming ta ihnyi yite chadawtluo lie a khie cakhawpa zyazaa pha lipa tie kha pahmya yite ama pakhipa-u sa nakawta khy chunglie kha hnaahnawna a puv. Paul hne Silas kha patuv pata zaapuv hmie luo chiykhyi riypata Jason ing kha ama va ching. 6Iema kha ama hmung li taata Jason hne zangtuv#17:6 Gk Uvnu zaw chekha kha khychung uvthyi tie'a luo kha a vya dale yite, “Chuelyi a palipathipa hing cawsaa zaw hing hingpa hmang luo hing vya chiy yite, 7Jason ta a ing lie aa patlung sa yi. Siepahruo hrangpa Zingsuv ama tapa na a aw, ta yite Rom siepahruo nawhnyina kha amaa du,” ama ta. 8Capaca ama thyi tiyta khychung uvtuv byi tie hne cawsaa zaw ca ama palung aatawaamuo sa. 9Jason hne a hrangpa tie'a taata biekuona tuokaa ama la khu taata ama pathlie.
Berea Khy Lie Paul Hne Silas
10Capa zuopa cata zangtuv tie ta Paul hne Silas kha Berea luo ama pasi sa. Ama chiy tiyta Judah ming apungna-ing luo kha ama cakuo. 11Berea khy lie Judah ming ca Thesalonika khy ming laa khata bie cuhluo ama the vie; cacuonakawta bie kha palung thusa pata naathlie yite a cuo ma cuo vama tapa kha che the riypata ningting ta Caapathepa kha ama mang. 12Iema hraw taata cawsaa hluvpuv kha vya zang yite pa-uvsathyi tluo aa tlapa Grik ming canung capaa a hluvpuv zaw ama vya zang ra. 13Cuorasala Thesalonika lie a awpa Judah ming ta Paul na Berea lie thuophaabie a phu e tapa kha ama thyi tiyta a vaw yite cawsaazaapuv kha hnaahnawna tue riypata ama pasu. 14Zangtuv tie ta sungkha ta Paul kha riyliy kie luo pathlie yite Silas hne Timote ca amaa ngaa siy. 15Paul a pathliepa tie ca Athens te kha va chiy ra yite, a cuo khuna chung ta Silas hne Timote kha naa vya hlaw paluo mang yi sala, tapata Paul ta bie a taa khu taayita ama kaa.
Athen Khy Lie Paul
16Paul ca Athen taata Silas hne Timote a huo nguoluo ning yi kha capa khy ca kuvtuezuv ta a bi pakha hmung te a palung rie a thyi khyisa. 17Cacuonakawta apungna-ing lie cuose, chadawtluo#17:17 Or Khypuv cawsaa zaw ahmyana hmang, Gk ta agora a ta. lie zaw kha cuose, Judah ming'a nata Khazing a zangpa Grik ming hneta a ningtating ta bie amaa i pari. 18Epikurian pacuvtuv chekha hne Stoik pacuvtuv chekha zaw hne khata amaa i. Chekha ta “Hingpa a pasingsa te a khicakhawpapaa hing khaapama a ri khing?” ama ta. A hrangpa tie ta, “Ruohrang ming khazing kaw na a ri thlu aa?” ama ta. (Cahaa cata ama tapa ca Zingsuv hne a thupakhaanapa kaw kha a ri nakawtana a cuo.) 19Cacuonakawta ama kha Areopagas ama tapa ahmyana hmang luo chiykhyi yite, “Na ri nguoluopa pacuvna thaapa kaw hingna ma pachang khing. 20Kiema cuota biethaapa cuote a ri khingna hingna ma pachang khing,” ama ta. 21Athens khy ming hne capa lie a awpa ruohrang ming ca ama cuo hnyipa bangkhuo kha biethaapa a changna hne naathliena ta ama hmuo diy.
22Cakhutaata Paul ca Areopagas lie a vya hmyapa tie hmiekunglie kha a daa te, “Athens khy ming, biena luota khatluv tama nama pakangpahaa tapa kha ica pachang yi. 23Khychung kha a khie ang te nama bienapa hmang kha i hmung tiyta, capa hraw taacata, “Ma pachang lipa khazing cuota,” tapata caa aa capepa bienatluophie kha i hmung. Kama ta niema'a lie i phupa hing capa nama pachang li pata namaa biepa kaw catana a cuo. 24Chuelyi hne a chunglie a awpa bangkhuo a satuv Khazing, alyi hne vuoruo Byi, cawsaa kuv ta sapa biena-ing chunglie a aw lipa tana a cuo. 25Khazing ca a hringpa bangkhuo kha hringna hne huv hne zezaw bangkhuo kha a pituv cuote, cawsaa ta a cuota tuepa riypa kha aa hupa suokha hmuo aw vyi. 26Cawsaa pakha chung taata mingphang bangkhuo kha sa te alyi lie kha khy a pasa sa yi. Kha cuo ma ama hring aa tapa hne ama awna riypa ruoriy zaw kha a thlipa pacie yi. 27Tahematapakieca iema ta, ama, Khazing kha huv'a yite ama hmung thena riypatana a cuo. Cadyiseca Khazing ca kiema pakha cyicuo hne hingta a hla vyi. 28Ama chunglie ma hring, cakuocavaa pate khy ma sa,’ ama tapa haata hne hlaa a phy thepa tie ta,
‘Kiema zaw hing ama samingsahlaa
tana ma cuo,’ ama tapa haa khatana a cuo.
29Cahaa cata kiema ca Khazing samingsahlaa ma cuo nakawta, a hringpa Khazing hing cawsaa kuvzung ta tuepa siyy a cuo li kie, ngu a cuo li kie, alung kuvtuezuv haata ri riypata cuo vyi. 30Khazing ta, cawsaa ta ama za pachang the lina cuo kha a hmung li hruo aa cuo raalaa pata, ata hing ca cawsaa bangkhuo kha ama hring pha lipa bangkhuo taata a ngiepachiy riypata bie a pi yi. 31Tahematapakieca aa tlaw ciepa paa thueta chuelyi hing a dangna ta bie ripa riypata ning a thli pacie tli. Cawsaa bangkhuo ta hingpa hmang hing a cuo tapa ama pachang riypata ama kha thiyna taata a pathu sa.” 32Thiyna taata thupakhaana kaw kha ama thyi tiyta, chekha ta ama pahnyisue; cuorasala chekha ta, “Hingpa kaw nama ripa hing naa na maca thlie pakhaa khing yi,” ama ta. 33Capa lie cata Paul ta a pya se yi. 34Cuorasala chekha ta ama kha vaa hlaw yite zangtuv ama vya cuo. Iema ca Areopagas lie abyi a cuopa Dionisias hne Damaris ama tapa canung pakha hne a hrangpa zaw khata ama cuo.
Atualmente selecionado:
Lucuotuv 17: LNT1
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
New Testament in Chin Lautu © Bible Society of Myanmar, 2015.