ỤKỤRWỌ nya ALẸRỤ 9
9
Irya Ọyẹda nya ỊSọlụ
1Ụka ọọwa, ịSọlụ ri ododo ị-ịlahị nya angịjụgbẹyị nya Ọngọlahị la wuu, chajị nya eje ọchịchị nyọka nwaa nwụ nyamwụ. Ịnyị, ịSọlụ a kele ka ẹga nya olegbeju ọgbahị nya angịkiliya nya Ohe Oluhye wuu lẹlẹ. 2Ọọwa lẹ, ọ bịlẹ olegbeju ọgbahị nya angịkiliya ọọwa, kọ ka da ileta doo ẹrụ yẹkẹẹ, ọwa nyị ya ọngịrị ha ịSọlụ kịị nyị ka wu ọng myị́ ọng wuu, tụ ọnyang, tụ ọlẹng ọlẹ kịị nyị ri ọngọ dịrẹ ụgbẹyị nya Ẹrụ Ọnyịịla nya iJisọsị ịKịrayịsị. ỊSọlụ ya, nyị da ileta ọọwa doo ẹrụ kpa kele kịla alegbeju ịkpẹhị rịrị ebe ị-mẹ ẹla nya Ohe Oluhye jẹ ịla ịDamasịkọsị wuu mẹ. Chajị, ịSọlụ tịtọ ká ọng myị́ ọng ọlẹ kọ yẹ ịnyị lẹ, kọ ka wu angịịwa, ya agba jwaa, kpaa kele ka iJerusalẹm pyii lẹ.
3Ịnyị, ụka ká ịSọlụ jẹ ịnyịnyịịnyị gbee kọ ju epweji nya ịDamasịkọsị ọọwa chwẹẹ lẹ, ahịgboo ọtụka-ọtụka ọhẹ a chị bwu epwoohe lala apya nya ịkpala, dagaga ju ịSọlụ ụ-ụwa lụka ọ-mwaa lẹlẹ. 4Ọọwa lẹ, ịSọlụ a hịda ka ịpyị kpịlagada ụ-ụwa lẹ, ọ wo ká omyi ọhẹ juwa be ẹkọ wụrwọọ yẹkẹẹ, “ỊSọlụ, ịSọlụ! Ịịyẹ a tị́ du ká juwa tụm pyịpyị lụmẹ ịnyị?”
5ỊSọlụ wẹ byi omyi ọọwa yẹkẹẹ, “Oowo a tị́ wẹẹ ya ẹla tam ene, Ọngọlahị?”
Omyi ọọwa wẹ byi ịSọlụ yẹkẹẹ, “Am iJisọsị ọngọlẹ ká wẹẹ tụ pyịpyị ịnyị! Ọ ka ri ang ọjụjụ hang lụmẹ nyọka juwa kpa ịlọng kaka gu ọgọdọ ọlẹ kọ ru ẹhị, kị kaa kpa gu ẹna chọọchọọ. 6Ma, ịSọlụ, wuleji lẹẹlẹẹ ká rụ ka epweji nya ịDamasịkọsị mẹ. Ụ-ụwa, m ka ya jeng ang ọlẹ ká ka họ ham pyii lẹlẹ.”
7Ụka ọọwa, alẹng ịlẹ kị ri alogu ẹdịyẹ nya ịSọlụ wuu godayị, gbu-ojoje rịrị ụ-ụwa. Í ya ẹlẹlẹhẹ bwu ọnụ nyaa myị́ kpong-kpong ka. Chajị, ị juwa wo ẹla ọọwa. Ma, ị́ tị yẹ ọngọlẹ kọ juwa ya ẹla ta ịSọlụ ẹ-ẹhị ka. 8Ụka ká ịSọlụ wuleji bwu ịpyị, kọ pyẹ ahị nyamwụ maa lẹ, ọ jẹ́ yọyị kpong-kpong kaka lẹlẹ. Ọọwa lẹ, alogu ẹdịyẹ nya ịSọlụ a yụbwọ chọọ, juwa kpọọ ụgbẹyị, gbee kị pwụ epweji nya ịDamasịkọsị lẹlẹ. 9Ịnyị, ịSọlụ a juwa e-epweji nya ịDamasịkọsị ọọwa ẹnụtụrụ ịta gbẹgbịlẹ, la idu ọkpụkpụ nyamwụ ọọwa lẹlẹ. ỊSọlụ, á ri ang oriri ka lee ọ-nwa enyi kpong-kpong ka, ẹ-ẹpwụ nya ẹnụtụrụ ịta ịịwa wuu.
10Ọlẹng ọhẹ ọlẹ kọ ri ọngọjụgbẹyị nya Ọngọlahị juwa e-epweji nya ịDamasịkọsị ọọwa, ká ẹnyị nyamwụ ri Ananịyasị. Ọọwa lẹ, Ọngọlahị a ya ẹla ta Ananịyasị ọọwa a-arụrụ lẹlẹ. Ọngọlahị yẹkẹẹ, “Ananịyasị ee!” Ananịyasị wẹ byoo yẹkẹẹ, “Ọngọlahị, m lẹẹ ẹgẹlẹ!”
11Ọngọlahị wẹ byoo yẹkẹẹ, “Ananịyasị, wuleji ká juwa jẹdịyẹ dịrẹ ụgbẹyị nya opeje ọlẹ kị wụrụ Opeje Ọkpụrụrụ ọlaanyị mẹ. Ká kele ka ẹpwa nya ọlẹng ọhẹ ọlụwa ọlẹ kị wụrụ ẹnyị nyamwụ iJudasị, kaka tịtọ wo nya ọlẹng ọkịla ọhẹ ọlẹ kọ bwu epweji nya ịTaasọsị, ká ẹnyị nyamwụ ri ịSọlụ mẹ. Chajị, ịSọlụ ọọwa lalẹẹ raabwọ ha Ohe Oluhye ụ-ụwa. 12ỊSọlụ ọọwa dọmwụ yẹ ọlẹng ọhẹ ọlẹ ká ẹnyị nyamwụ ri Ananịyasị a-arụrụ, kọ kele kaka yụbwọ nịrọ ịSọlụ ayịdang juwa raabwọ jwoo, chajị ká ịSọlụ ka jẹ́-ẹ yọyị myịmyị.”
13Ịnyị lẹ, Ananịyasị a wẹ byoo yẹkẹẹ, “Ọngọlahị ee! M wo oja chajị nya ịSọlụ ọwẹ bwu ọnụ nya iru nya angịnyị lụmẹ-lụmẹ, u-uhye nya iru nya ang ịtịpyọ la datị-datị ịlẹ ká ịSọlụ ọwẹ juwa họ angịnyị nyang lụmẹ-lụmẹ e-epweji nya iJerusalẹm! 14Ọngọlahị ee, ene ká ịSọlụ dọmwụ ka warị wẹ epweji nya ịDamasịkọsị ọlẹ lẹ, alegbeju nya angịkiliya nya Ohe Oluhye wuu, ya ọngịrị ha ịSọlụ yẹkẹẹ, nyị wu ọng myị́ ọng ọlẹ wuu kịị nyị myị la ẹnyị nyang ẹ-ẹgẹlẹ, kpa rụ kaka ju agba mẹ.”
15Ma, Ọngọlahị la wẹ byoo yẹkẹẹ, “Ananịyasị, wo mẹ! Hu ang ká rụ kele odu mẹ. Chajị, m chụ ịSọlụ ọwẹ kọ ka ri ang-abwọ ọ-kpa họ ụkụrwọ nya ẹrụ ọnyịịla chajị nya ẹnyị nyam ọ-ka kpa ya pyẹ je ala iJentayịlị wuu bala iru nya ịdịrịhụ bala anyị nya ala Isirẹlụ wuu ịnyịnyị lẹ. 16Chajị, am ayịdang juwa ka mẹjẹ ịSọlụ ọwẹ jaabwọ kọ ka yẹ akama kaka ba, chajị nya ẹnyị nyam am Ọngọlahị pyii ị-ịlahị ịnyịnyị lẹ.”
17Ịnyị, Ananịyasị a hu ang kele ka ẹpwa ọọwa lẹ, ọ yụbwọ nyamwụ nịra ịSọlụ, juwa byoo yẹkẹẹ, “Ọnyadahị ịSọlụ, Ọngọlahị iJisọsị ọlẹ kọ mẹ ịlọmwụ jẹng ụ-ụgbẹyị, ụka ká juwa warị wẹ ịDamasịkọsị, a dum ẹrụ warị wẹ ẹga nyang, chajị ká ka jẹ́-ẹ yọyị myịmyị bala ọ-ka ye ọngịrị nya Olegu Ịgọgọ nya Ohe Oluhye ịnyịnyị lẹlẹ.” 18Ọọwa lẹ, ịngịhyẹ a gba kpehe bwu ẹpwụ nya egbahị nya ịSọlụ ụ-ụwa ahyaahị, lala ego nya iyenyi lẹ, ịSọlụ a jẹ́ yọyị myịmyị lẹlẹ. Ịnyị, ịSọlụ a wuleji lẹ, ị hwọọ enyi Ohe ụ-ụwa lẹlẹ. 19Ụka ká ịSọlụ ri ang oriri lẹ, ọ la gogo myịmyị lẹlẹ.
ỊSọlụ Ya Ẹla nya Ohe Oluhye Ị-ịDamasịkọsị
Ịnyị, ịSọlụ a hụ ta angịjụgbẹyị nya iJisọsị ilepweji nya ịDamasịkọsị ẹnụtụrụ lụmẹ-lụmẹ lẹlẹ. 20Ụka ọọwa, ịSọlụ kele ka ebe ị-mẹ ẹla nya Ohe Oluhye jẹ ịlụwa, juwa ya ẹla nya Ohe Oluhye rụ́ iJisọsị dodehe ụ-ụwa ịnyịnyịịnyị yẹkẹẹ, “IJisọsị kpakpakpa a ri Ọnyẹwẹ nya Ohe Oluhye ịnyịlẹhị lẹ.”
21Ụka ọọwa, iru nya angịnyị ịlẹ kị wo ẹla nya Ohe Oluhye oyaya nya ịSọlụ ọọwa lẹ, ọ laa ahịbwuu lụmẹ kaka kpoye. Ịnyị, ị juwa tọ awụlẹ wo yẹkẹẹ, “Ị-ịSọlụ ọlẹ, a ri ọngọlẹ kọ kaa nwụ angịlẹ wuu kị myị la ẹnyị nya iJisọsị ọọwa i-iJerusalẹm kaka? M me ajị nyọka warị kaka wu angị myị la ẹnyị nya iJisọsị ọọwa ẹ-ẹgẹlẹ kpa rụ kele kịla alegbeju ikịla iya nya Ohe Oluhye kpangga, a tị́ du ká ịSọlụ warị wẹ epweji ọlẹ?”
22Ịnyị, ịSọlụ a juwa la ọngịrị gụ ọọwa-ọọwa myị́, ẹ-ẹpwụ nya ẹla nya Ohe Oluhye oyaya nyamwụ ụ-ụwa lẹlẹ. Ẹla oyaya nya ịSọlụ ọọwa ku ala iJuu ịlẹ kị juwa ị-ịDamasịkọsị wuu ọnụụka ọọwa ọnụ bwula ọlẹ ká ịSọlụ juwa da ẹla ọọwa wụlẹ gede gede ya jaa kpoye nya ịwẹẹ ọdada yẹkẹẹ, iJisọsị kpakpakpa nyaa ri ịKịrayịsị ọọwa ịnyịlẹhị lẹ.
23Ụka ká ẹnụtụrụ lụmẹ-lụmẹ chịpwụrụ kam lẹ, ala iJuu ịịwa a juwa me obyi nya igu ju ịSọlụ ụ-ụwa lẹlẹ. 24Ma, obyi omeme nyọka nwụ ịSọlụ nwụ ọọwa tị chị ehe pwụ ụrụ nya ịSọlụ ụka ọọwa. Ala iJuu ịịwa juwa gbe ọnụ nya ogirigba ọnyị myị ọnyị, o-bwu ka epweji nya ịDamasịkọsị ọọwa lodu bala alẹnụ chajị kị ka jẹ́-ẹ wu ịSọlụ kpa kaka nwụ. 25Ịnyị, angịjụgbẹyị nya Ọngọlahị ịlụwa ịhyẹ a kele kaka hu ịSọlụ ju ẹ-ẹpwụ nya udo ọtụka-ọtụka ọhẹ lụka nya odu lẹ, ị ya ori ju udo ọọwa, kpọọ hireji bwu uhye nya ugulọ kpoye kaka nọ e-eji odehe nya epweji ọọwa lẹlẹ.
ỊSọlụ Rụ Ka IJerusalẹm
26Ịnyị, ịSọlụ a rụ kele ka iJerusalẹm lẹ, ọ juwa tịtọ kọ ka kpa ịlọmwụ ka ẹpwarịrị nya angịjụgbẹyị nya iJisọsị ịlụwa lẹlẹ. Ma, ịwa wuu tị juwa juhi nya ịSọlụ nya ịlẹhị-ịlẹhị, chajị ị́ myị yẹkẹẹ, ịSọlụ nyị ri ọngọjụgbẹyị nya Ọngọlahị ịnyịlẹhị kpong-kpong ka. 27Ịnyị, ịBanabasị a kpa ịSọlụ kele ka ẹga nya alẹrụ ọnyịịla nya ịKịrayịsị lẹ, ọ ya ịSọlụ dodehe jaa ụ-ụwa lẹlẹ. Ọ ya jaa wuu jaabwọ ká ịSọlụ bwu yẹ Ọngọlahị ụ-ụgbẹyị nya ịDamasịkọsị bala jaabwọ ká Ọngọlahị ayịdang bwu ya ẹla ta ịSọlụ ụ-ụwa bala jaabwọ ká ịSọlụ ya ẹla nya Ohe Oluhye dodehe la ọngịrị ọngịrị la ẹnyị nya Ọngọlahị iJisọsị e-epweji nya ịDamasịkọsị ịnyịnyị. 28Ịnyị lẹ, alẹrụ ọnyịịla nya ịKịrayịsị ịịwa a ya ẹga da ha ịSọlụ pwọọ lẹ, ọ juwa ya ẹla nya Ohe Oluhye pyẹ ka ẹga myị́ ẹga i-iJerusalẹm lẹlẹ. 29Ọọwa lẹ, ịSọlụ a juwa ya ẹla nya Ohe Oluhye dodehe la ọngịrị-ọngịrị la ẹnyị nya Ọngọlahị iJisọsị je angịnyị ụ-ụwa lẹlẹ. Ọọwa lẹ, ịSọlụ a juwa kpa ịwẹẹ ọdada da ẹla nya Ohe Oluhye oyaya nyamwụ wụlẹ nya ịlẹhị-ịlẹhị ya je ala iJuu ịlẹ kị wo oja nya ala iGirisi ụ-ụwa lẹlẹ. Ma, angịịwa tị juwa tịtọ kị ka nwụ ịSọlụ. 30Ịnyị, ụka ká anyadịda nya ịSọlụ ẹ-ẹpwụ nya ịKịrayịsị ịlụwa jẹ́ ang chajị nya obyi omeme nya igu nya ịSọlụ ọọwa lẹ, ị kpọọ rụ bwu iJerusalẹm kele ka epweji nya iSisarịya lẹ, ị ya ịSọlụ du rụ bwu ụwa kele ka epweji nya ịTaasọsị lẹlẹ.
31Ịnyị, ịchọọchị nya Ohe Oluhye ịlẹ kị juwa ị-ịpyị nya iJudiya wuu bala ịGalili wuu bala ịSameriya, a juwa ẹ-ẹpwụ nya okpunyi lẹ, ị juwa nwa, juwa la gogo kịlahị-ịlahị lẹlẹ. Ịnyị, ala ịchọọchị wuu a juwa jẹdịyẹ ẹ-ẹpwụ nya uhi nya Ọngọlahị ojuju bala ọ-la ẹjẹ ọkpụ́kpụ nya Olegu Ịgọgọ bala o-juwa chị anyị da ịlaa ẹ-ẹpwụ nya iru ojuju ịnyịnyị lẹlẹ.
IPita Ka Epweji nya ILida Bala ỊJọpa
32Ụka ọọwa, iPita juwa ga ka ẹga myị́ ẹga kaka wụla angịnyị nya Ohe Oluhye yẹ ịnyịnyịịnyị, gbee kọ pwụ ẹga nya angịnyị nya Ohe Oluhye ịlẹ kị juwa e-epweji ọlẹ kị wụrụ iLida ịnyịnyị. 33Ụka ká iPita pwụ epweji nya iLida ọọwa, ọ yẹ ọlẹng ọhẹ ọlẹ ká ẹnyị nyamwụ ri Ẹnịyasị. Ẹnịyasị ọọwa á wuleji bwu ang ọ-da nọnọ nyamwụ myị́ ka, lala ẹka ineku gbẹgbịlẹ lẹ. Chajị, une nya ịnyịrọ nyamwụ ọhẹ gbu ba. 34Ịnyị lẹ, iPita a byoo yẹkẹẹ, “Ẹnịyasị ee, iJisọsị ịKịrayịsị họng uda lẹ. Wuleji godayị kọkọ, ká mwụ ang ọ-da nọnọ nyang bawụlẹ lẹẹlẹẹ mẹ.” Ọọwa lẹ, Ẹnịyasị a la gogo, wuleji godayị kọkọ i-ijata ijata ịnyịlẹhị lẹlẹ. 35Ịnyị, ụka ká ala iLida wuu bala ala ịCharọn yẹ uda ọhọhọ nya Ẹnịyasị ọọwa lẹ, ị yẹ irya da, myị la Ọngọlahị lẹlẹ.
36Ụka ọọwa, ọnyang ọhẹ ọlẹ kọ ri ọngọjụgbẹyị nya Ọngọlahị juwa e-epweji nya ịJọpa, ká ẹnyị nyamwụ ri ịTabita. Ẹnyị ọkịla nya ọnyang ọọwa ri ịDọọkasị, ọlẹ ká etu nyamwụ ri iyo ọlẹ kị wụrụ ẹrwa. ỊDọọkasị ọọwa ri ọnyang ọlẹ kọ kaa họ ụkụrwọ ọnyịịla lụmẹ lụka wuu. Ọ kaa da ikpehika ụbwọ lụmẹ ịnyịnyị. 37Ịnyị, ẹdụrụ a jụ ịDọọkasị ọọwa lụmẹ lụka ọọwa lẹ, ọ gbu lẹlẹ. Ụka kị hyo ogu nyamwụ enyi kpá lẹ, ị hwoo nụwa ẹ-ẹpwụ nya ube-oluhye ọhẹ lẹlẹ. 38Epweji nya iLida ọọwa bala ịJọpa ju awụlẹ chwẹẹ lụmẹ. Ịnyị, jaabwọ ká angịjụgbẹyị nya Ọngọlahị ilepweji nya ịJọpa wo oja yẹkẹẹ, iPita nyị juwa e-epweji nya iLida wẹẹ lẹ, ị du alẹng imiiye ịhyẹ ẹrụ kele kaka byi iPita yẹkẹẹ, “IPita, chuchuu, kẹwẹ ahyaahị-ahyaahị wẹ ẹga nyahị wẹẹ.” 39Ọọwa lẹ, iPita a wuleji ba alẹng ịịwa kele ka ịJọpa lẹlẹ. Ụka kị pwụ ụwa, ị kpa iPita kele ka ube-oluhye ọlẹ kị ya ogu nya ịDọọkasị ọọwa nọ lẹ, ọ yẹ iru nya ịhụ-egu ụ-ụwa kị juwa jida ju ogu ọọwa lẹlẹ. Ịnyị, ị juwa mẹ iru nya ịwụrụ ịlẹ ká ịDọọkasị họ ga haa wuu lụka ọlẹ kọ juwa la ọhịhị wẹẹ jẹ iPita lẹlẹ. 40Ma, iPita kwaa ịwa wuu rụ kpehe hi ẹga nya ogu ọọwa. Ịnyị, iPita a ya arụụ nyamwụ kụ eji, raabwọ ha Ohe Oluhye ụ-ụwa kpá lẹ, ọ ji kpata da ogu ọọwa lẹ, ọ yẹkẹẹ, “ỊTabita, wuleji bwula igu lẹẹlẹẹ mẹ.” Ịnyị, ụka ká ịTabita pyẹ ahị nyamwụ maa, kọ yẹ iPita lẹ, ọ wuleji hụhụ kọkọ lẹlẹ. 41Ụka ká iPita yụbwọ nyamwụ chị ịTabita lẹ, ọ wuloo eji godayị kọkọ lẹlẹ. Ọọwa lẹ, iPita a be ẹkọ wụrụ angịnyị nya Ohe Oluhye ịlụwa bala anyang ịhụ-egu ịịwa wuu lẹ, ọ hu ịTabita jwaa ụ-ụbwọ lahị-lahị lẹlẹ. 42Oja nya owuleji bwula igu nya ịTabita ọọwa ru ohi, ju ka ẹga myị́ ẹga nya ịJọpa wuu lẹ, iru nya angịnyị lụmẹ-lụmẹ, a myị la Ọngọlahị la ụ-ụwa lẹlẹ. 43IPita hụ e-epweji nya ịJọpa ọọwa ẹnụtụrụ lụmẹ-lụmẹ ẹ-ẹpwa nya ịSayịmọn ọhẹ ọlẹ kọ kaa họ ụkụrwọ nya egba nya iyo odudu ụ-ụwa.
Atualmente selecionado:
ỤKỤRWỌ nya ALẸRỤ 9: IBNO
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
Igede Bible © The Bible Society of Nigeria, 2019.