Cakirok 1
1
Cwec ma polo gi piny
1I cakirok Were ocweyo polo gi piny. 2Piny oyido ongoye gi cal aka oyido nitie nono. Mudho oyido oumo wakawaka madongo, aka Cuny pa Were oyido waya wi pi. 3#2 Kor 4:6Kenyo Were owodho or ni, “Weyi kenyo wobedi lero.” Aka lero omenyere. 4Aka Were oneno ni lero ber, ameno opoko lero kwoŋ mudho. 5Were olwoŋo lero ni odieceŋ, aka mudho ni wor. Piny oyutho to piny yawere; meno obedo ndelo marapena.
6 #
2 Pet 3:5
Were owaco ni, “Weyi thwolo wobedi i dier pi wopok kadirio.” Aka obedo ameno. 7Ameno Were ocweyo thwolo m'opoko pi ma pendi lowo gi pi ma wiye. 8Were olwoŋo thwolo no ni pondeponde. Piny oyutho to piny yawere; meno obedo ndelo mar'ario.
9Kenyo Were owaco ni, “Weyi pi ma pendi polo wocokere kanyacel i kabedo acel, aka lowo m'othwo wonen.” Aka obedo ameno. 10Were olwoŋo lowo m'othwo ni piny, aka pi m'ocokere kanyacel ni nam. Were oneno ni oyido ber. 11Were owaco ni, “Weyi piny wonywol dudi, ma nyak nyinge gi ma nyak olemo.” Aka obedo ameno. 12Piny onywolo dudi nger gi nger, aka Were oneno ni oyido ber. 13Piny oyutho to piny yawere, meno obedo ndelo mar'adek.
14Were owaco ni, “Weyi talin wobedi i pondeponde ma poko odieceŋ gi wor; aka weyi jowobedi ma nyutho ndir, ndelo gi oro. 15Weyi jowoliel i pondeponde ma miyo piny lero.” Aka obedo ameno. 16Ameno Were ocweyo talin ario madongo. Madwoŋ mere dhumo odieceŋ, aka mathin mere dhumo wor; go ocweyo micalin bende. 17Aka Were oketho jo i pondeponde miyo piny lero, 18dhumo odieceŋ gi wor, gi poko lero kwoŋ mudho. Aka Were oneno ni oyido ber. 19Piny oyutho to piny yawere, meno obedo ndelo mar'aŋwen.
20Were owaco ni, “Weyi pi wonywol cwec ma nigi kwo, aka weyi koyo wopoŋ gi winyin.” 21Ameno Were ocweyo rec madongo i nam kodi kisi cwec makwo ma bedo i pi, kodi kisi nger winyo. Aka Were oneno nike oyido ber. 22Were omiyo jo silwany aka owaco ri kisi cwec ma bedo i pi nike wonywol wopoŋ i nam; to waco ri winyin nike jowomedere i welo. 23Piny oyutho to piny yawere, meno obedo ndelo mar'abic.
24Were owaco ni, “Weyi piny wonywol kisi nger ogwaŋ manitie gi kwo: Ma bedo peco, madudi, madongo kodi mathindho.” Aka obedo ameno. 25Were ocweyo joje, aka oneno nike oyido ber.
26 #
1 Kor 11:7
Kenyo Were owaco ni, “Aka onyo pama walacweyo ji i cal mawan, aka jowocale wan; aka weyi jowodhum rec ma nam, winyin ma koyo kodi ogwaŋe ma peco kodi madudi.” 27#Cak 5:1,2; Mat 19:4; Mar 10:6Ameno Were ocweyo ji i cal pere; ocweyo jo ma cwo kodi ma mon. 28Aka Were omiyo jo silwany to waco ni, “Nywol win nyithindho kweth, ŋey nyikway win jowobedi i piny gibe to jodhumo. Dhum win rec ma nam, winyin ma malo kodi kisi cwec makwo ma wotho i piny. 29Amiyo win dudi manywolo nyinge kodi manywolo olemo paka cemo. 30To ri ogwaŋe kodi winyin, amiyo lum kodi boke dudi paka cemo.” Aka obedo ameno. 31Were oneno kisi gima go oyido ocweyo, aka neni, oyido ber swa. Piny oyutho to piny yawere. Meno obedo ndelo mar'aucel.
Atualmente selecionado:
Cakirok 1: DHOCDC
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
Dhopadhola DC Bible © Bible Society of Uganda, 2018.