Génesis 9
9
Kyaj b'ant ti'j jun yol tu'n Dios tuk'il Noé
1Kub' ky'iwla'n Noé tu'n Dios kyuk'ix qe tky'ajal, ex xi tma'n kye kyja': Che k'wa'line, chmet-x kyb'aje, ex kynojsame twitz tx'otx'. 2Che xob'el kywitze kykyaqil txkup twitz tx'otx', kykyaqil qeju in che lipan twitz kya'j, qeju in xi kyjaqu'n kyk'u'j twitz tx'otx' ex qeju ate' tuj mar; kykyaqil qe jlu che tel tjaq' kykawb'ile. 3Tkyaqil txkup itz' ex in yukch k'ajb'el te kychi'ye. Ik tza'n o txi nq'o'ne awal te kynik'b'eb'le, ikxtzun ja'lo tkyaqil in xi nq'o'ne kyeye te kynik'b'eb'le. 4O'kx mi'n txi kychyo'ne chib'j atx chik' tuj, tu'nju atzun ta' chwinqlal tuj chik'. 5K'okel tuj xjel wu'ne aju kb'el b'yonte jun xjal, qa jun txkup ma kub' b'yonte ex qa jun xjal ma kub' b'yonte juntl; il ti'j k'okel tuj xjel wu'ne.
6Qa at jun ma kub' b'yonte jun xjal, ax juntl xjal kb'el b'yonte te, tu'nju kub' tb'incha'n Dios xjal ik tza'nx te tilb'ilal.
7Atzun kyeye, che k'wa'line, chmet-x kyb'aje, ex kynojsame twitz tx'otx', chi Dios.
8Xi tma'ntl Dios te Noé ex kye tky'ajal kyja': 9Kyb'intze, kyjel b'ant ti'j jun nyole kyuk'ile ex kyuk'il qe kyiyjile che ul itz'j te tib'ajxi, 10kyuk'ix kykyaqil qe txkup ate' kyuk'ile, qeju e je'tz tuj matij barc; qe chyu'j ex txqantl txkup in che lipan twitz kya'j, qe alumaj, qe txkup ate' tjaq' k'ul, ex kykyaqil txkup tuj tkyaqil twitz tx'otx'. 11Kyjel b'ant ti'j nyole lu kyuk'ile: Mlay che najtl tu'n a' kykyaqil qeju at kychwinqlal, ex mlay tzajtl a' tu'n tnaj tkyaqil twitz tx'otx'. 12Aju techal ti'j nyole kb'antel ti'j kyuk'ile te jumajx, ex kyuk'il kykyaqil txkup, 13atzun t-xmakal lob'aj ma kub' nq'o'ne tuj muj. K'ajb'el te techal ti'j nyole kyajni b'ant ti'j wu'ne tuk'il twitz tx'otx'. 14Ok ttzaj muj twitz kya'j wu'ne, atzun kq'ancha'lil t-xmakal lob'aj tuj muj. 15Atzun ktzajel nna'ne nyole otoq b'ant ti'j kyuk'ile ex kyuk'il kykyaqil txkup, ex mlay tzajtl a' tu'n kynaj kykyaqil qeju at kychwinqlal. 16Ok tkub' ten t-xmakal lob'aj tuj muj, ok wila'ye ex ktzajel nna'ne nyole kyajni b'ant ti'j kyuk'ile te jumajx, ex kyuk'il kykyaqil qeju at kychwinqlal, chi Dios kye. 17Atzun techal nyole aju ma kyaj b'ant ti'j wu'ne kyuk'il kykyaqil qeju at kychwinqlal twitz tx'otx', chi Dios te Noé.
Noé ex qe tky'ajal
18Qe tky'ajal Noé e je'tz tuj matij barc atzun qe jlu: Sem, Cam ex Jafet. Ate Cam tman Canaán. 19Atzun qe ox lu tky'ajal Noé. Kyu'ntzun kyiyjil o noj twitz tx'otx' juntl maj.
20Ok ten Noé aq'nal ti'j tx'otx' ex ku'x tawa'n tqan uva. 21At jun q'ij xi tk'an vin, ex chyo'n twi'. Kyajtzun koẍe' tuj tmij tja, ex minti'toq t-xb'alun toksa'n. 22Atzunte Cam tman Canaán o til minti'toq t-xb'alun tman toksa'n. Xitzun tma'n kye qe kab'e terman kyetzsa'n ti'jxi. 23Atzunte Sem ex Jafet tzaj kyi'n jun xb'alun ex jax kyq'o'n kywi kysemil. E okxtzun b'et tu'n ttzal kyi'j, in xi kyke'yintoq juntl pak', ex kub' kyq'o'n xb'alun tib'aj kyman. Kyja'tzun minti' o kyil kyman tej minti'toq t-xb'alun toksa'n.
24Tej tel vin tuj twi Noé, o tb'i aju b'inchanjtz ti'j tu'n tky'ajal aju ch'i'p, 25ex tma kyja':
Ktzajel mya b'a'n tib'aj Canaán. K'okel te kymajen qe terman ex ch'inxix k'okel toklen. 26Ax ikx tmatl:
Nimanxwit tb'i Qman aju Tdios Sem ex tz'okwit Canaán te tmajen.
27Tz'elxwit nimax ttx'otx' Jafet tu'n Dios, najanxwit junx tuk'il Sem, ex tz'okwit Canaán te tmajen, chi Noé.
28Anq'intl Noé 350 ab'q'i tb'ajlenxi q'eqab'. 29Ten Noé twitz tx'otx' tu'n tkyaqil, 950 ab'q'i, ex kyim.
Atualmente selecionado:
Génesis 9: MAMNO
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
Mam de Huehuetenango (ortografía reformada): CHIK'B'AB'L TI'J TU'JIL TYOL DIOS TUJ QYOL © Sociedad Bíblica de Guatemala 2011.