Sơnròp Gơlik Gơs 8
8
Jơh dà kŏ
1Mơya Yàng Tom Trồ kah wơl Nôe mơ jơh ală phan poan jơng tòm brê, mơ ală phan poan jơng tòm hìu ơm bal mơ khai tòm ơhò, gen Yàng Tom Trồ lơh dô nơm càl khồm rbơt hơđang ù gen dà gơ mù. 2Ală dà cat bơh cìr mơnồng mơ ală tơrnil dà hơđang trồ til wơl, mìu bơh trồ ò dùh tai. 3Dà rhòi rhòi soat bơh dê ù mơ tơnơ̆ mơ tŭ dô rhiang pram jơt ngai dà gơ soat. 4Tòm ngai jơt poh, kơnhai poh hơ̆ ơhò ơm hơđang ală mơnơm Ararat dê. 5Mơ dà soat rhòi rhòi tus dê kơnhai jơt, tòm ngai dùl kơnhai hơ̆, mpòl ală bồ mơnơm.
6Tơnơ̆ poan jơt ngai, Nôe pò mpồng dềt khai neh lơh dê ơhò, 7mơ tơlik dô nơm kơnđà, mơ gơ par ma kiau tus dê tŭ dà soat hơđang ù. 8Mơ khai kung tơlik dô nơm ntòp sơl nàng lòng sền dà soat tòm ù hala òhềt. 9Mơya ntòp jòi ò gơs tiah lơi nàng rơp gen gơ par rê wơl mơ khai tòm ơhò, tài bơh dà gam bềng làm hơđang ù. Nôe pò tê kup wơl ntòp mơ tơmut wơl tòm ơhò bal mơ khai. 10Khai gơn poh ngai tai, gen tơlik wơl ntòp bơh ơhò; 11tus dê mho ntòp rê wơl mơ khai, mơ do, tòm sơmoar#8:11 Cil: kơmbung. gơ gơs dô nơm nha ôlibe tơlir, gen Nôe git dà mòr soat bơh dê ù. 12Khai gơn poh ngai tai, gen tơlik ntòp, mơ gơ ò tai rê wơl mơ khai.
13Tòm ngai dùl, kơnhai dùl, nam prau rhiang mơ dùl rài Nôe dê, dà neh soat bơh dê ù, gen Nôe pò rkàng ơhò mơ sền; ne, ù neh rañ. 14Tòm ngai bàr jơt poh kơnhai bàr, ù neh rañ rsơh rau.
Nôe lik bơh ơhò
15Gen Yàng Tom Trồ đơs mơ Nôe lah: 16“Lik tĕ bơh ơhò, mê, bau mê, ală kòn mơ ală ƀan mê dê. 17Lam lik tĕ bal mơ mê jơh ală phan kis neh ơm bal mơ mê: sềm, phan poan jơng tòm hìu, phan wìn nsròng hơđang ù, tồ bol gơ in ơm làm hơđang ù, mơ tơnggơs mơ bơtơl oă hơđang ù.” 18Behơ̆, Nôe mơ bau khai, ală kòn klau mơ ală ƀan khai lik bơh dê ơhò. 19Jơh ală phan poan jơng, jơh ală phan wìn nsròng, jơh ală sềm mơ jơh ală phan wañ hơđang ù pơnjat be jơi gơ gen lik bơh dê ơhò.
Nôe ơn phan chu duh khoai
20Nôe lơh dô nơm cơnòng duh khoai Yàng Jehôwa in. Khai kup ală phan poan jơng goh, ală sềm goh, ơn phan chu duh khoai hơđang cơnòng duh khoai. 21Yàng Tom Trồ ƀô kơnhồl bơlhu mơ đơs tòm nùs Kơnràñ lah: “Añ ò srat sơntơm ù bơh kòn mơnus tai, bơh ală bơta kơlôi tòm nùs kòn mơnus la iơh bơsak bơh tòm tŭ gam kơnòm, Añ rơp ò tơnroh#8:21 Cil: peh, pờng, tơnchơt. tai ală phan kis be Añ neh lơh.
22Tòm tŭ plai ù gam gơs,
gen kơnhai sih mơ kơnhai toès, mrềt mơ duh,
kơnhai duh mơ kơnhai noat, ngai mơ mang,
rơp ò gơs tŭ lơi jơh.”
Atualmente selecionado:
Sơnròp Gơlik Gơs 8: KPM2018
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
© 2018 United Bible Societies. All rights reserved.