Lucuotuv 14
14
Ikonium Khy Lie Paul Hne Barnabas
1Cahaa ngiethie cata Paul hne Barnabas ca Ikonium khy Judah ming apungna-ing luo kha vaa yite ama ri tawpa haakhata khuopuv ta ama ri ca Judah ming hne Grik ming hluvpuv kha zangtuv ta ama vya cuo. 2Cuorasala a zang lipa Judah ming ta Jentail ming kha pasu yite zangtuv tie kha ama padu sa. 3Cacuonakawta lucuotuv tie ca capa lieca cuo syipuv aw yite Abyipa bie kha riephasa pata ama ri. Abyipa ta ama ripa thuophaabie pacusana ta pahmungsana hne kharuehaa hmang tue khuna kha a pi yi. 4Cuorasala capa khypuv lie a awpa tie ca a che yite, Judah ming kuo luo phuvkha, lucuotuv tie kuo luo phuvkha ta ama aw. 5Cakhutaata Jentail ming hne Judah ming ta iema uvtuv tie hne khata lucuotuv tie kha tuechie riypa hne alung ta vaa riypata ama raw. 6Lucuotuv tie ta capa kaw ca ama pachang tiyta Likaonia ruo khypuv ta a cuopa tie Listra khy, Derbe khy hne a cahriy khyta luo kha amaa ruo. 7Capa lieca thuophaabie phu kha ama pazue.
Listra hne Derbe Lie Paul hne Barnabas
8Aa puvkhyipa ta a phyi a cabie nakawta luo a cakuo buo lipapaa pakha ca Listra khy lie kha aw te, 9Paul ta a ripa bie kha naa a thlie. Paul ta tluo khuna riypa zangna na a hnyi tapa kha a hmung tiyta ama kha taapuo pata mang te, 10ue a suopuv ta, “Na phyi ta a dangta tah a daa tie,” a ta. Cawsaapapaa ca a kya daa te luo a cakuo. 11Paul ta a tuepa kha cawsaazaapuv ta ama hmung tiyta, Likaonian ryi ta khuopuv ta khi yite, “khazing tie na cawsaa hmingsuo ta a zaa cung yi,” ama ta. 12Barnabas kha Zeus khazing tana a cuo ta yite Paul kha bie a rituv a cuo nakaw ta Hermes khazing tana a cuo ama ta. 13Khy khungthing ta lie a biena-ing a awpa Zeus khazing tluobyipa ta cuetungpa hne paapaapa pachiy kha khy hukaa luo vya cyi te cawsaazaapuv hne khata iema kha hriykhungrina ta abie amaa nang. 14Lucuotuv Barnabas hne Paul ta capa kaw ca ama thyi tiyta ama caw kha thlaa yite, cawsaazaapuv hraw luo a ruo yite, 15“Viesaa zaw,#14:15 Gk Cawsaa zaw khaapa hmang ma tue namaa nang? Kiema zaw niema haata cawsaa cakhawpa tana ma cuo. Thuophaabie kha ca vya phya yi pate hingpa thlahnena a hnyi lipa hmang taahingta alyi hne avuo hne riyliy hne a chunglie a awpa bangkhuo a satuvpa a hringpa Khazing'a luo namaa pali riypata caa changtuv tana ma cuo. 16Hluoning ca Khazing ta mingphang bangkhuo kha ama khingpa luo ziy riypata luo a pa-aw yi. 17Cuorasala a tuepa hmangphapa ta ama a awpa kha a paluo sa pari: avuo taata khy pasaa sa te ama'a na a cuo ta kung a pavyi sa, sa ca pi yite nama palung aca patluo yi,” ta yite khuosa ta ama u. 18Hing tluv bie ama ri patahmuo hriykhungrina ta abie amaa nangpa kha ama thlu khu sungsiyta khiy tana a cuo.
19Cuorasala Antiok taa hne Ikonium taata Judah ming kha a vaw yite cawsaazaapuv kha iema kuo luo a daa riypata ama ripasa khu. Cakhutaata Paul kha alung ta vaa yite a thiy tli tapata ama rue nakawta khyle luo kha amaa dale. 20Cuorasala ziytuv tie ta ama cadung nguoluo ning kha Paul ca kya thu te khychung luo kha a vaa pakhaa. A mawluopa ta Barnabas hneta Derbe luo ama si.
Siria Ruo Antiok Khy Luo Ama Kaa pakhaa
21Paul hne Barnabas ca capa khy lieca thuophaabie kha chang yite ziytuv a hluvsa ama hmung. Cakhutaacata Listra, Ikonium hne Antiok luo kha ama vya kaa. 22Ziytuv tie kha zangna aa hmuopa chunglie a cusa pata ama aw riypata pasu yite, “Khazing pena chung luo a ngie riypata ca ruvnaana a hluvsa ma ang riypatana a cuo,” tapata thaazuo ama pi. 23Khrihsaabuv bangkhuo lie kha khrihsaa uvthyi tie ama chi khu taata ama zangpa Khazing'a luo kha sa uvna hne thlaachuona ta ama pi.
24Cakhutaata Pisidia ruo kha cahrawpaa yite Pamfilia ruo luo ama si. 25Perga lieta thuophaabie ama ri khu taata Attalia luo ama sibung. 26Capa hmang taacata Antiok luo kha tiypalaw ta ama kaa. Antiok khy ca atalawlie ama palangpa ama re hrie riypa hingta Khazing duena chung luo ama za pinapa hmang khatana a cuo. 27Capa khy luo ama chiy pahne ta zangtuv tie kha pahmya yite Khazing ta iema hmuo pata a hriepa bangkhuo hne tuokhaatama Khazing ta Jentail ming cuota zangna chiypakaa a pahawpa ra yi tapa kaw kha ama chang. 28Capa lieca zangtuv tie hne cuo syipuv ama aw pakhaw.
Atualmente selecionado:
Lucuotuv 14: LNT1
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
New Testament in Chin Lautu © Bible Society of Myanmar, 2015.