ỊJỌN 16
16
1IJisọsị byi angịjụgbẹyị nyamwụ yẹkẹẹ, “M ya ala ịlẹ wuu jenu, chajị ká ọkịlẹtụ á ka chị́ịnụ pyẹpyẹ du kanụ ka ji ẹkpẹ nyanụ dam kpong-kpong kaka. 2Ụka juwa warị ká alegbeju nya ala iJuu ka gbanụ ugu, kunu kpehe rụ hi ebe ị-mẹ ẹla nya Ohe Oluhye jẹ nya ala iJuu wuu. Ee, ịnyịlẹhị ịnyị, ụka dọmwụ juwa warị ká angịnyị ịlẹ kị ka nwụnụ ka juwa me irya yẹkẹẹ, ẹrụ, ịwa nyaa wẹẹ myị ha Ohe Oluhye ayịdang bwula ọọwa lẹlẹ. 3Ang odudu kị ka họ ịnyị ri yẹkẹẹ, ịwa ayịdang á jẹ́ Ohe Oluhye Adịda ka. Ị́ tị jẹ́m am ayịdang ka, ịnyịnyị. 4Ma, m jam ya ala ịlẹ wuu jenu lẹẹlẹẹ, chajị ụka kị họ jịra ị-ịlahị lẹ, kanụ ka kpịtịya yẹkẹẹ, am nyị ya je ịwa ịnyị kpá wuu ene-ene lẹ. Ma, ḿ tị ya ala ịlẹ jenu bwu ọmwụ ọdada ka, chajị ụka ọọwa lẹ, m jam tanụ wẹẹ.”
Ụkụrwọ nya Olegu Ịgọgọ
5IJisọsị myịmyị byaa yẹkẹẹ, “Ma, lẹẹlẹẹ lẹ, m jam ka rụ tịrẹkpẹ ka ẹga nya ọngọ dum ẹrụ warị lẹ. Ma, ọngọngọhẹ nyanụ á tị tọm towo wẹ yẹkẹẹ, ‘Ale, a tị́ juwa jẹ ka?’ ka. 6Ma, lẹẹlẹẹ, kam tị lẹẹ ya ala ịlẹ wuu jenu lẹ, ọọwa lẹ, ọkịlẹtụ nyanụ a mwọọgịlẹ juwa myị la ayiiji ọbwọbwọ wẹ lẹka? 7Ọlịnyị kpá odu ịnyị. M ka ya ẹla nya ịlẹhị jenu lẹ! Ó ri kaam ayịdang á rụ hiinu kpá ene ka aalẹ, Olegu Ịgọgọ Ọngọ kpụ́ ẹjẹ nyanụ ọọwa á ka jẹ́-ẹ warị kaka! Ma, ụka kam rụ kpá lẹ, m ka jẹ́-ẹ doo ẹrụ warị wẹ ẹga nyanụ wẹẹ lẹ. 8Ụka ká Ọngọ kpụ́ ẹjẹ nyanụ ọọwa á warị lẹ aalẹ, ọ ka bwuru ájẹ́jẹ-ka nya alodehe ọlẹ wuu apwụ dodehe u-uhye nya ang ebwo ịta ịlẹ: Eje owuwu u-uhye nya ọhọbịrị ọhọhọ nyaa, etu nya abwẹla ọnyịịla nya Ohe Oluhye ayịdang bala ang ọlẹ ká eje owuwu nya Ohe Oluhye ri kpangga. 9Eje nya ọhọbịrị ọhọhọ nyaa waa lẹ. Chajị nyọlẹ kịịwa ayịdang á myị lam am Ọngọchịda kaka. 10Etu nya abwẹla ọnyịịla nya Ohe Oluhye chị ehe haa lẹ. Chajị nyọlẹ kaam ayịdang jam ka rụ kele ka ẹga nya Ohe Oluhye Adam du kaanụ alodehe, á ka myịmyị-ị̀ juwa yẹm kaka. 11Ang ọlẹ ká eje owuwu nya Ohe Oluhye ri kpangga chị ehe mẹjaa ịnyịnyị lẹ. Chajị, Ohe Oluhye ya eje wu ọngọlẹ kọ ri adịrahụ olegbeju o-juwa gbe odehe ọlẹ wuu lẹẹlẹẹ lẹ.”
12“Ịnọ, m la ala lụmẹ-lụmẹ ka ya jenu wẹẹ! Ma, ánụ tị ka wo etu nya ala ịịwa kpa ẹ-ẹpwụ nyanụ myị́ lẹẹlẹẹ lẹka. 13Ma, ụka ká Olegu Ịgọgọ ọngọ bwuru ẹla nya ịlẹhị nya Ohe Oluhye dodehe á warị lẹ aalẹ, ọ ka kpanụ kaka ju ka ẹpwụ nya ẹla nya ịlẹhị nya Ohe Oluhye lẹlẹ. Chajị, ó juwa ka ya ẹla la ọngịrị nya ịlọmwụ kpong-kpong ka. Ma, ẹla myị́ ẹla ọlẹ kọ ka wo bwu ẹga nya Ohe Oluhye kem, ọ ka ya jenu lẹ. Ọ ka bwuru ụma nya ang ịlẹ kị juwa ka họ ị-ịlahị ya jenu ịnyịnyị. 14Ụmụmẹ nyam kem, ọ ka ya dodehe jenu lẹ. Chajị ẹ-ẹga nyam kpangga, Olegu Ịgọgọ ọọwa a ka wo ẹla ọlẹ kọ ka ya jenu bwu, ene kọ ka kpa warị kaka ya jenu lẹ. 15Ang myị́ ang ọlẹ ká Ohe Oluhye Adịda la ri ịnyam ịnyịnyị. Ịnyị a du kam byinu yẹkẹẹ, Olegu Ịgọgọ ọọwa ka ye ẹrụ ọlẹ kọ ka myị ya jenu, pyii bwu ẹga nyam lẹ.”
Ayiiji Ọbwọbwọ A Jene nya Ọkẹkẹnị Ọchịchị Lẹ
16IJisọsị myịmyị byaa yẹkẹẹ, “Ụka kọ nọ chẹẹ wẹẹ lẹ, ánụ ka yẹm gụ ọlẹ kaka. Ụka kọ tị myịmyị nụwa chẹẹ lẹ, anụ ka yẹm myịmyị lẹlẹ. [Chajị, m juwa ka rụ kele ka ẹga nya Ohe Oluhye Adam lẹ.]”
17Ụka ọọwa, angịhyẹ nya angịjụgbẹyị nyamwụ juwa byi awụlẹ yẹkẹẹ, “Anụ wo wẹẹ! Ayịbahị yẹkẹẹ, ‘Ụka kọ nọ chẹẹ wẹẹ lẹ, anụ ka yẹm gụ ọlẹ kaka. Ụka kọ tị myịmyị nụwa chẹẹ lẹ aalẹ, anụ ka yẹm myịmyị lẹlẹ. Chajị, m juwa ka rụ tịrẹkpẹ kele ka ẹga nya Ohe Oluhye Adam lẹ.’ ” 18Ọọwa lẹ, ị yẹkẹẹ, “Ịịyẹ a tị́ ri etu nya ‘Ụka kọ nọ chẹẹ lẹ?’ Áhị́ jẹ́ etu nyamwụ kpong-kpong ka.”
19IJisọsị jẹ́ yẹkẹẹ, angịjụgbẹyị nya ọọwa nyị juwa tịtọ kịị nyị ka tọ ọwa ịtọ o-oluhye nya ẹla ọọwa lẹ, ọ byaa yẹkẹẹ, “Ịịyẹ a tị́ du kanụ juwa tọ ịlọnụ ịtọ nya etu nya ẹla ọlẹ kam ya wẹ yẹkẹẹ, ‘Ụka kọ nọ chẹẹ lẹ, ánụ ka yẹm kaka. Ma, ụka kọ tị myịmyị nọ chẹẹ lẹ aalẹ, anụ ka yẹm myịmyị lẹlẹ,’ mẹ? 20Nya ịlẹhị-ịlẹhị, m byinu yẹkẹẹ, anụ ka juwa jida bala ọ-ka juwa bida. Ma, alodehe ọlẹ tị ka juwa chị ọkẹkẹnị. Anụ ka juwa bwọ ayiiji. Ma, ayiiji ọbwọbwọ nyanụ ọọwa tị ka yẹ ri ẹhụ ọhụlọ hụlọ hanụ ị-ịlahị wẹẹ! 21Ụka ká ọnyang ọlẹnyị á juwa ka ma ọnyị, ọ kaa juwa ẹ-ẹpwụ nya ang ọjụjụ, chajị, ụka nya ang nya ọnyị ọ-ka họọ họ pwụ lẹ. Ma, ụka ká ọnyang á ma ọnyị ọọwa kpá wuu lẹ, ọ́ myịmyị kaa kpịtịya nya ang ọjụjụ ọọwa kaka. Chajị nya ọkẹkẹnị nyori yẹkẹẹ, ọ ma ọnyị onyeewe warị wẹ odehe ọlẹ lẹ. 22Lẹ, ịnyịnyị, ịnyanụ a la wẹ lẹlẹ. Anụ juwa ẹ-ẹpwụ nya ayiiji ọbwọbwọ lẹẹlẹẹ odu ịnyị! M juwa ka warị kaka yenu ị-ịlahị wẹẹ! Ụka ọọwa, ọkịlẹtụ nyanụ ka myị la ọkẹkẹnị ọchịchị. Ọngọngọhẹ á tị ka jẹ́-ẹ nunu ọkẹkẹnị ọtụka ọọwa myị́ kpong-kpong kaka.”
23“La ẹnụtụrụ ọọwa, ịngịngịhyẹ á juwa ọlẹ kanụ ka myịmyị-ị̀ bịlẹm kaka. Nya ịlẹhị-ịlẹhị, m byinu yẹkẹẹ, ó ri kaanụ ayịdang á ka myị-ị bịlẹ Ohe Oluhye Adịda, ịngịngịhyẹ lẹẹlẹẹ aalẹ, ọ ka ya hanụ bwula ẹnyị nyam pyii. 24O-bwu ẹkpẹ-ẹkpẹ warị lẹ, ánụ jam bịlẹ ịngịngịhyẹ la ẹnyị nyam ka. Lẹ, anụ juwa bịlẹ Ohe Oluhye ang ọlẹ kọ baanụ mẹ. Aalẹ, Ohe Oluhye ka ya ang ọọwa hanụ, chajị ká ọkẹkẹnị ọlẹpwụ nyanụ ka jẹ́-ẹ myọọ pwẹẹpwẹẹ mẹ.”
IJisọsị Kụrụ Odehe Ọlẹ Ene-ene Lẹ
25IJisọsị myịmyị byaa yẹkẹẹ, “Lẹẹlẹẹ lẹ, m jam kpa ija ịkpịta da ala ịmẹjẹ nyam wuu wụlẹ, ya jenu! Ma, ụka juwa warị ị-ịlahị kam ka kpa ija ịkpịta ịlịnyị da ẹla wụlẹ ya jenu kpong-kpong ene kaka. Ma, m ka ya ẹla rụ́ Ohe Oluhye Adịda gede-gede dodehe ya jenu lụka ọọwa lẹ. 26Ẹnụtụrụ ọọwa lẹ, ang myị́ ang ọlẹ kọ baanụ, kanụ ka bịlẹ Ohe Oluhye la ẹnyị nyam. Ụka ọọwa, ọ́ ka baba ham, nyọka byinu yẹkẹẹ, anụ ba kam raabwọ bịlẹ Ohe Oluhye Adịda wọnụ nyanụ ju mẹ ene tụtụm kaka. 27Chajị, Ohe Oluhye Adịda ayịdang la ọháha ẹ-ẹga nyanụ lụmẹ, chajị nyọlẹ kaam ayịdang háanụ bala ọlẹ kanụ myị yẹkẹẹ, ẹ-ẹga nya Ohe Oluhye Adịda kpangga, am nyaa bwu warị ịnyịlẹhị lẹ. 28Ẹ-ẹga nya Ohe Oluhye Adịda, m bwu warị wẹ odehe ọlẹ lẹ. Ẹ-ẹga nya Ohe Oluhye Adịda ọọwa, m tị jam ka rụ bwu odehe ọlẹ myịmyị tịrẹkpẹ ka ịnyịnyị lẹlẹ.”
29Angịjụgbẹyị nya iJisọsị wẹ byoo yẹkẹẹ, “Ẹhẹẹ! Ọngọlahị, ugbẹnyị, a wẹẹ ya ẹla gede-gede jehi wẹẹ ka! Á kpa ija ịkpịta da ẹla ọọwa wụlẹ hahị ene kahị wo kaka. 30Lẹẹlẹẹ lẹ, ahị jẹ́ yẹkẹẹ, ahụ ayịdang jẹ́ ang myị́ ang wuu lẹlẹ, ọ́ baba ká ọngọngọhẹ nyahị ka tọng ịtọ ene, kahị ka wo myịmyị kpong-kpong kaka. Bwula ọlẹ, ọọwa họ kahị jẹ́ nya ịlẹhị-ịlẹhị yẹkẹẹ, ẹ-ẹga nya Ohe Oluhye kpangga a bwu warị ịnyịlẹhị lẹlẹ.”
31IJisọsị wẹ byaa yẹkẹẹ, “Ẹhẹẹ! Anụ myị nya ịlẹhị-ịlẹhị ugbẹnyị lẹ? 32Ụka juwa warị ị-ịlahị. Ọlẹẹlẹẹ a dọmwụ ri ụka ọọwa kpangga lẹlẹ. Ịnyị lẹ, anụ wuu a ka nyi epepe lẹ, ọng myị́ ọng nyanụ wuu a ka rụ ka ẹpwa nya ịlọmwụ him lẹlẹ. Ma, ụka ọọwa, am ụbwọm kem a ka hi jam lẹlẹ. Ma, ḿ tị ka dam ụbwọọm-ụbwọọm kpong-kpong ka. Chajị Ohe Oluhye Adịda ayịdang jam tam. 33M ya ala ịlẹ jenu lẹẹlẹẹ, chajị kanụ ka jẹ́-ẹ la okpunyi nyam ẹ-ẹpwụ nyanụ odehe ọlẹ. Akama lẹ, ọ ka wẹ chịnụ ọgụ ẹ-ẹpwụ nya odehe ọlẹ lẹ! Ma, anụ tị la ẹjẹ ọkpụ́kpụ mẹ. Chajị, m kụrụ odehe ọlẹ wuu wọnụ nyanụ ju lẹ.”
Atualmente selecionado:
ỊJỌN 16: IBNO
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
Igede Bible © The Bible Society of Nigeria, 2019.