Baɗitari 1
1
Sakatə Hyel Baɗitə Namtə Su
1Akwa baɗitər su, antə Hyel alaktə vəi na amta ka duniya,
2Duniya ni kula dludzi, tsuwa kula su akwa,
tsuwa kuthlu an hartə kəra yimayeri na zurang ni.
Mambələr Hyel tsuwa akwa mwa ata kəra yimayeri.
3Antə Hyel pəla,
“Ndzi ka parakə wutədzi!”
Antə parakəu ku wutədzi.
4Antə Hyel wuta abbər parakə ni ɓɗaku.
Antə tsa ndəkəmta daɓwa parakə ni ka kuthlu ni.
5Antə tsa kəga parakə ni “Təpci”,
ka kəga kuthlu ni tsuwa “Viri”.
Pci ku təri antə viri ku kuri, tsan vir na ntangkəma.
6Antə Hyel pəla,
“Ndzi ka su laga apa lima wutədzi akwa daɓwa yimayeri
ka tsa ndəkəmta daɓwa yimayeri ni.”
7Antə Hyel ku namtə su na apa lima ni,
ka ndəkəmta daɓwa yimayeri na akira lima ni
ka yimayeri na amtari.
Tsuwa apani antə ku hara.
8Antə Hyel kəga thləma su na apa lima ni “Kutahyel”.
Pci ku təri antə vir ku kuri, tsan vir na suɗkur.
9Antə Hyel pəla,
“Ndzi ka yimayeri na akira kutahyel ni
tsaptədzi ata vəi duku,
kamnyar ka di ul'ula wutədzi.”
Tsuwa apani antə ku hara.
10Antə Hyel kəga thləma vəi na ul'ulari ni “Di”,
ka kəga thləma yimayeri na tsaptədzi ni “Manda”.
Antə Hyel wuta abbər ku hara ɓɗaku.
11Antə Hyel ku pəla,
“Ndzi ka di ptsantə su ptsəptsa na ata ya,
shanga su ptsəptsa na ata di na ana ya munya,
ka shanga nfwayeri na ata ya ka munya akwa kutari
kəlara nfwa ka jili yar ɗa.”
Tsuwa apani antə ku hara.
12Antə di ku ptsantə su ptsəptsa,
su ptsəptsa zumzum hang na ata ya
waskəi ka jiliyir ɗa.
Antə Hyel wuta abbər ku hara ɓɗaku.
13Pci ku təri antə vir ku kuri, tsan vir na makərkur.
14Antə Hyel pəla,
“Ndzi ka parakayeri wutədzi akwa kutahyel,
ka da ndəkɓəla daɓwa pci ka viri,
tsuwa ka da ndzi seɗa ar ncantə
sakayeri, ka virayeri, ka məvayeri.
15Ka da ndzi parakayeri amta akwa kutahyel,
ka da hamta parakəu ata kəra duniya.”
Tsuwa apani antə ku hara.
16Apani Hyel ku namtə parakayeri ol'ola suɗa,
ka parakəu na olari hara kuthlikur təpci,
ka parakəu na rakari hara kuthlikur aviri,
tsuwa tsa ku namtə sasəlkayeri.
17Antə Hyel pwi ɗa amtazi ata kutahyel,
kamnyar ka da mbəla ata kəra duniya,
18ka da hara kuthlikur təpci ka aviri,
tsuwa ka da ndəkɓəla daɓwa parakəu ka kuthlu.
Antə Hyel wuta abbər ku hara ɓɗaku.
19Pci ku təri antə vir ku kuri, tsan vir na nfwarkur.
20Antə Hyel pəla,
“Ndzi ka yimayeri nghyi ka bəri ar su na ka mpika,
ka ɗikayeri nghyantə kutahyel
akwa fəla ata kəra duniya.”
21Apani antə Hyel ku alaktə
mwaɓiyayeri na ol'ola ar kuta yimi,
ka shanga su na ka mpika na ana mwa
akwa yimi ka jiliyir ɗa,
ka shanga jili ɗikayeri na aɗi.
Antə Hyel wuta abbər ku hara ɓɗaku.
22Antə Hyel vədzə barka ala ɗa shang, akwa pəla,
“Ka giri ya ka giri yatədzi hang,
ka giri nghyantə mandayeri
ka ɗikayeri yatədzi ata kəra duniya.”
23Pci ku təri antə viri ku kuri, tsan vir na ntəfkur.
24Antə Hyel pəla,
“Ndzi ka duniya haɓəla suayeri na ka mpika shang,
mwaɓi kəi, kəga mwaɓi mtaku,
ka suayeri na ana mwa ka yimər kuta ɗa ata di,
kəga jiliyir ɗa.”
Tsuwa apani antə ku hara.
25Antə Hyel namtə mwaɓiyayeri ar mtaku na akwa duniya,
waskəi ka jiliyir ɗa,
ka namtə mwaɓiyayeri ar kəi, kəga jiliyir ɗa,
ka shanga su na ana mwa ka yimər kutari ata di, kəga jiliyir ɗa.
Antə Hyel wuta abbər ku hara ɓɗaku.
26Antə Hyel pəla,
“Ndzi ka mwa namtə mda
akwa dludzər mwa, ka apa mwa.
Ka da hara kuthlikur ata kəra kəlfayeri na akwa manda,
ka ata kəra ɗikayeri na ata kutahyel,
ka ata kəra mwaɓiyayeri ar kəi,
ka ata kəra shanga duniya,
ka shanga su na ana mwa ka kutari ata di.”
27Antə apani Hyel ku alaktə mda akwa dludzər ni,
akwa dludzər Hyel, antə tsa ku alaktə ni,
mdə sal ka mdə mwala, antə tsa alaktə ɗa.
28Antə Hyel ku vədzə barka ala ɗa ka pəla,
“Ka giri ya ka giri yatədzi hang,
ka giri nghyantə duniya, ka tsa ndzi akira giri,
ka giri hara kuthlikur ata kəra kəlfayeri na akwa manda
ka ata kəra ɗikayeri na ata kutahyel,
ka shanga su na ana mwa ata di.”
29Antə Hyel pəla,
“Nggədza, I ku hamta ala giri shanga su ptsəptsa na ana ya munya,
na ata ptsa ata kəlara bwar akwa duniya,
ka shanga nfwayeri na ana ya ka munya akwa kutari,
shanga ɗa ata ndzi susəma ala giri.”
30Amma aka shanga mwaɓi na akwa duniya,
ka shanga ɗikayeri na ata kutahyel,
ka shanga su na ana mwa ka yimər kutari ata di,
ka shanga su na ka mpika
I ku hamta ala ɗa shanga thlali na miraku
ka da ndzi susəmər ɗa.
Tsuwa apani antə ku hara.
31Antə Hyel ku wul shanga suayeri tə tsa namtə ni,
ka wuta abbər ku hara ɓɗaku ka duna
Pci ku təri antə vir ku kuri, tsan vir na ngkwakur.
Atualmente selecionado:
Baɗitari 1: KNB
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
KAKAƊU NA ƁƊAKKARKARA © Typeset by the CAP Division of the Bible Society of Nigeria, 2014.