Jang 6
6
Yàng Jesu tòm Galile lơh piang lă gơlik gơs oă
(Mathiơ 14:13-21; Mak 6:30-44; Luka 9:10-17)
1Tơnơ̆ mơ hơ̆, Yàng Jesu tiă đah ne dàlềng Galile, hơ̆ la dàlềng Tiberias. 2Gơs dô mpồl làng bol oă jat Kơnràñ, bơh neh gŏ ală tềl krơi Kơnràñ lơh ală cau kòp jê in. 3Yàng Jesu guh hơđang mơnơm, nggui tềng hơ̆ bal mơ ală cau bơtê Kơnràñ dê. 4Tŭ hơ̆, bơta pơjum sa Lòt Gan la dô bơta pơjum sa làng bol Juda dê mòr di. 5Yàng Jesu pò mat tơnggòr, gŏ dô mpồl làng bol oă tus hơ Kơnràñ, gen đơs mơ Philip lah: “Ntềng đah bol he rwat piang lă tồ bol do in sa taih?” 6Kơnràñ đơs behơ̆ nàng lòng khai, bơh Kơnràñ neh git bơta Kơnràñ rơp lơh. 7Philip ho lah: “Bàr rhiang dơnie#6:7 Dô dơnie la jền tơngai dô ngai lơh broă. Sền jơnau cih kah tòm Mat 18:28. rwat piang lă pà kòp nă in dô êt kung ò tơl sơl.” 8Gơs dô nă cau bơtê la Andre, oh Simôn Pier dê, đơs lah: 9“Do gơs dô nă kơnòm klau gơs pram nơm piang lă kòi mi mơ bàr nơm ka, mơya cau oă kàr do gen kàr hơ̆ ò tơl dô êt lơi.”
10Yàng Jesu đơs lah: “Sồr tĕ bol khai nggui.” Mơ tai, tiah hơ̆ gơs oă ñhơt. Behơ̆ làng bol nggui, gơs pơgap pram rbô nă cau klau. 11Yàng Jesu ai piang lă kòi mi, ưnngài, lồc behơ̆ pà ală cau neh nggui in; ka kung behơ̆ sơl, bol khai kòñ kàr lơi di lơm. 12Tŭ bol khai neh sa hòm rau, gen Kơnràñ đơs mơ ală cau bơtê lah: “Dòñ tĕ ală pet piang lă tơngkah, tồ gơ in ò roh dô pet lơi.” 13Behơ̆ bol khai dòñ ală pet tơngkah bơh pram nơm piang lă, tơnơ̆ mơ tŭ ală cau neh sa rau, gen ơn bềng jơt bàr bài.
14Behơ̆ ală cau gŏ tềl krơi Yàng Jesu neh lơh, gen đơs lah: “Cau do ngan la cau gơnoar hwơr#6:14 Sền jơnau cih kah tòm 1:21. pal tus tòm dunnia.” 15Yàng Jesu git bol hơ̆ rơp tus bơtào bơklơn Kơnràñ lơh gơs bơtau, gen pleh hơđang mơnơm ơm is dô nă.
Yàng Jesu lòt hơđang nha dàlềng
(Mathiơ 14:22-33; Mak 6:45-52)
16Tòm tŭ mho mang, ală cau bơtê mù di gah dàlềng, 17mut tòm dô nơm ơhò mơ tiă đah ne dàlềng nàng tus hơ Kapenaum. Trồ neh mang, mơya Yàng Jesu òhềt tus hơ bol khai. 18Càl dờng khồm tian gơs dàlềng lơnggac ngan. 19Tòm tŭ neh wàs pram hala prau kơsồ,#6:19 Js: 25 hala 30 ektadơ. Dô ektadơ pơgap 185 m. bol khai gŏ Yàng Jesu lòt hơđang nha dàlềng, mòr tus rềp di ơhò, gen bol khai rngòt ngan. 20Mơya Kơnràñ đơs lah: “Añ do, bañ rngòt.” 21Bol khai kòñ rò Kơnràñ mut tòm ơhò, gen tŭ hơ̆ mo ơhò ơm di gah dàlềng la tiah bol khai kòñ lòt.
Piang lă bơta kis dê
22Ngai tơnơ̆, mpồl làng bol ơm di gah đah ne dàlềng gŏ mìng dô nơm ơhò dềt lơm, mơ git Yàng Jesu ò hào ơhò hơ̆ bal mơ ală cau bơtê, gơs mìng cau bơtê lòt lơm. 23Mơya gơs ală ơhò ndai bơh Tiberias lòt tus rềp di tiah bol khai neh sa piang lă tòm tŭ Yàng Jesu neh ưnngài rau. 24Behơ̆ tòm tŭ mpồl làng bol gŏ Yàng Jesu ò ơm tềng hơ̆, ală cau bơtê kung ò sơl, gen bol khai hào ală ơhò ne mơ tiă hơ Kapenaum nàng jòi Yàng Jesu. 25Tòm tŭ bol khai bàn Kơnràñ di gah đah ne dàlềng, gen đơs lah: “Ơ Rabi, tŭ lơi ồng lòt tus tềng do taih?” 26Yàng Jesu ho lah: “Di ngan, Añ đơs ngan mơ bol mê, bol mê jòi Añ ò di bơh neh gŏ ală tềl krơi, mơya bơh bol mê neh sa hòm piang lă jat be nùs kòñ. 27Bañ lơh broă bơh phan sa roh rui, mơya bơh phan sa gam wơl tus di bơta kis gam sùm sùm, la bơta Kòn Mơnus rơp ai bol mê in, bơh hơ̆ la Bơtau mơ Yàng Tom Trồ la Bèp neh tap ƀang kì cơng tàng.” 28Bol hơ̆ đơs lah: “Ñchi bol hi pal lơh nàng geh lơh broă Yàng Tom Trồ dê taih?” 29Yàng Jesu ho lah: “Broă Yàng Tom Trồ dê hơ̆ la bol mê dòn Bơtau mơ Kơnràñ neh sồr lòt tus.”
30Bol khai đơs lah: “Behơ̆ gen, ồng lơh tềl krơi lơi nàng bol hi in gŏ mơ dòn taih? Ñchi ồng lơh taih? 31#Neh 9:15; Lik 16:4,15; Đơs Crih 78:24; 105:40.Ồng pàng bol hi dê neh sa mana tòm ƀlàng ngềt ngơt jat be jơnau neh cih lah: ‘Kơnràñ neh ai bol khai in sa piang lă bơh đang trồ.’” 32Yàng Jesu đơs lah: “Di ngan, Añ đơs ngan mơ bol mê, ò di Môise neh ai bol mê in piang lă bơh đang trồ ò, mơya Bèp Añ ai bol mê in piang lă ngan bơh đang trồ. 33Bơh piang lă Yàng Tom Trồ dê la piang lă bơh đang trồ mù mơ ai bơta kis dunnia in.” 34Behơ̆ bol hơ̆ đơs lah: “Ơ ồng, dan ai piang lă hơ̆ bol hi in sùm sùm.” 35Yàng Jesu đơs lah: “Añ la piang lă bơta kis dê, cau lơi lòt tus hơ Añ gen ò gơs tŭ lơi jơgloh, mơ cau lơi dòn Añ gen ò gơs tŭ lơi tơhìr. 36Mơya Añ neh đơs mơ bol mê lah: bulah bol mê neh gŏ Añ, mơya gam ò dòn. 37Jơh ală cau Bèp ai Añ in, gen rơp lòt tus hơ Añ; cau lơi lòt tus hơ Añ, gen Añ ò gơs tŭ lơi sang khai hơ bơdìh ò. 38Tài bơh Añ bơh đang trồ mù, ò di nàng lơh jat nùs kòñ Añ, mơya lơh jat nùs kòñ Bơtau neh sồr Añ lòt tus. 39Do la nùs kòñ Bơtau neh sồr Añ lòt tus: Hơ̆ la jơh ală cau Kơnràñ neh ai Añ in, gen Añ ò lòi roh dô nă lơi, mơya Añ pal lơh bol khai in kis wơl tòm ngai lồi dut. 40Do la nùs kòñ Bèp Añ jê: Hơ̆ la kòp nă cau lơi sền đal Kòn mơ dòn Kơnràñ gen geh bơta kis gam sùm sùm, mơ Añ rơp lơh cau hơ̆ in kis wơl tòm ngai lồi dut.”
41Tài bơh Kơnràñ neh đơs lah: “Añ la piang lă bơh đang trồ mù,” gen tàng ală cau Juda yoam Kơnràñ, 42lah: “Hơ̆ ò di la Jesu kòn Jôsep dê, bol he git mè bèp khai ò ơ? Behơ̆ mbe khai đơs lah: ‘Añ bơh đang trồ mù, taih’?” 43Yàng Jesu ho lah: “Bol mê bañ yoam tai. 44Dilah Bèp, la Bơtau sồr Añ lòt tus, ò hwài tus, gen ò gơs cau lơi rgơi lòt tus hơ Añ, mơ Añ rơp lơh cau hơ̆ in kis wơl tòm ngai lồi dut. 45#Esai 54:13.Tòm ală sră gơnoar hwơr neh cih lah: ‘Jơh tơl nă cau rơp geh Yàng Tom Trồ bơto sồr.’ Kòp nă cau lơi neh iat mơ bơtê bơh di Bèp, gen lòt tus hơ Añ. 46Òhềt gơs cau lơi neh gŏ Bèp ò, mìng Bơtau bơh Yàng Tom Trồ mơ tus, Bơtau hơ̆ neh gŏ Bèp. 47Di ngan, Añ đơs ngan mơ bol mê, cau lơi dòn Añ gen geh bơta kis gam sùm sùm. 48Añ la piang lă bơta kis dê. 49Ồng pàng bol mê dê neh sa mana tòm ƀlàng ngềt ngơt, gen kung chơt. 50Do la piang lă bơh đang trồ mù, tồ cau lơi in sa gen ò chơt ò. 51Añ la piang lă kis bơh đang trồ mù, dilah cau lơi sa piang lă hơ̆, gen rơp kis gam sùm sùm, mơ piang lă Añ rơp ai, tài bơh bơta kis dunnia dê, hơ̆ la poac Añ.”
52Tài bơh hơ̆, ală cau Juda tòm pơndang bal mơ đơs lah: “Mbe rgơi cau do ai poac khai dê bol he in sa taih?” 53Yàng Jesu đơs mơ bol khai lah: “Di ngan, Añ đơs ngan mơ bol mê, dilah bol mê ò sa poac mơ ò hùc mhàm Kòn Mơnus dê, gen ò gơs bơta kis gam sùm sùm. 54Cau lơi sa poac Añ mơ hùc mhàm Añ, gen geh bơta kis gam sùm sùm; Añ rơp lơh cau hơ̆ in kis wơl tòm ngai lồi dut. 55Bơh poac Añ jê ngan la phan sa, mhàm Añ jê ngan la phan hùc. 56Cau lơi sa poac Añ mơ hùc mhàm Añ, gen ơm tòm Añ mơ Añ ơm tòm cau hơ̆. 57Be Bèp la Bơtau kis neh sồr Añ lòt tus, mơ Añ kis bơh Bèp be lơi, gen cau lơi sa Añ kung rơp kis bơh Añ behơ̆ sơl. 58Do la piang lă bơh đang trồ mù, ò di be mana mơ ồng pàng bol mê neh sa gen kung chơt; cau lơi sa piang lă do gen kis gam sùm sùm.”
59Yàng Jesu đơs ală bơta hơ̆ tòm tŭ bơto sồr tòm hìu jum tòm Kapenaum. 60Gơs oă cau bơtê Kơnràñ dê kơno bơta do gen đơs lah: “Jơnau do kalke ngan, ñcau rgơi git wă taih?” 61Mơya Yàng Jesu git is ală cau bơtê Kơnràñ dê yoam bơh jơnau hơ̆, gen đơs lah: “Jơnau do lơh bol mê in gơtup tìs ơ? 62Behơ̆ dilah bol mê gŏ Kòn Mơnus guh hơ tiah Kơnràñ neh ơm lài òr, gen mbe bol mê rơp lơh taih? 63Hơ̆ la hwềng ai bơta kis, poac să ò kwơ dô êt lơi. Ală jơnau Añ neh đơs mơ bol mê hơ̆ la hwềng mơ bơta kis. 64Mơya dô êt nă tòm bol mê gơs cau ò dòn.” Bơh Yàng Jesu neh git bơh sơnròp ñcau la cau ò dòn, ñcau la cau rơp pơrlơ̆ dră di Kơnràñ. 65Kơnràñ đơs lah: “Tài bơh hơ̆ tàng Añ neh đơs mơ bol mê lah dilah Bèp ò ai, gen ò gơs cau lơi rgơi lòt tus hơ Añ.”
Pier yal tơlik Yàng Jesu la Bơtau Sàng Goh Yàng Tom Trồ dê
66Bơh tŭ hơ̆, gơs oă cau bơtê Kơnràñ dê ruc wơl, ò lòt jat Kơnràñ tai. 67Behơ̆ Yàng Jesu đơs mơ jơt bàr nă cau bơtê lah: “Ai bol mê kung kòñ ruc wơl sơl ơ?” 68#Mat 16:16; Mak 8:29; Luk 9:20.Simôn Pier ho Kơnràñ lah: “Ơ Kơnràñ, bol hi rơp lòt jat ñcau taih? Kơnràñ gơs ală jơnau bơta kis gam sùm sùm dê. 69Bol hi neh dòn mơ git lah, Kơnràñ la Bơtau sàng goh Yàng Tom Trồ dê.” 70Yàng Jesu ho lah: “Añ ò di neh sac bol mê la jơt bàr nă cau bơtê ơ? Mơ gơs dô nă cau tòm bol mê la cà.” 71Kơnràñ đơs bơh Juda kòn Simôn Iskariôt, la dô nă tòm jơt bàr nă cau bơtê, bơh să tòm khai tơnơ̆ wơl rơp pơrlơ̆ dră di Kơnràñ.
Atualmente selecionado:
Jang 6: KPM2018
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
© 2018 United Bible Societies. All rights reserved.