Ягья 4
4
Самариятви паб
1-3 Фарисейриз Исади Ягьядилай гзаф тилмизар кьазва ва Ада Ягьядилай пара инсанрив цик акахьун къачуз тазва лугьуз ван хьанвай (амма инсанрив Исади Вичи ваъ, тилмизри цик акахьун къачуз тазвай). Исадиз Вичикай фарисейриз хабар авайди чир хьайила, Ам Ягьудатдай экъечӀна мад Галилейдиз хъфена. 4Ам Самариятдай яна фин хьана. 5Ам Самариятда авай Сихар лугьудай шегьердиз атана. И шегьер Якьуба вичин хва Юсуфаз фадлай багъишай никӀин патав гвай. 6Ана Якьубан къуй авай; рекье галатай Иса къуйдин патав ацукьна; нисиниз мукьва вахт тир.
7Инал яд къачуз Самариятдай тир паб атана. Исади адаз лагьана:
– Заз яд це.
8Адан тилмизар недай затӀар къачуз шегьердиз фенвай.
9Самариятдай тир папа лагьана:
– Вуна, чувуд яз, гьикӀ лагьана завай, Самариятдай тирдавай, яд тӀалабзава?
(Чувудрин самариятвийрихъ галаз алакъаяр авачир.)
10– Ваз Аллагьдин пай вуч ятӀа чизвач, – жаваб гана Исади. – Ваз яд кӀанзавай Кас чизвайтӀа, вуна Адавай Вичивай тӀалабдай. Адани ваз уьмуьрдин яд гудай.
11– Я Агъа! – лагьана папа. – Яд авай къуй дерин я, Вавни яд акъуддай къаб гвач. Ваз уьмуьрдин яд гьинай къведа? 12И къуй чаз чи буба Якьуба туна. И къуйдай адани, адан аялрини, адан мал-къарадини яд хъвана. Вун чи буба Якьубалай артух яни мегер?
13– И яд хъвайи гьар сад цихъ мад къаних хъжеда, – жаваб гана Исади. – 14За теклифай яд хъвайиди садрани къаних жедач. И яд булахдиз элкъведа ва адай къвезвай яд эбеди уьмуьрдихъ авахьда.
15– Я Агъа! – лагьана папа. – Зун цихъ къаних тахьун ва инал мад тахтун патал, жечни а яд заз гайитӀа.
16– Хъфена жуван гъуьлни галаз инал хъша, – лагьана Исади.
17– Заз гъуьл авач, – жаваб яз лагьана папа.
– Гъуьл авач лугьун види гьахъ гаф я, – лагьана Исади. – 18Ваз вад гъуьл хьанай. Исятда авай итимдикай ваз гъуьл жедач. Ам вуна дуьз лагьана.
19– Я Агъа! – лагьана папа. – Заз аквазва хьи, Вун пайгъамбар я; 20чи бубайри икрам и пелел ийидай, амма куьне, чувудри, лугьузва хьи, икрам авуна кӀандай чка Ярусалимда ава.
21– Я хала, – лагьана Исади, – вун Зи чӀалахъ хьухь, ахьтин вахт къвезва хьи, инсанри Бубадиз икрам ийидай чка я и пелел, я Ярусалимда хъжедач. 22Куьне низ икрам ийизватӀа, квез чизвач; амма чна низ икрам ийизватӀа, чаз чизва, дуьньядин хиласвални чувудрилай къведа. 23Амма са вахт атана агакьзава, ам атунни авунва: Руьгьдив ацӀай инсанри Бубадиз дуьздаказ икрам ийида. Адаз кӀанзавайдини гьа ихьтин икрам я. 24Аллагь Руьгь я, Адаз икрамзавайбуруни дуьздаказ ва ацӀай Руьгьдалди икрамун лазим я.
25– Месигь, яни ГуьцӀуьр Алайди, къведайдакай заз хабар ава, – лагьана папа. – И дуьньядиз атайла, Ада чун вири гъавурда твада.
26– Ам Зун я, – лагьана Исади, – вахъ галаз Рахазвайди Месигь я.
27И арада Адан тилмизарни акъатна. Ам папахъ галаз рахаз акурла, абур мягьтел хьана. Амма садани Адавай «Ваз адавай вуч кӀанзава?» я тахьайтӀа «Адахъ галаз Вун квекай рахазвай?» лагьана хабар кьунач.
28Папа, вичин квар туна, шегьердиз фена, ана авай инсанриз лагьана: – 29За авур крарикай заз галай-галайвал лагьай инсандиз фена килиг. Белки, Ам Месигь ятӀа?
30Инсанар шегьердай атана Исадин патав акъатна.
31И арада Адан тилмизри Адаз лагьана:
– Муаллим, Вуна фу неъ.
32Амма Исади абуруз лагьана:
– Захъ квез тийижир недай затӀ ава.
33Инал Адан тилмизри сада-садаз лагьана:
– Адаз недай затӀ гъайи кас ава жал?
34Исади абуруз лагьана:
– За Зун Ракъурайдан къаст кьиле тухузва, За Ада Зал тапшуругъ авунвай карни кьилиз акъудун лазим я. Гьа им Зи недай затӀ я. 35НикӀе тум цайила, куьне кьуд вацралай гвен гуьдай вахт агакьда лугьудачни? За квез лугьузва: килиг кьуд патаз, никӀериз килиг, абур гуьдай вахт алукьнава. 36Гвен агакьнава. Гвен гуьзвайдавни вичин пай агакьзава, ада эбеди уьмуьр патал вичин майваяр кӀватӀзава. Гьавиляй кьведавайни шадвилер ийиз жеда. 37Ихьтин чӀавуз «Сада цада, муькуьда гуьда» лугьудай мисал дуьз мисал я. 38За куьн куь зегьмет квачирди гуьз ракъурна. Масадбуру зегьметар чӀугуна хьайи бегьерар куьне кӀватӀ хъувуна.
39А шегьердай тир гзаф самариятвийри Исадихъ иман авуна, вучиз лагьайтӀа а папа абуруз икӀ ихтилатна:
– За са мус ятӀани авур крарикайни Ада заз хьайивал лагьана.
40Самариятвийри, Исадин кьилив фена, Адаз чпин патав амукьун минетна. Иса ана кьве юкъуз акъвазна. 41Ада абуруз авур ихтилатар акурла, амайдалайни гзафбуру Адахъ иман авуна. 42А папаз абуру лагьанай:
– Сифтедай чна Адахъ ви гафар себеб яз иман авунай. Гила, Адан ван хьайила, чаз чизва хьи, Ам рикӀивайни дуьньядин Хиласкар я.
Пачагьдин къуллугъдардин хва сагъар хъувун
(МатӀай 8:5-13; ЛукӀа 7:1-10)
43Кьве югъ алатайла, Иса анай Галилейдиз фена. 44Исади Вичи лагьанай хьи, жуван ватанда пайгъамбардихъ гьуьрмет авач. 45Галилейвиярни Ярусалимда суварик квайла, Исади ана авур крар абуруз чпин вилералди акунай. Иса Галилейдиз атайла, анин жемятди Ам хъсандиз кьабулна.
46Вичи яд чехирдиз элкъуьрай шегьердиз, Галилейдин Канадиз, Иса мад хтана. Кефернагьумда пачагьдин са къуллугъдар авай, адан хва начагъ тир. 47Иса Ягьудатдай Галилейдиз атанва лагьана хабар хьайила, ада, Исадин патав атана, вичин рекьидай гьалда авай хва сагъара лагьана минетар ийиз хьана. 48Исади адаз лагьана:
– Квез аламатар ва керемат-ишараяр такунмаз куьн чӀалахъ жедач.
49– Агъа! – минетна пачагьдин къуллугъдарди. – Зи хва текьенмаз атана са чара ая.
50– КӀвализ ахлад, – лагьана Исади, – ви хва сагъ-саламат жеда.
Ам Исади лагьай гафунихъ агъуна хъфена. 51Рекье ам вичин къуллугъдаррал гьалтна ва абуру адаз «Ви хва сагъ я» лагьана.
52Ада абурувай хабар кьуна:
– Адаз сятдин шумудаз регьят хьана?
– Накь нисинин сятдин садаз хьиз адалай ифин алатна, – жаваб гана абуру.
53И чӀавуз буба гъавурда гьатна хьи, вичиз Исади «Ви хва сагъ-саламат жеда» лагьай вахт хьанва. Ада ва адан вири кӀвале авайбуру Исадихъ иман авуна.
54Им Ягьудатдай Галилейдиз хтай Исади къалурай кьвед лагьай керемат-ишара я.
Atualmente selecionado:
Ягья 4: ЛезПК
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
© Институт перевода Библии, 2010-2024