Ubutukilo 8
8
Kuhuwa cha sanga lia meya
1Mba Zambi yewuluka Noa ni tushitu eswe waze abwile hamwe nenyi mu ulungu, yabalikisa fuji helu lia meya, mba meya yaabutuka kuhuwa. 2Zambi yajika mafuji a jondo, yakanjisa vula mwilu, mba vula yabatuka. 3Meya yaahuwa hakepe hakepe. Muze matangwa 150 haabalika, meya yooma liakulu. 4Mba ha tangwa kumi ni lia muchishimbiali lia kakweji wa muchishimbiali#8:4 KAKWEJI WA MUCHISHIMBIALI Tishri, wa Aisraele; Kamoshi wa Tuchokwe. ulungu yiusakaminya ha umwe mbundu wa ku milundu ya Ararate#8:4 milundu ya ararate mu chifuchi cha Turki.. 5Meya yaaya lume nikuhuwa, mba ha tangwa litangu lia kakweji wa muchikumi#8:5 kakweji wa muchikumi Tebete, wa Aisraele; Kuwana wa Tuchokwe. masongo ja milundu yaabutuka kusoloka.
6Muze matangwa makumi awana haabalika Noa yazulula tupenda a ulungu, 7yatuhwisa chikwakwalo, neye yendangana mu tetela ndoo ni muze meya omine hashi. 8Mwabwamuze Noa yatuma katele hanga anyingike nyi meya haahuwa hashi nyi ka. 9Alioze ndoo ni tangwa lize meya te achili hashi heswe. Kashika katele kamwene homa haze mabwila, yahiluka. Noa yolola kwoko yamukwata, yamunjisa mu ulungu. 10Yashimbwila nawa matangwa akwo shimbiali, mba yatuma nawa katele. 11Neye yahiluka chingoloshi, kuma te kali ni lifwo lia mutondo wa olive lia wisu ku mivumbo yenyi. Mba Noa yanyingika ngwenyi, kuma hashi meya haahuwa. 12Yashimbwila nawa matangwa akwo shimbiali, mba yatuhwisa nawa katele. Neye yaya, alioze chisuho chino kahilukile ko nawa.
13Muze Noa habwa ni miaka 601, ha tangwa litangu lia kakweji mutangu#8:13 kakweji mutangu Abibe, wa Aisraele; Kunake wa Tuchokwe. , meya eswe yooma hashi. Noa yafukula ulungu, yatala hashi, yamona ngwenyi hashi heswe hihoma chau. 14Ha tangwa makumi aali ni lia muchishimbiali lia kakweji wa muchaali hashi heswe yihoma chau.
15Zambi yambila Noa ngwenyi: 16“Yena ni pwo lie, ni ana je ni mapwo jo, tuhukenu mu ulungu. 17Tuhwisa nawa tushitu eswe, ni tujila, hanga akaseme akaliokese hashi heswe.” 18Mba Noa ni pwo lienyi, ni ana jenyi ni mapwo jo, yaatuhuka mu ulungu, 19ni tushitu eswe ni tujila eswe yaatuhuka mu ulungu mu mikana yo.
Noa yalambula milambu kuli Zambi
20Hohene Noa yatunga chilumbilo cha Mwene Zambi. Tushitu ni tujila waze atela kulambula, yanda umuwika umuwika, yoocha ha chilumbilo, yaawema bwililii. 21Muze Mwene Zambi hevwa lupembo mubema wa mulambu uze, yamba ngwenyi: “Hikwahwa, chichi kushinga nawa hashi hakutwala ku yize akulinga atu. Ngunanyingika ngwami, kuma atu chize ku wanuke wo, manyonga jo kaali lume abi. Eswe waze natangile, akwete mwono, chichi kwonona nawa ngwe chize hinalinga.
22Matangwa eswe hashi muhanyongonoka,
mwaka wa kukuwa ni mwaka wa kuhela,
chishika ni chivukuminya,
lwiza ni lushiho
mwalwa ni ufuku,
kuyichi kahwa nichimwe.”
Zambi yakolesa Usendo ni Noa
Atualmente selecionado:
Ubutukilo 8: CHK1970
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
The Bible in Chokwe © Bible Society of the Democratic Republic of Congo and Bible Society of Zambia, 1970, 1991.