Matiu 10
10
Hala non Jisas Han̄vul Domwan Gairua
(Mak 3.13-19; Luk 6.12-16)
1Jisas mwa uloi non roron̄tai han̄vul domwan gairua vai abena, i mwa lai roron̄o lalainira be rav hora dagai vui hantai, i be rav lol barahu harova duluai. 2Geki ihan ira hala han̄vul domwan gairua: muana Saemon (mwa uloinia be Pita) i tuana Andru, Semes mai tuana Jon, ira nitun Sebedi, 3mulei Vilip mai Batolomiu, Tomas i Matiu, kea gabe harahara homu, Semes gabe nitun Alvius mai Tadias, 4Saemon ninira vatugigi gabe ram barihainira ata Rom, i Judas Iskariot, kea gabe nu sine Jisas.
Jisas mwa Hora Lua Ira Han̄vul Domwan Gairua
(Mak 6.7-13; Luk 9.1-6)
5Jisas mwa horara han̄vul domwan gairua mai avoana geki be, “Gisav vano tehe lol vanuan ira len̄len̄aga sa vanuara ata Samaria. 6Take giv vano vai lol sinombu ira Jius hurira gabe ram lago dadaligi kun sipsip gabe ram sala. 7Giv vano ba doretore be, ‘Mahavana mwa abena be Ute Lavoa atamare mwa sosori!’ 8Giv lol barahu ira harova, giv lol domare ira atatmate, giv lol melmeloinira lepa mwa dumwira, i giv hora dagai vui hantai. Roron̄o gim laia gi tabeana, giv lalaḡoinia gi tabeana. 9Gisav haḡo te vatan̄oga mai vatlegiga sage beni meto, lol nomiu tan̄an gaisaga. 10Gisav haḡo te tan̄a huri nomiu lagoana sage gairuan gaisagamiu sage sus mai gaisigomiu. Atatun rovoga vi lai lalainia havanau nu dadariha huria.
11“Mahavana be gim mai aben vanua vwate, giv dohi habwe atatu vwate nu dadariha be vi lai ḡoḡo dum kimiu, i giv togo maia vai votu be giv lin̄ ute gea. 12Mahavana be gim haroro lol imwa vwate, giv vevea be, ‘Tamwata abemiu.’ 13Be atatu la imwa gea ram laiḡoḡo kimiu, nomiu tamwata na togo alura. Sa be rasav lai te ḡoḡo kimiu, giv lai mulei nomiu tamwata. 14Mwandavuha atatu la imwa sage la vanua rituai rasav lai te ḡoḡo kimiu i rasav ron̄ te silomiu, kunia giv lol dovon̄a lalainira. Giv derai ute gea, giv darudaruai kaburai taniavun bwalagemiu. 15Nam bev mwasigi lalai kimiu be, lol gubwen̄ vevegi God vi gita hagav sinombu ata Sodom i Komora liu nin sinombu ata la bwatutun vanua gea.
Atatu Rav Lol Ḡagarasi Ira Atatun Jisas
(Mak 13.9-13; Luk 21.12-17)
16“Giv gitae! Nam hora kimiu kun sipsip vai alolora vwiriu turu. Giv mataisaoga kun teltele. Giv lago maḡemu kun manbona. 17Giv gitaḡoro, huri be atatu abena be rav vwirihi dum kimiu, i rav lai kimiu vai lol imwan harahara, i rai vivilis kimiu alolon nora imwa tataro. 18Rav lai kimiu vai aben ira ratahigi maira lalavoa huri silo vevegi bwatuna ihaku, be kimiu giv seserai mwasigi dum huri Roroi Tavuha lol matara i lolmatan ira len̄len̄aga. 19Batena be rav lai kimiu be rai vevegi kimiu, gisav matagu tehe huri havanau be giv vevea sage giv vev haninia. La mwasin mahavana, vi lai lalai kimiu havanau be giv vevea. 20Bwatuna avoana be giv vevea si hav vora te nomiu, take vi mai nin Vui Sabuga non Tamamiu gabe vi avo alolomiu.
21“Ira huhugaituvwa rav lin̄ mulei ira tuara huri mateana. Ira tama rav lin̄ ira nitura, ira naturigi rai van burigai tamara i ratahira ba lin̄ira huri mateana. 22Atatu duluai rai varihai kimiu bwatuna ihaku. Take irahei nin kimiu be rav tu wasi vai votu nogonana rav rahu. 23Batena be rai mwaloi kimiu la vanua vwate, giv vano ba hili la vanua dolua. Nam bev mwasigi lalai kimiu be gisav nogoi te nomiu rovoga lol vanua duluai Israel, ta inau Nitun Atatu nan tabagilu huba.
24“Roron̄tai nu hav liu te nin non vagahi, i turin rovoga nu hav liu te nin non ratahigi. 25Nu tavuha lalai roron̄tai be si dadariha mai non vagahi, i turin rovoga be si dadariha mai non ratahigi. Be vuigin imwa vi uloinia be Belsibal, ratahigi ḡorora vui hantai, kunia ata la imwana vi uloinira gin iha hantai liu!
Ira Atatun Jisas Rasav Matagun te Atatu
(Luk 12.2-7)
26“Gisav matagun te atatu. Huri be irahei gabe ram haḡoi ḡoro havanau tehe, vi vugeana vai lol ute melmelo. I irahei gabe ram dahuli ginau, vi maserasera. 27Ginau duluai uhu nam bevea abemiu lol ute bon̄i, ita giv vev muleinia lol ute ran maita. I ginau gim ron̄oe be nam bev dahulinia, giv vevurinia la ulun imwa. 28Gisav mataguinira tehe be rai wehi rebehimiu, ta rasav wehi te dum atmatemiu. Take giv mataguinia be kea vi wehi kaburai dum rebehimiu i atmatemiu vai lol gabi. 29Vi vol dum lagalaga gairua huri beni meto gaituvwa. Itake lagalaga vwate si hav hovi te dum vai lol tano, be Tamamiu si hav vinihia te be vara kunia. 30Kimiu duluai giv iloe be ilumiu duluai la bwatumiu nu vuluiana n̄oton̄oto. 31Gisav matagu tehe, bwatuna kimiu gin marahi liu nin lagalaga ivusi!
Ihei mwa Dabe sa mwa Barihai Jisas
(Luk 12.8-9)
32“Ihei tehe vi vev luae be kea noḡu atatu, inau mulei nav lol kunia lalainia aben Tamaḡu lol ute atamare. 33Kunia mulei ihei tehe mwa bevea lalai sinombu be kea mwa barihaiau, inau mulei nai varihainia aben Tamaḡu amare.
Tamwata Sigai, Take Bwaloana
(Luk 12.51-53)
34“Gisav vinihia tehe be inau nam mai be namen lol tamwata la ureure. Sigai, inau nam hav mai tehe be namen lol tamwata, take bwaloana. 35Nam mai be nav lol ira atamwani be rav ivwalui ira tamara, i ira vavine be rav ivwalui ira ratahira, i ira mambi be rav ivwalui ira sibira. 36Haḡe kunia muai ivwalu non atatu vi mai nin lolon imwana sibona.
Ihei Tehe be vi Huri Jisas, vi Lin̄ Rahuna Huria
(Luk 14.26-27)
37“Be ihei alolomiu mwa dabe maragai tamana sage ratahina ninia gabe mwa dabeau, wani gea mwa hav dadariha tehe be vi vora noḡu roron̄tai. Sa ihei mwa dabe maragai nituna ninia gabe mwa dabeau, wani mulei gea mwa hav dadariha tehe be vi vora noḡu roron̄tai. 38I ihei gabe mwa hav lai te lua non volovolo be vi huriau, wani mulei gea mwa hav dadariha tehe be vi vora noḡu roron̄tai. 39Ihei tehe be mwa sinsinei rahuna, rahuna vi vano ninia. Take ihei gabe mwa lin̄ rahuna huriau, vi habwe rahuana.
God vi Tavwera Atat Vavtutu
(Mak 9.41)
40“Ihei tehe be vi lai ḡoḡo kimiu, mwa lai ḡoḡoau. I ihei be mwa lai ḡoḡoau, mwa lai ḡoḡoe gabe mwa horau. 41Ihei gabe mwa lai ḡoḡo atatun vevsera non God bwatuna be kea atatun vevsera non God, God vi tavwea mulei kun gabe mwa davwe non atatun vevsera. I ihei gabe mwa laiḡoḡo atat vavtutu bwatuna be kea atat vavtutu, kea God vi tavwea mulei kun gabe mwa davwe atatu vavtutu. 42Be ihei nin kimiu vi lai wai n̄an lalai noḡu atatu vwate be mwa do hivhivo ninira noḡu atatu duluai huri be kea noḡu atatu, nam bev mwasigi lalai kimiu be God vi tavwea huria.”
Atualmente selecionado:
Matiu 10: HNB
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
Bible Society of the South Pacific