Matiu 15
15
Ñkpọ se isappa awo
1Ndin mme Farisi ye mme akpeeb ibed eto Yerusedem edi ebịne Yisọs enyʌñ edibịp anye ete, 2“Nso-o ido ntak mbed mfo ebiadda edu unam ñkpọ ake esed? Ammọ isiyieghe ubọk ndin edia ñkpọ!”
3Yisọs abọọrọ ammọ ate, “Ntaha ndufo ebiadda ibed Abasi ke ntak edu unam ñkpọ ndufo-o? 4Sia Abasi abo ate, ‘Kpono usọ ye uka’; nko awo akeedodo asuuñọke ete ye eka amọ ana ewot anye. 5Ado ndufo ebo ke adieke awo abooho ete me eka amọ ate, ‘Se unwam afo akpekebọọhọ anto miin ado enọ a-mbenne nnọ Abasi,’ 6anye inamma se akpena nte anam anọ ete me eka amọ. Ke ntom, ndufo enam ikọ Abasi akappa ado ikpu-ikpu ñkpọ ke ntak edu unam ñkpọ ndufo. 7Ndufo mbon mbubịk! Aisaya amaanen ke ini anye aketañña ami ibaña ndufo ate:
8 “ ‘Mbon ami eñkpono miin ke ñkpọkinua
ado esịd ammọ amaañkpọñ miin anyọọñ usʌñ.
9 Ammọ eñkpono miin ke ikpu-ikpu usʌñ,
ekeene ibed awo ke ukpeebñkpọ ammọ.’ ”
10Yisọs akood mme atu awo anyʌñ abo amọ ate, “Ikpañ utọñ nọ inwaña. 11Se idʌk awo inua inamma awo adeghe, ado se iwuọ awo ke inua anam awo adeghe.”
12Ndin mme mbed edi ebịne anye enyʌñ edibịp anye ete, “Amediọọñọ ke mme Farisi emaekop idiọọkesịd ke ikọ afo aketañña do?”
13Anye abọọrọ ate, “Eto ake adodo ake Ete mmi ke anyọñ mmiikitọọhọ eyaewịppe ke adʌñ esio. 14Ikpọñ ammọ, ammọ edo mme nnan e-edatta nnan usʌñ. Adieke nnan adatta nnan usʌñ ammọ awo iba eyaeduọññọ edọñọ ube.”
15Ndin Bita ate, “Nam ñke ami inwaña ñnyịn.”
16Yisọs abọọrọ ate, “Inyʌññọ inwaña ndufo ñko? 17Nte ndufo ikanna ikịt ke se idʌk awo inua aboiyo adʌk idịb, ndin eka anye esio? 18Ado mme ñkpọ ewuọọhọ awo ke inua ato esịd, ndin ado ammọ ami enam awo ‘adeghe.’ 19Sia afịd ndiọi uduak ato esịd awo: uwod awo, efịbe, use, inọ, utie ntiense nsu, usappa, adidọk. 20Mme ñkpọ ami enam awo adeghe. Ado adidia ñkpọ ke mbad ubọk inamma awo ‘adeghe.’ ”
Mbuọdidem awonwaan Kenan
21Yisọs amaakpọñ ndo aka ke ñkanñkʌk Taya ye Sidọn. 22Ndin ke ebe ado awonwaan Kenan keed ke efaak ado atọọñọ adibọñ ñkpọ abo ate, “Abọọñ Ayịn Defid, ntua miin mbọm. Dimọn atʌkkọ ayịn awonwaan mmi.”
23Ado anye ibọọrọke anye ikọ ndomokeed. Ndin mme mbed amọ ekekpe anye ubọk ete, “Nam nọ anye adakka, sia anye ibọọñ ñnyịn abọhọ.”
24Anye abọọrọ ate, “Ekendọñ utom enọ edọñ ufọk Isred e-emaekesop kpọd.”
25Ado awonwaan ado amaasaña adisịm anye anyʌñ atọọñọ edọñ ke iso amọ, ate, “Abọọñ, ñnyaaña miin.”
26Anye abọọrọ ate, “Ifọnnọ adiben ndidia ntəkayịn ntop nnọ mme ewa.”
27Ado anye asọsọp abọọrọ ate, “Ih, Abọọñ, ado idem mme ewa esitañ mbeñe e-eduọññọke eto akpokoro eteufọk ammọ.”
28Ndin Yisọs abọọrọ anye ate, “Mma, amenie ekamba mbuọdidem. Eyaak se afo abeeñe unọ.” Ndin kpa ke ebe ado idem amaamaana asọñ ayịn amọ.
Yisọs anọ tọsịn awo inaañ ndidia
29Yisọs ato do aka akesịm mben akpa mmọọñ Kadidi, ndin anye adọọk anyọñ abod akesuuk atie. 30Ndin mme uwak atu awo edibịne anye, eben mme mbʌñọ, mme nnan, mme imuum ye uwak mbon udọñọ mfen ebịne anye, ediyaak ebon anye ke iso, ndin anye anyʌñ akọk ammọ udọñọ. 31Idem amaakpa atu awo adikịt naña mme imuum etañ ikọ, mme mbʌñọ esaña isañ, mme nnan enyʌñ ekịt usʌñ, ndin ammọ emaetooro Abasi Isred.
32Ndin Yisọs akood mme mbed amọ anyʌñ abo ammọ ate, “Mme mbon ami ennie udʌk; ammọ eba ye ami usen ita idahami idiaaha ñkpọ. Nnyemme adibo ammọ enyọñ abiọñ, mbaak edisʌkkọ ke usʌñ.”
33Mme mbed amọ ebọọrọ ete, “Mmọ-ọ ke ñnyịn idiikịt uyo ke utọ ntotəño itie ntom nọ akem utọ atu awo ami?”
34Yisọs abịp ammọ ate, “Ndufo enie uyo ifañ?”
Ammọ ebọọrọ, “Itiaba, ye ibad-ibad ñkeñe iyak.”
35Anye amaabo atu awo ate esuuk etie ke isọñ. 36Ndin anye aben uyo itiaba ye iyak ado, ke anye amaakenọ Abasi ekọm, amʌm abuuñ, anyʌñ akappa anọ mme mbed amọ, ndin ammọ edeeme enọ atu awo. 37Afịd ammọ edia enyʌñ eyʌkkọ. Ke emaekedia ima, mme mbed emaekoono mbeñe se ikisʌhọ eyọhọ akpasa itiaba. 38Ibad mbon e-ekediaaha ñkpọ ado akedo tọsịn inaañ, ke esioho ibaan ye ntəkayịn efep. 39Ke ini Yisọs amaakesio mme atu awo unyọñ, anye amaadakka adʌk ubom aka ñkanñkʌk Makadan.
Atualmente selecionado:
Matiu 15: NAAM
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
Ñwed Abasi Ke Ikọ Ibibio Ayo Mfịn™
Mme anie unen ñwed ami tọọñọ ke isua © 2020 ado Biblica, Inc.
Ebọ unyịmme eto Biblica, Inc. Emʌm afịd unen ke afịd ederimbod enọ Biblica.
Ibibio Contemporary Bible™
Copyright © 2020 by Biblica, Inc.
Used with permission. All rights reserved worldwide.