Лукара йибкьыд Шадды Хабар 3
3
ЯхӀйе-пайгъампарад гвалах
1ПагьӀчаагьашды ПагьӀчаа Тиберий кьухьды йиъид цӀухьудхьусды сыда Иудеядид кьухьды Понтий Пылат йиъид гедеэне, Ирод Галилеядид кьухьды йиъид гедеэне, гьанийды шу Филипп – Итуреядид не Трахонитидадид кӀайсар йиъид гедеэне, Лисаний – Абиленадид кӀайсар йиъид гедеэне, 2сахьусды дибирер Аннад на Кайафды вахтинди, Аллагьара къума Захарийды дух ЯхӀйе-пайгъампарахда ун гьыъыри. 3Ти ки Иордандид аа-уу сиъин чӀирбыр йиъидухъунды гъургъара каӀчӀури, илсан Йинчыы инаамиш гьаъара, гьадид лышан бадаана хьед гъӀыйхӀаӀс вылцӀара, гунаабыр темиз хъишин бадаана. 4Исайе-пайгъампарад китабак мисе кихьир ани йиъи:
«Къума ад гыдзырад сес виъи:
„Илагьиес рахъӀ ачых ваъ,
дуьздыбыр гьаъ гьанийды джыгъырбыр:
5дерема накьв ыхъывӀыхӀ,
дуьз хьыъыхь кьӀырыкӀбыр,
накьудид хъӀваӀрбыр дуьзды рахъӀ кал хьыъыхь –
6гьа гедеэне гьагваси ешемиш дуруъудухъундыбишис Йинчид куьмег“».
7ЯхӀйе-пайгъампарара хьед саъас хьур джухда кӀабал-кӀабална дуруъуд илсанашде рухьурай:
– Ггарашды улмат! Гьал и ваӀде гьухьуд, ваӀ гиидхьуси хьур дивындиклаа? 8ВаӀ йикӀидаана инаамиш дишир ад выхьды гвалахмыхьван гьагваъ!
Гьухьусды камаъ йикӀиклаана: «Ихьды дид Ибрайим-пайгъампар йиъи» хьур! За рухьура ваӀде: Йинчире гьеми къатылмыклаа Ибрайим-пайгъампарас хынимер даъаси. 9Балта, гьӀазыр гьыъыр, гине а хукумыд бегеде: йыхды емиш джывылцӀад хук кеэвир цӀиыы хуувулгъад и.
10– Бес шыв гьаъаси е? – хулкарай гьанийдаа элдире.
11– КьӀваӀб ухун ание са адишнийс вийихь, – рухьурай ЯхӀйе-пайгъампарара. – Улесды ание ки гьааса гьыъыхь.
12Хьед гъӀыйхӀаӀс йидкьыри кире сытӀа гьаъабыр ки. Гьабише хулкара гьанийдаа:
– МагьӀалим, е шыв гьыъын лазим йиъи?
13– Лазим йиъидыыла балад мыягъӀ, – джываб хъывылцӀара ЯхӀйе-пайгъампарара.
14– Е шыв гьыъын лазим йиъи? – хулкара эскереше.
– Тараш маъ, хӀаӀмаӀаӀбуш. Дуллухаа рази дишир, гъийкьаъ.
15Элдире Мусуд гуьзет гьаъара ай. Сиенебише йикӀиклаана фикир ваъара ай, яраб ЯхӀйе-пайгъампар Мусуд йиъимий хьур.
16ЯхӀйе-пайгъампарара сиенебишды улихьде рухьура: За ваӀа хьед сыъыри. Амма йиъина а Ти, захъаъ гуджлид. Зы гьанийды шаламад багъ саагъус лейих диш. 17Гьанийды хыле бер ха, йыггырыы язуб лувулхас, хьытӀ Гьание гъӀаӀнды хала ягъмиш ваъаси, пылбыр цӀе иеси.
18Гьаасад на мадды балад чӀилмыхьван ЯхӀйе-пайгъампарара илсанашды кӀабалбыр хӀаӀаӀр гьаъарай. 19Амма тетрарх Ирода, джуды на джуды шуд къари Иродиадад гвалахбыр ашгара гьыъыйне 20мадды джу гьыъыд бейабырвалдыбыр ЯхӀйе-пайгъампарара хьуъ лийийне, ЯхӀйе-пайгъампар дустахди ийири, ми белаа ки уу кыхъӀывхӀыр.
Илагьиед РухӀ ГьӀасаа руъура
21Сиене халкь хьидик кувчӀудыыла хъуъ, ГьӀасара ки хьед гъӀыйхӀыри. Гьание дугьӀа гьаъад гедеэне, хӀал ачых йишири. 22Гьанийыы хӀаляа саъ Илагьиед РухӀ сидхьури лирхьвадид дуьнди ана. ХӀаляа ки сесед ун йишири: «Вы изды гирамигды Дух йиъи, Вы Изды йикӀид панаа виъи».
ГьӀасад атабабыер
23ГьӀасара джуды къуллух ваъара каӀчӀуйне, Гьанийды хьибцӀыр сен руъура ай. Гьа йиъий, илсанашис гьагуд кал, Йисухьды дух, ти – Элид дух. Мадад Гьанийды атабабыер: 24МатӀатӀ, Леви, Малки, Яннай, Йисухь, 25Маттитья, Амыц, Наум, Хесли, Нагъай, 26МагьӀатӀ, Маттитья, Шимьи, Иосех, Иода, 27Иоханан, Реса, Зерубавель, Шеальтиэль, Нери. 28Малки, Адди, Косам, Эльмадам, Эр, 29Иошуа, Элиезер, Иорим, МатӀатӀ, Леви, 30Симан, Иуда, Йисухь, Ионам, Эльяким, 31Малья, Минна, Маттата, Натан, Давыд, 32Ишай, Овед, Боаз, Салман, Нахшон, 33Амминадав, Админ, Арни, Хецрон, Перец, Иуда, 34Якьуб, Исакь, Ибрайим, Терах, Нахор, 35Серуг, Реу, Пелег, Эвер, Шалах, 36Кеинан. Арпахшад, Сим, НухӀ, Ламех, 37Метушелах, Энох, Иеред, Махалалэль, Кеинан, 38Энош, Сет, Адам – Йиниш диъий.
Atualmente selecionado:
Лукара йибкьыд Шадды Хабар 3: RUT
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
© Библие мадды чӀилмыы хъывгад Институтара, 2004