JOHANU 10
10
1NUGBO, nugbo, wẹ yẹn dọ hlan mì, Mẹdepope he ma biọ apó lẹngbọ tọn mẹ gbọn hòngbo ji, ṣigba hẹji gbọn aliho devo, ajotọ de wẹ ewọ podọ whébétọ. 2Ṣigba mẹhe biọ e mẹ gbọn hòngbo ji, ewọ wẹ lengbọhotọ lẹngbọ lẹ tọn de. 3Ewọ lọ wẹ hònjidetọ hùnhòn na; lẹngbọ lẹ sọ sè ogbe eton: ewọ sọ ylọ oyín lẹngbọ etọn lẹ tọn, bo so plan ye jegbonu. 4Whenuena é hẹn etọn titi lẹ jegbonu, é yí nukọn na ye, lẹngbọ lẹ sọ hodo e: na yé yón ogbè etọn wutu. 5Jonọ wẹ yé ma nọ hodo ṣigba bo na hònyi sọn e de: na yé ma yón ogbe ojono lẹ tọn wutu. 6Oló he wẹ Jesu dọ hlan yé: ṣigba yé ma tunwun etẹwẹ onú he é dọ hlan yé nẹle yín.
7Enẹwutu Jesu vọ dọ hlan yé, dọ, Nugbo, nugbo, wẹ yẹn dọ hlan mì, Yẹn wẹ ohon lengbọ ton. 8Ajotọ po whébétọ po wẹ omẹ he ko wá jẹnukọn na mi lẹpo: ṣigba lengbọ lẹ ma sè yetọn gba. 9Yen we ohòn lọ: eyín mẹde biọ họmẹ gbọn dẽ, ewọ lọ wẹ yè na whlẹngan, ewọ nasọ biọ họmẹ bo nasọ tọ́njegbonu, bo nasọ mọ kanlindugbo. 10Ajotọ ma wá, adavo dọ e nido fìnnú bo hù, bo vasúdo: yẹn wá na yé nido tindo ogbè, yèdo na yé nido tindo sugege. 11Yen wẹ lẹngbọhọtọ dagbe lọ: lẹngbọhọtọ dagbe zé ogbè etọn dai na lẹngbọ lẹ 12Ewọ he yín pakanọ de, he ma yín lẹngbọhọtọ de, mẹhetọn titi lengbọ lẹ ma yín, é mo ohia ja, bo sọ jo lẹngbọ lẹ dai, bo hòn yì: ohia sọ wle yé, bo sọ vúnvún lẹngbọ lẹ pé. 13E hònyi, na pakanọ de wẹ ewọ wutu, é ma sọ hòpọnna lẹngbọ lẹ gba. 14Yẹn wẹ lengbọhotọ dagbe lọ, yẹn sọ yón lẹngbọ ṣie titi lẹ, ṣie titi lẹ sọ yón mi. 15Yèdọ dile Otọ́ yón mi do, bọ yẹn sọ yón Otọ́: yẹn zé ogbé ṣie liai na lẹngbọ le. 16Podọ yen sọ tindo lẹngbọ devo he ma yín apó he mẹ tọn: ye wẹ yẹn ma sọgan nọ ma hẹn wá ga, yé nasọ sè ogbè ṣie; apó dopo wẹ é na yín, lẹngbọhọtọ dopo. 17Enẹwutu wẹ Otọ́ yiwanna mi, na yẹn ze ogbẹ ṣie liai wutu, na yẹn nido vó ẹ yí. 18Mẹde ma yí i sọn dẽ gba, ṣigba yẹn zé e liai dedẽsi. Yẹn tindo ojlọjẹ nado zé e liai, bo sọ tindo ojlọjẹ nado vó ẹ yí. Osén he wẹ yẹn ko mọyi sọn Otọ ṣie de.
19Kinklan de sọ vọ tin to Ju lẹ ṣẹnṣẹn na ohó helẹ wutu. 20Ome susu to yé mẹ sọ dọmọ, Ewọ tindo aovi de, nulunọ sọ wẹ; etẹwutu wẹ mì to ohó etọn se? 21Mẹdevo lẹ dọmọ, Ehelẹ ma yín ohó mẹhe tindo aovi de tọn gba. Be aovi de sọgan hùn nukun nukuntọ́nnọ lẹ tọn?
22E sọ yín dọ to Jelusalẹm wẹ hunwhẹ awuyìnyì tọn te, é sọ yín ojlẹ avivọ tọn. 23Jesu sọ to zonlimzin to templi mẹ, to hònnuwá Sọlomọni tọn me. 24Enẹwutu Ju le wa ledo e pe, bo dọ hlan en, dọ, Navẹ hie na hẹn mi to númamọjẹnugo me dẹn sọ? Eyín hie wẹ Klisti lọ dọ na mí gbangba. 25Jesu sọ gblọnna yé, dọ, Yẹn ko do na mì, mì ma yise: azon he yẹn to wiwa to oyín Oto ṣie tọn me, ehelẹ to kunnude na mi 26Ṣigba mì ma yise; na mì ma yín lẹngbọ ṣie le me tọn wutu, kedẹdile yen dọ na mì. 27Lẹngbọ ṣie le se ogbè ṣie, yen sọ yón ye, ye sọ nọ hodo mi: 28yẹn sọ na ogbè madopodo hlan ye, yé ma na dòn gbede, mede ma so to na dọn ye sún son alọ ṣie mẹ. 29Otọ́ ṣie, mẹhe na yé hlan mi, klohu yi ome pó; mede ma tin he sọgan don nude sún sọn alọ Otọ́ lọ tọn me 30Dopo wẹ yẹn po Otọ́ po. 31Ju lẹ so vo ze ozannu daga nado dlẹn do e. 32Jesu gblọnna yé do, Azón dagbe susu wẹ yen yí hia mì sọn Otọ́ de; ete to azon nele mẹ we mì to zannu dlẹn do mi na? 33Ju le sọ gblọn nẹ, dọ, Mìwlẹ ma to zannu dlẹn do we na azọ́n dagbe de gba; ṣigba na nuzinzan; podo hie he yín gbẹtọ yí dewe do basi Jiwheyẹwhe wutu. 34Jesu sọ gblonna yé, dọ, Be yè ma wlan to osẹn mìtọn medọ, Yẹn dọ, Yẹwhe we mì? 35Eyín é ylo yé mẹhe de ohó Jiwheyẹwhe tọn wá le dọ Yẹwhe (podo owé wiwe lọ ma sọgan yín hinhẹn gbà gba), 36be mì sọ dọ na ewọ ton mehe Otọ́ klandowiwe, bo sọ dohlan aihọn mẹ, dọ, Hie to nùzan; na yen do, Ovi Jiwheyẹwhe tọn wẹ yen wutu? 37Eyín yẹn ma wà azón Otọ́ ṣie tọn lẹ, mì yí mi se blo. 38Ṣigba eyín yẹn basi yé, eyín mì ma yí mi se, mì bo yí azón lẹ se: na mì nido yọnẹn, bo sọ tunwun dọ, Otọ́ tin to yẹn mẹ, podọ yẹn to Otọ́ mẹ. 39Yé sọ vó din nado wlé e: ewọ sọ jẹgbonu yì sọn alọ yetọn mẹ.
40E sọ vó gọyì Jọdani godo fie Johanu to bibaptizi te to whéwhéwhenu; fine wẹ é nọnọ̀. 41Mesusu sọ wá e de; yé dọmọ, Johanu nugbonugbo ma basi ohia de gba: ṣigba núhe Johanu dọ na dawe he tọn lẹpo wẹ nugbo 42Omẹ susu sọ yí i se to finẹ.
Atualmente selecionado:
JOHANU 10: BWL23
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
Holy Bible in Gun-Alada © Bible Society of Benin and Bible Society of Nigeria, 1923.