Matiu 12
12
Avoan Hudaligi huri Gubwen̄ Mambuharai
(Mak 2.23-28; Luk 6.1-5)
1Ataguna n̄an kea Jisas mai non roron̄tai ram la sivi umwan koni vwate lol gubwen̄ sabat, gabe gubwen̄ mambuharai nora ira Jius. Take non roron̄tai maro mwa ḡasira. Haḡe ram bavora ram n̄ari koni ram ḡania. 2La mahavana ira Varise ram ḡitara, ram bevea aben Jisas be, “Gitae, nom roron̄tai ram lol salil Silo huri sabat, be gubwen̄in mambuharai.”
3Haḡe Jisas mwa bwaliura be, “Matu gim hav vasogo tehe huri hano Deved nu lolia, mahavana kea maira non atatu maro nu gasira? 4Kea mwa dalin̄oro alolon imwan God, haḡe kea mai non atatu ram ḡan bereti gabe ram dataroi ginia lalai God, take Silo visigai be rasav gan te bereti gea, haḡe ta ira tataroi n̄an mwa mahin̄ainia lalainira be rav gania. 5I mulei gim hav vasogo tehe Silo non Moses, be vataha gubwen̄ mambuharai ira tataroi la Imwa Tataro ram lol salil silo huri gubwen̄ mambuharai, itake ram hav vuroga te ginia? 6Nam bevea lalai kimiu, ginau teti abena nu marahi liu nin Imwa Tataro. 7Ravrava Sabuga mwa bevea be, ‘Inau nam hav doron tehe be giv gogonaiau gin tataroi tuntun, take gin tabeana.’ Be gim ilo didinigi binihiva gea, gisav vevegi te dum irahei ram hav vuroga tehe. 8Huri inau Nitun Atatu nam ratahigi ḡoro gubwen̄in mambuharai.”
Jisas mwa Barahu Atatu mai Lima Mate
(Mak 3.1-6; Luk 6.6-11)
9Jisas mwa derai ute kea, mwa bano vai la imwa tataro vwate. 10Ta aia atatu vwate limana nu mate. I mulei aia atatu rituai ram doron be rai vevegi Jisas huri ute vahala. Haḡe ram hudalinia be, “Kun hanigi mwa bahal nonda Silo be tav lol barahu lol gubwen̄ mambuharai sa sigai?”
11Haḡe Jisas mwa bwaliura be, “Si vora tuamiu vwate be bilan sipsip gaituvwa mwa hovi lol lul roro lol gubwen̄ mambuharai? Si hav lol te ron̄oe be men rav luae? 12Rahun atatu nu liu nin sipsip. Bwatuna higea nonda Silo mwa mahin̄ai be tav bului dum atatu lol gubwen̄ mambuharai.” 13Haḡe Jisas mwa bevea aben wani gea be, “Sogai lua limwamwa.”
Haḡe mwa sogai limana, i mwa davuha mulei kun vwate. 14Haḡe ira Varise ram ban dagai, i ram daritari be kun hanigi rai wehi Jisas.
Atat Gitalua non God
15Take Jisas mwa ron̄oe huria, mwa derai ute gea, mwa ban dagai. I sinombu ivusi ram huria. I mwa lol barahu ira harova duluai, 16i mwa bev daua lalainira be rasav seserainia te lalai atatu dodolua. 17Ginau geki mwa lol seserai avoana non atatun vevsera Aesaia be nu vevea tuai be:
18“God mwa bevea be, ‘Geki noḡu atatun rovoga, nam ḡita luae.
Nam dabe maragainia i nam samsamwara ginia.
Nav tau noḡu Vui Sabuga aluna,
i vi vev lua noḡu silo vevegi lalai sinombu duluai.
19Si hav vigaigai tehe, sage si hav ulo te amare.
Si hav av te lalavoa la hal masisivigi.
20Si hav lol te n̄andu ariu lete,
i si hav uv te bamate bulu be mwa abena be men mate.
Vi lol rovoga kolo nan kunia vai votu vavtutu vi rihumaragai.
21I sinombu duluai rav tau nora doronhohov aluna.”
Jisas i Vui Hantai
(Mak 3.20-30; Luk 11.14-23)
22Haḡe atatu rituai ram lai atatu vwate vai aben Jisas. Wani gea matagara i nu hav avo te dum, bwatuna vui hantai mwa bulusia. Haḡe Jisas mwa lolia mwa ḡita mulei ute i mwa avo dum. 23Sinombu ram dan̄an̄a, ram bevea be, “Kun hanigi? Wani uhu kea daga Nitun Deved.”
24La mahavana be ira Varise ram ron̄oe, ram bwaliua be, “Wani uhu mwa hora lua vui hantai n̄an bwatuna Belsibal ratahigi ḡoro ira vui hantai mwa lai muramura lalainia be vi lolia.”
25Haḡe Jisas mwa ilo nora binihiva, mwa bevea lalainira be, “Vanua vwate si haraborae sibona gi tatan̄an ivusi be men bwalo, si hav tu tehe. Haḡe be bwatutun vanua vwate sage imwa vwate si haraborae sibona gi tatan̄an ivusi be men bwalo, si hav tu te dum. 26Sa be Setan si hora lua Setan, kea mwa harabora muleinia sibona, i non ute si hav tu te dum. 27Be gim bevea be inau nam hora lua vui hantai gin muramura non Belsibal, kun hanigi huri nomiu atatu? Ram hora lua vui hantai hanigi? Nora lalaḡova mwa seserai luae be gim bahala n̄oton̄oto. 28Be inau nam hora lua vui hantai gin muramura non Vui Sabuga non God, mwa seserainia be God mwa rihumaragai nin ira non ivwalu be vi vora Ratahigi lavoa ḡorora atatu duluai.
29“Ihei si hav dalin̄oro te dum alolon imwan atat rihumaragai be men surai non viloḡoana, vai votu wani gea vi vauhi atat rihumaragai amua, haḡe gim siv sura dum.
30“Ihei tehe mwa hav vora te ata aluku, mwa ivwaluiau. I ihei tehe mwa hav bul te haragaituvwa maiau, mwa lus bisalsalainia niniau. 31Huri ute uhu, nam bevea lalai kimiu be hava vuro sa avoan hantai atatu ram buroga ginira, vi binihi kaburai dumwira. Take ihei mwa avo hantai alun Vui Sabuga, si hav vinihi te dum kaburainia. 32I mulei ihei tehe be mwa bev hantaiau Nitun Atatu, vi binihi kaburainia. I take ihei be mwa bev hantai Vui Sabuga, si hav vinihi te dum kaburainia, kekadogaha i vai tuai.
Giv Ilo Gai Alun Vwaina
(Luk 6.43-45)
33“Be gim doron vwaigai tavuha, giv riv gai tavuha. Be giv riv gai hahantai, giv lai vwaigai hantai. Bwatuna gai mwa iloana alun vwaina. 34Kimiu kun teltele! Kun hanigi giv vev ginau tavuha, be kimiu gin hantai? Bwatuna bwan̄o mwa bev lua ginau gabe lolona nu masiri ginia. 35Raumatan atatu mwa lai lua raumatan ginau nin raumatan ginau mwa lol ḡoḡora lol lolona i han̄oran atatu mwa lai lua han̄oran ginau nin han̄oran ginau mwa lol ḡoḡora lol lolona.
36“I nam bevea lalai kimiu kungeki be lol gubwen̄ vevegi vatahahei vi vev seserai duluai vataha avoan mamara be nu vevea. 37Huri vataha avoana duluai haḡea vi vevegi kimiu aluna, be vi vev luae be gon vavtutu sa gon vahala.”
Atatu Ram Hudali Dovon̄a nin Jisas
(Mak 8.11-12; Luk 11.29-32)
38Haḡe ira vagahin Silo rituai maira Varise ram av lua lalai Jisas, ram bevea be, “Vagahi, gam doron be kadogaha gov lol dovon̄a gaivua vwate lalai kamai be gamen gitae.”
39Take Jisas mwa bwaliura be, “Kimiu ata lol gubwen̄ garigi ira mwasin atat taltale, i God sigai alolomiu! Gim doron dovon̄a niniau. Take nasav lol te dovon̄a. Nomiu dovon̄a kea gabe atatun vevsera Jona nu lolia. 40Huri be Jona nu togo lol sibwen̄in ige gaivua gubwen̄ gaitolu, kunia inau Nitun Atatu nan togo gubwen̄ gaitolu lol ureure. 41Lol gubwen̄ vevegi atatu ata Ninive rav tu amare la lolmatamiu, i rai vevegi kimiu, bwatuna kera ran ron̄ toretore non Jona, ram binihileahi. Nam bevea lalai kimiu be ginau teti abemiu gaivua liu nin Jona! 42Lol gubwen̄ vevegi vavin lavoa ata la bwatun ureure vi tu amare i vi vevegi kimiu, bwatuna nu mai hautu maragai haltavalun ureure be men ron̄ silo vagahi mataisao non Solomon. Take nam bevea lalai kimiu be ginau teti abemiu gaivua liu nin Solomon!
Vui Hantai mwa Dabagilu
(Luk 11.24-26)
43“Mahavana vui hantai mwa mwalue nin atatu vwate, mwa lago dadaligi lol vanua vuroi, mwa hiḡe ute dolua be vi mambu aia. 44Be mwa hav habwe te dum tanona, kadogaha mwa bevea lol binihina sibona be, ‘A, nam siv vinihi dumwia, mwa du be nav tabagilu mulei vai la imwaḡu be nan mwalue ninia tuai.’ Haḡe mwa dabagilu mulei vai la imwana, mwa habwea be imwa gea mwa du vuroi n̄ano, nu melmelo i vataha ginau nu lolian dautau. 45Kadogaha mwa bano mwa mom hiḡe vui hantai gaibitu mulei be alen̄ara ran hantai liu ninia, ram mai bilin̄ai, ram hogon bamasiri imwa gea. Amua rahun atatu geki be vui hantai nu to alolona nu hantai. Take ataguna be kera gaibitu ram mom mai mulei, rahuna mwa hantai liu nin amua. Kunia mulei vi vora lalainira atat hantai ata lol gubwen̄ garigi.”
Ira Mwasin Havan Jisas
(Mak 3.31-35; Luk 8.19-21)
46Mahavana Jisas mwa avo radu mai sinombu, ratahina mai ira tuana ram bisirai. Ram du avare, ram hudaligi be rav avo maia. 47Haḡe tuara vwate ninira sinombu mwa bevea lalainia be, “Gita, ratahimwa maira tuamwa ram du avare, i ram doron be rav avo maigo.”
48Ta Jisas mwa bwaliura be, “Ihei ratahiku? Ihei be ira tuaku?” 49Haḡe mwa huhui lua non roron̄tai, mwa bevea be, “Gitae! Geki haḡea ratahiku i ira tuaku! 50Huri ihei be mwa lol dum doroniva non Tamaḡu mwa be dogo lol ute atamare, kea tuaku, hogosiku i ratahiku.”
Atualmente selecionado:
Matiu 12: HNB
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
Bible Society of the South Pacific