Gha ta Wəshi 6
6
Shala katare za sebe te mbeli
1Ma kwa ghate mbeli kambake geva kwele kwele te hɛɗi ba'a kwa yake ŋwalea kwɛ hɛ ne, 2pa ŋwale tezhilia Shala nakɛ kendeɗe ndeɗenji ŋwalea kwɛ nyi yake mbeli. Ntake hɛ kanta nyi ɗe hɛ kamale. 3Ma ke Mahwətə: «Mba sefəa mpi nya ndeke nda 'ya ke mbeli kanza mbe hɛ kaghala ghala we, kwa nza ŋkɛ ne, katempə hɛ te kwete veci. Katezhɛne hɛ kazlake va gwəmsə ba'a bakemsə teghweme we.» 4Ma mbe və shɛ ne, kweci hwelefefi kebebiya bebiyanji ya shɛ te hɛɗi, mba hɛ te hɛɗi nda se ŋwalea Shala kanza le ŋwalea kwɛa mbeli, nahe hɛ keyake ŋwale hwa hɛ. Ghenci ya kaka katsala kɛfi nyi vəashi, mbeli nyi nza zləvə te sləa nci.
5Ma newe ke Mahwətə ne, mbake yambake ndiremia mehele ta mbeli te hɛɗi. Keveci keveci nza hɛ le mene zəzə wəsə kwa ndiremi mbe wənəa nci. 6Ntake Mahwətə kazəzə yitea wa yitea wa pate mbeli ŋkɛ te hɛɗi, petefe wənəa ŋkɛ wepete geva. 7Ma ke: «'Ya kateza sebe te mbeli nyi pate 'ya te hɛɗi, wəshi keseɗa nyi jama jama keɗema nyi ɓɛhwɛ ɓɛhwɛ ba'a 'yɛ nyi kezlə yitea ghweme, kwa nza ŋkɛ kwele kwele zəzə 'ya kwa pate hɛ 'ya.» 8Ama nahe Nowɛ kekemave zlaɓa kwa kema ta Mahwətə.
Shala zəzəte kambele Nowɛ
9Wa nyi hwelefefia Nowɛ nyi:
Ma Nowɛ ne, kawəndə nya tiɗiɗi nya kedzeghwa le hweŋkwa ta ŋkɛ se ŋkɛ hwa mbeli nyi te vəa ŋkɛ. Hweŋkwa ta Shala yazelete ŋkɛ, 10ŋwale tezhili mahekene yake ŋkɛ: Sɛm, Sham ba'a Zhafɛt.
11Ama kambeli nyi kebeze beze se mbeli nyi te hɛɗi kwa ntsə ta Shala: nda mene berete nde mene geva te yayata ŋkwa. 12Newe ke Shala sha ŋkwa nya te hɛɗi ne, keda da ŋkɛ. Kwa nza ŋkɛ ne, nahe yayata wəndə kebezemte nza ta ŋkɛ te hɛɗi. 13Ma ke Shala sha Nowɛ: «Nahe 'ya ketarete kezha za sebe te mbeli. Kwa nza ŋkɛ ne, nahe hɛɗi kenza viɗi va mene berete. 'Ya kateza sebe te hɛ te hɛɗi. 14Baŋete nda kwambelə nya wəba yitea sheghwəa vɛ ke ghəa ŋa. Katemene cɛ na kwele kwele mbe ba'a katezleraɗe ŋkɛ na le ɗəkə mbe hwəa ŋkɛ ba'a pelɛ te wəmbəa ŋkɛ. 15Wa nya tsetse temene na: mɛtre gwəmsə ba'a mcɛfemsə nza biya ŋkɛ, mɛtre bakemsə mcɛfeghəmbe nza bezlea ŋkɛ ba'a mɛtre meŋe mcɛfeghəmbe nza dzeme ta ŋkɛ yitea ghweme. 16Katebaŋe wəsə na kənəa ghəa ŋkɛ, katetene ŋkwa na dzeyi yitea yɛ ghəa ŋkɛa shɛ gare slə yitea fegwele hwa'a mɛa ŋwalea dzeve. Katemene gelembe na mɛ laka bela kwetɛŋe. Ma kwetere wəmbəa ŋkɛ ne, katemene cɛ nyi mencikə mencikə na mahekene mbe. 17Ma 'ya le ŋa ɗa gɛ, katekele yɛmə nya wəba kase kezha za te yayata wəsə nya le mpi te hɛɗi. Pɛtɛ tempə wəshi nyi te hɛɗi. 18Ama katemene jikə geva 'ya le gha. Katedzembe kwambeləa shɛ na le male ta ŋa, ŋwale tezhilia ŋa ba'a ka makwashia ŋa. 19Katenta mama ta wəsə nya nza mpi hwe na bake nyi bake nyi, yɛ za le male kezha mbele mpia nci yitea gha. 20Tsagha mama ta 'yɛ, mama ta wəshi keseɗa nyi jama jama ba'a nyi kedzeghwa te hɛɗi, bake nyi bake nyi kase yitea gha kezha mbele mpia nci. 21Ma gha gɛ ne, ntave mama ta wəshi kezeme, katebete hɛ na te ŋa nci ŋkwa. Kawəshi kezeme ta ŋayɛ le wəshi keseɗa shɛhɛ tenza hɛ.» 22Tsagha Nowɛ menete. Pa ŋkɛ menete wəshi nyi gezete nda Shala tserame.
Atualmente selecionado:
Gha ta Wəshi 6: BEKDC12
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
La Bible en langue Kapsiki avec les livres deutérocanoniques © Alliance Biblique du Cameroun 2012.