Chukusakị 27
27
Aịzịk Ḅe Ò Jekọb Ḅe Ḅẹlẹmamẹ
1Aịzịk ḅe mị sịkị mị ḅụ ori olomusam se ọ̀ tọrụmgbọlụma ḅarị iḅiọkụma ye ọrịkẹ. Ọ̀ yayo sẹnịḅọ Isọ ḅe chịnse nwọse ọ̀ ḅẹmẹ, “Ị̀ya tọkụ!”
“Aan,” ọ̀ nwọ pẹkẹrẹmẹ.
2Aịzịk ḅe nwọse ọ̀ ḅẹmẹ, “Ị́ ọrịmẹ àrị olomusam à pịkị ḅọlọka sịkị fịḅịa. 3Ị́ya lubu na ḍẹịnma na ọkị piri sọ se nama ḅaaḅo ị̀ pịrị. 4Se ị̀ ḅụḅẹlẹḅẹlẹ fịye nwọ chụọḅo ị̀ pịrị. Àrị anị fịso sịkị, ma à fịka simeogbo ị̀ya kuluma ḅẹlẹma à nwọse ị́ pịrị.”
5Aịzịk ḅe ori ọkwẹịn Isọ ḅe pịrịarị sịkị Ribeka ma á poki aḅẹ. Anịgose Isọ ḅe ọ̀ nama tẹịn nyọ mun sịkị, 6á nwọse Jekọb ḅe ḅẹmẹ, “Mịkirikiri à naamẹ ị́ ḍaḅe nwọse Isọ ḅe ḅẹmẹ, 7‘Nama ọkịḅo se chụọ ị̀ pịrị. Àrị anị pẹịso sịkị, ma à fịka simeogbo à Nyanaḅọ Ḅe tọrụkuḅu ị̀ya ḅẹlẹma se ị́ pịrịḅịa.’ 8Mịọkụ, ị̀ya tọkụ,” Ribeka ma pa nwọ ḍuko aḅẹ, “ị̀ poki se à ḍukoḅịaye mịẹ. 9Nama ma ogbo ḅie mun mama ḅẹlẹkị chụa ayamburama oḅori nwọ sẹlẹḅo, mịẹse à àrịse ị́ ḍaḅe opuma ọ̀ ḅụḅẹlẹḅẹlẹ fịye ma ḅụ gbọrịye nwọ chụọ ọ̀ pịrịḅịa ọkụ. 10Ị́ se mun ọ̀ pịrịse ori anị pẹị se ma ọ̀ fịka simeogbo ori ị́ ḅẹlẹmaḅịa ọkụ.”
11Ọkụma Jekọb ḅe nwọse nyọngọrọma ḅẹmẹ, “Ị́ nemimẹ na Isọ ḅe ori ichuka chụaḅọ-ẹ, ọkụma ị̀rị̀ ị̀ya oju mọnịmọnịmẹ. 12Ị̀ ḍaḅe ò nemikase ọ̀ ḅara se ị̀ lama se ḍọkịḅo ọrịmẹ na àrị oḅorise ọ̀ chịn aḅẹ nwọ ḅe ọkụma, ḅẹlẹma na karaka worinime re mị ọkịḅo ị̀ ḅụ pịrịḅịaye-ẹ.”
13Nyọngọrọma nwọ ḅẹmẹ, “Ye sime ị́ pịrịḅịa worinime mị ị̀ ọgọnọ gbana, ị̀ya tọkụ, à ḍuko ọkụ nwọ mịẹ, mun oḅorima ọkịḅo ị̀ pịrị.” 14Anị ò mun àrị ọkịḅo á pịrịye-ẹ, á ḅo àrị se ḍawu ḅe ḅụḅẹlẹḅẹlẹ fịye nwọ chụọmẹ. 15Anịsịkị Isọ ḅụchụayema ḅie á ḅara sime iḅitẹịn ayema á nwọ seni Jekọb ḅe chụamẹ. 16Oḅori nama apụra ma á nwọse ọ̀ ḅarama chụa, pịkị ọ̀ kọngọ inime oforika nyọ ḅụ oḅolomẹ. 17Ḅẹlẹ fịye mị na á mịẹ fịturu mị na á nwọse ọ̀ pịrịmẹ.
18Anị Jekọb ḅe ọ̀ ḍawu ḅe damamun se nwọse ọ̀ ḅẹye-ẹ, “Ḍaḍa!”
“Aan,” ọ̀ nwọ pẹkẹrẹmẹ. “Ị̀ya owuapụ awọma ḅụ ị́rị́ tụḅọ?”
19Jekọb ḅe nwọ pẹkẹrẹmẹ, “Ị̀rị̀ ị́ya tọkụ Isọ, sẹnịḅọ ḅe-ẹ, ị́ ḍuko ị̀ pịrị ḅara mị à mịẹsam. Sisi sịsẹ kpọnjị sime se à seḅo fịye mị fị se ị́ya ḅẹlẹmase ị̀ pịrị.”
20Aịzịk ḅe nwọ ḅẹmẹ, “Nde ị́ sarasarama be anị ọrị ọkụ, ị̀ya tọkụ?”
Jekọb ḅe nwọ pẹkẹrẹmẹ, “Nyanaḅọ ị́ Tamụnọ Ḅe, ḅarachụa ị̀ pịrịmẹ se à be anị ọrịmẹ.”
21Aịzịk ḅe nwọse Jekọb ḅe ḅẹmẹ, “Sisi iḅiọkụma ị̀ kpekima, mịẹse àrị ineda ḅara se ị́ lamaḅịa ọkụ. Ị̀ya tọkụ Isọ ḅe kọkọma ị́rị́?” 22Jekọb ḅe ori iḅiọkụ nwẹngị ḍawu ḅe kpekimamẹ, ọ̀ ḅara se ọ̀ lama se nwọ ḅẹmẹ, “Ị́ pụkọ mị Jekọb pụkọ na kịkịnamẹ ọkụma ị́ ḅarama Isọ ḅarama kịkẹmẹ.” 23Ò nemikẹ Jekọb ḅe ori ọkụ, anịatịḅị ọ̀ ḅarama Isọ ḅe ḅarama ichuka chụa ọkụ mị àrị sime ọkụ-ẹ. Ori oria ḅẹlẹma se ọ̀ pịrị-ẹtọn àrị sịkị, 24ọ̀ pịkị gbelamẹ, “Kọkọma ị̀ya tọkụ Isọ ḅe ị́rị́?”
“Ị̀rị̀-ẹ,” ọ̀ nwọ pẹkẹrẹmẹ.
25Aịzịk ḅe nwọ ḅẹmẹ, “Fịye mị ḅụ daye ọkịḅo ị̀ pịrị. À fịso sịkị, àrị ị̀ya ḅẹlẹma se ị́ pịrịḅịa.” Jekọb ḅe ori anị ọkịḅo ọ̀ pịrịmẹ, ọ̀ pịkị iru na ọkịḅo ọ̀ pịrịmẹ ò ḅu. 26Anịsịkị ḍawu ḅe nwọse ọ̀ ḅẹmẹ, “Ị́ kpekimaḅo se ị̀ ḅịpị nọnjụ, ị̀ya tọkụ.” 27Ò kpekima mun ọ̀ ḅịpị nọnjụ-ẹ mun-arị sịkị, Aịzịk ḅe ori oria ḅụchụayema inimẹ se ori oria ḅẹlẹma se ọ̀ pịrịmẹ. Ọ̀ nwọ ḅẹmẹ, “Ị̀ya tọkụ ḅe oria iḅi onu mị ḍiki, Nyanaḅọ Ḅe ọ̀ ḅẹlẹmasa ozu sime ọkụ simemẹ. 28Ye Nyanaḅọ Ḅe soḅie otita se ị́ fịrịma, ọ̀ mịẹse ị́ya ozuma lọkọlọkọ! Ye ọ̀ ḅakama chịnmgbọlụ na iru na se ị́ pịrị! 29Ye tọn-a sẹ ị́ya fịrịnwẹngịapụ sọ, pịkị ye tomoni tịḅịtu ị́ pịrị. Ye ị́ ḅẹrẹtọn ị́ya mịnapụ mamgba pịrị, ye ị́ nyengi mịnapụ mamgba tịḅịtu ị́ pịrị. Ye ị́ woriapụ ma, worinime nyana, pịkị ị́ ḅẹlẹma apụ ḅẹlẹma nyana.”
Isọ Ḅe Aịzịk Ḅe Ḅara Ḅẹlẹma Ọmgbọmẹ
30Aịzịk ḅe ọ̀ ḅẹlẹma se Jekọb ḅe pịrị so kirikiri, numbireowu Isọ ḅe namatẹịn nyọ ḅụ ḅomẹ. 31Ori sọ ḅẹlẹ fịye ọ̀ nwọ chụọ se deki mun ḍawu ḅe pịrịmẹ. Ọ̀ nwọ ḅẹmẹ, “Ḍaḍa, sisi, kpọnjị sime se à se ḅo ị́ pịrị fịye mị fị, mịẹse ị́ya ḅẹlẹma mị ị́ nwọse ị̀ pịrịḅịa ọkụ.”
32“Ị́rị́ tụḅọ?” Aịzịk ḅe nwọ gbelamẹ.
“Ị́ya tọkụ sẹnịḅọ Isọ ḅe-ẹ,” ọ̀ nwọ pẹkẹrẹmẹ.
33Aịzịk ḅe ọ̀ ḅụ mgba sakị geregeremẹ, se ọ̀ pịkị gbelamẹ, “Anịọkụma, anị tụḅọ, nama ḅaa se dekiḅo ị̀ pịrị? À pẹịso kirikiri ị́ ḅomẹ. Ị̀ya ḅẹlẹma mamgba à se ọ̀ pịrịmẹ, anị pịkị oriaye sọ gbasoḅịa.”
34Isọ ḅe ḅo mịn mị naa sịkị, ọ̀ ḅụ akụ ḅarase oloku owu pakụmamẹ, se nwọ ḅẹmẹ, “Ị̀rị̀sọ ị́ya ḅẹlẹma se ị̀ pịrị, ḍaḍa!”
35Aịzịk ḅe nwọ pẹkẹrẹmẹ, “Ị́ mbire ḅe ò ḅo oḅorise ị̀ chịnmẹ. Ị́ya ḅẹlẹmama ori ọkịsosam.”
36Isọ ḅe nwọ ḅẹmẹ, “Mị na mama sịkị ọ̀ nwọse ị̀ inumasam. Pikiḅịa ọkụ ofori-ẹ oria ẹrẹ anị Jekọb-ẹ. Ị̀ya tatarị yi owutọkụ kiri mị ori ọkịmẹ, mịọkụ ọ̀ pịkị ị̀ya ḅẹlẹma mị ọkịsam. Gbọrị ḅẹlẹma sọnị ị́ se ị̀ wẹrịmaka?”
37Aịzịk ḅe nwọ pẹkẹrẹmẹ, “Ori tịḅịnịḅọ sọ ị́ pịrị à nwọ ḍuko ḅọrọsam, oria mịnapụma pịkị oria omonisọ-ẹ à nwọ ḅẹmẹ. À pịkị ḅaka chịnmgbọlụ na iru na se ọ̀ pịrịsam. Mịọkụ, àrị ineda mịẹ ị́ pịrịḅịaye ofori-ẹ, ị̀ya tọkụ!”
38Isọ ḅe ọ̀ pa ḍawu ḅe tẹkẹ aḅẹ, “Gbọrị ḅẹlẹma kẹngẹ ị́ nwọ nyanasọ, ḍaḍa? Ị̀rị̀sọ ị̀ ḅẹlẹma, ḍaḍa!” Se ọ̀ sakị owumẹ.
39Anị Aịzịk ḅe nwọse ọ̀ ḅẹye-ẹ,
“Ị́ soḅie otita nyana ẹkẹ,
Lọkọlọkọ fịye pakụma kiri sime ị́ pịrị ẹkẹ.
40Ị́ya okola-agiji ḅụ mị ị́ wẹrị ḍumoḅịaye-ẹ,
Ọkụma ị́ mbire ḅe oria omoniḅọ mị ị́ sọḅịaye-ẹ,
Ọkụma ị́ kọngọ kụrọmamẹ ḅẹḅẹ oria ḅẹrẹtọn kụrọḅụ ị́ pọkọḅịa.”
41Isọ ḅe ọ̀ taraka se Jekọb ḅe wẹrịmamẹ, anịatịḅị sime ọ̀ pịrị ḅẹlẹma mị ḍawu ḅe ò seni Jekọb ḅe pịrịsam. Ò kuḅie ḅụ nwọ tọn mẹ, “Ị̀ ḍaḅe fị se wa kururu ọ̀ pịrịḅịa sịkị kpekisam, anịsịkị mị à Jekọb ḅe ḅaaḅịaye-ẹ.”
42Ọkụma Ribeka ma árị Isọ ḅe tọnye mị nwọ naa sịkị, á Jekọb ḅe fịrịmaḅo se nwọse ọ̀ ḅẹmẹ, “Poki, ị́ mbire ḅe ọ̀ tọn aḅẹ ori ị́ nyanaḅo se ị́ ḅaaḅịa. 43Mịọkụ, ị̀ya tọkụ, à ḍuko ị́ pịrịye mị nwọ mịẹ. Mị kirikiri so ị̀ mbire Leban ḅe damamun Heran ḅie, 44kele ori na sime ọkịmun ị́ mbire ḅe kuḅie dein sịkị la, 45ọ̀ pịkị ị́ seni ọ̀ mịẹye mị se ḅieḅarama sịkị la. Anịsịkị à nweni fịrịma ị́ ọkị pịkịmaḅoḅịa. Cheye gose gbọrị ene ḅie àrị ị̀ya mama owuapụ awọma famaḅe?”
Aịzịk Ḅe Ò Jekọb Ḅe Se Leban Ḅe Sẹịnmamẹ
46Ribeka ma nwọse Aịzịk ḅe ḅẹmẹ, “Isọ ḅe ò simeḅo jịn sẹ eremeni ma ini iḅiọkụma ị̀ kuḅie simamẹ. Nemikase Jekọb ḅe sọnị mị Hitaị eremeni awọma ḅụ gbọrịḅọ nwọ sime ọkụma, à gbọtụḅara fịḅịa.”
Atualmente selecionado:
Chukusakị 27: OBTP
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
The Bible Society of Nigeria