KUZOYA 11
11
Mnara ghwa Babeli
1Ngelo iyo, wurumwengu ghose ghorekoghe na kiteto chimweri na lwaka lumweri. 2Hata iji wandu werekoghe wikidamba kufuma chia ra mashariki, wikavika kirindi cha isanga jimu jiwangwagha Shinari, nawo wikakaia aho. 3Wikazerana weni na weni, “Nndokonyi dikabe matofali, dighioche nicha.” Nawo werekoghe na matofali wulalo ghwa magho, na lami wulalo ghwa chokaa. 4Nao wikaghamba, “Idana ndedikuaghie muzi na mnara, na wuighu ghwaro ghujoke hata ghuvike mlungunyi, nesi dikubonyere diweni irina, eri disakesaghiswa ii chia na ii chia aighu ndoenyi.”
5Niko BWANA ukasea upate kuwona ugho muzi na ugho mnara wadamu wereghuaghieghe. 6Nao BWANA ukaghamba, “Olenyi wandu awa ni wandu wamweri, widedagha kiteto chimweri na lwaka lumweri; na uku ni kuzoya tu kwa agha wichaabonya, hata ndewichaalemwa ni kilambo chingi wichaakunda anduangi. 7Idana ndedisee diwitasanyire kiteto chawo, eri wisesikirane madedo weni na weni.” 8Niko BWANA ukawisaghisa ndoenyi kose kufuma aja, nawo wikasigha kuagha ugho muzi. 9Niko huwo muzi ugho ghukawangwa Babeli, angu aho niko BWANA oretasanyireghe kiteto cha wadamu wose, na kufuma aja, ukawifunya wisasarike ndoenyi kose.
Kivalwa cha Shemu
(1 Mal. 1.24-27)
10Ichi nicho kivalwa cha Shemu. Miaka iwi iendasia nyuma ya gharika, iji Shemu orekoghe na miaka ighana, oremvaeghe Arpakishadi. 11Nyuma ya kumva Arpakishadi, Shemu ukakaia miaka maghana masanu, ukava wana wamu wa womi na wa waka.
12Iji Arpakishadi orekoghe mundu wa miaka mirongo idadu na misanu, oremvaeghe Shela. 13Nyuma ya kumva Shela, Arpakishadi ukakaia miaka maghana ana na idadu, ukava wana wamu wa womi na wa waka.
14Iji Shela orekoghe mundu wa miaka mirongo idadu, oremvaeghe Eberi. 15Nyuma ya kumva Eberi, Shela ukakaia miaka maghana ana na idadu, ukava wana wamu wa womi na wa waka.
16Iji Eberi orekoghe mundu wa miaka mirongo idadu na inya, oremvaeghe Pelegi. 17Nyuma ya kumva Pelegi, Eberi ukakaia miaka maghana ana na mirongo idadu, ukava wana wamu wa womi na wa waka.
18Iji Pelegi orekoghe mundu wa miaka mirongo idadu, oremvaeghe Reu. 19Nyuma ya kumva Reu, Pelegi ukakaia miaka maghana awi na ikenda, ukava wana wamu wa womi na wa waka.
20Iji Reu orekoghe mundu wa miaka mirongo idadu na iwi, oremvaeghe Serugi. 21Nyuma ya kumva Serugi, Reu ukakaia miaka maghana awi na mfungade, ukava wana wamu wa womi na wa waka.
22Iji Serugi orekoghe mundu wa miaka mirongo idadu, oremvaeghe Nahori. 23Nyuma ya kumva Nahori, Serugi ukakaia miaka maghana awi ukava wana wamu wa womi na wa waka.
24Iji Nahori orekoghe mundu wa miaka mirongo iwi na ikenda, oremvaeghe Tera. 25Nyuma ya kumva Tera, Nahori ukakaia miaka ighana na ikumi na ikenda, ukava wana wamu wa womi na wa waka.
26Iji Tera orekoghe mundu wa miaka mirongo mfungade, orewivaeghe Abramu, Nahori na Harani.
Kivalwa cha Tera
27Ichi nicho kivalwa cha Tera ndee wake Abramu, Nahori na Harani; Harani oremvaeghe Loti. 28Nao Harani ukafwa andu orevailoghe kwa ghuja muzi ghwa Uri ghwa Wakaldayo ndee uko moyo. 29Abramu na Nahori wikalowua. Muka wa Abramu orewangwaghwa Sarai, na muka wa Nahori orewangwaghwa Milka mwai wa Harani uo orekoghe ndee Isaaka. 30Sarai orekoghe kolowi hata nderedimieghe kuva wana anduangi.
31Nao Tera ukawuka na mwana wake Abramu na wawae Loti mwana wa Harani na mka-mwanwake Sarai, muka wa Abramu, nawo wikaghendanya cha Kanaani kufuma muzi ghwa Uri ya Wakalidayo, ela iji werevikieghe Harani wikakaia aho. 32Tera ukafuya isanga ja Harani, mundu wa miaka maghana awi na isanu.
Atualmente selecionado:
KUZOYA 11: TAITA
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
©Bible Society of Kenya, 1997
All rights reserved.