GENESIS 3
3
Mihing Thumanlouhna
1Huan Toupa Pathian in gamsa abawl tengteng lak ah gul agitlouhpil pen hi. Ama'n numei kiang ah, “Pathian in, ‘Huan a singgah himhim na ne ding uh ahi kei chi ahi maw?’ ” achi hi.
2Numei in gul kiang ah, “Chi lou e, huan a singgahte ne thei mah ung, 3himahleh huan laizang a singgah pen ahihleh Pathian in, ‘Na ne ding uh ahi kei, khoih leng na khoih ding uh ahi kei, huchi lou in zaw na si ding uh chi aka,’ ” achi hi.
4Gul in numei kiang ah, “Si zenzen lou e. 5Na nek ni ua pat na mit uh ahong vak dia, asia leh apha thei in Pathian na hong bang ding uh, chih Pathian in thei kilkel ei ve,” achi hi.
6Numei in singgah nek theih ahi chih leh mit hiptak ahi chih leh mi pilsak ding a singgah etlahhuai ahi, chih atheih in agah alou a, aneta hi. Akiang a om apasal leng apia a, ama'n leng aneta hi. 7Anih un amit uh ahong vakta a, vuaktang ahih lam uh hong kithei ua; theipi nah khuikhawm in, puan akibawltawm uhi.
8 Toupa Pathian, nitaklam ninem a huan a vak thawmging aza ua; Adam leh azi in huan a sing lak ah Toupa Pathian ana kibuksan uhi. 9Toupa Pathian in Adam asam a, akiang ah, “Koi a om na hia?” achi hi.
10Ama'n, “Huan ah na thawmging ka za a, vuaktang ka hih ziak in ka lau a; ka na kibuta,” achi hi.
11Ama'n, “Vuaktang na hih kua'n hon hilh ahia? Singgah nek louh ding ka chih ne na hita maw?” achi hi.
12Adam in, “Hon ompih dia na hon piak numei in singgah hon pia a, ka neta hi,” achi hi.
13 Toupa Pathian in numei kiang ah, “Na thilhih bangchidan ahia?” achi hi. Numei in, “Gul in hon zekhem a, ka neta hi,” achi hi.
Pathian Vaihawmna
14 Toupa Pathian in gul kiang ah, “Hichibang a na hih ziak in ganhing tengteng leh gamsa chiteng lak ah hamsiat na hi tuanse ding a, bokvak in na pai gigeta ding a, na damsung in leivui na neta ding. 15Nang leh numei ka hon kidousak ding a, na suante leh asuante leng ka kidousak lai ding. Huai in na lutang asidupsak ding a, nang akhetul na sidupsak ding,” achi hi.
16Numei kiang ah, “Na haksatna leh na naupaina nakpi in ka pungsak ding a; haksatak in tate na nei ding. Huan na lunggulh na pasal a ahi ding a, ama'n na tung ah thu anei ding,” achi hi.
17Adam kiang ah, “Na zi thu na man a, singgah na ne ding ahi kei, chi a, ka hon thupiak na nek ziak in nang ziak in leitung hamsiat in a-omta. Na damsung teng in gimtak a sem in agah na neta ding. 18Ling leh louling neite leng ahon omsak ding a, lei a anteh na neta ding hi. 19Lei a na kik nawn masiah na mai a kho-ul luang puappuap in an na neta ding. Lei a pan lakkhiak na hi; leivui na hi a, leivui ah na kik nawn ding,” achi hi.
20Adam in azi, mihing tengteng' nu ahih ziak in, amin Evi asa hi. 21Toupa Pathian in Adam a ding leh azi a ding in savun puanaktual bawlsak in, asilhsak hi.
Huan A Kipan Adam Leh Evi Hawlkhiakna
22 Toupa Pathian in, “Ngai un, mihing in asia leh apha thei in eite bang ahong hita, tu in akhut ua sawk in hinna singgah lou a ne in, tangtawn in ahing kha ding uh,” achi hi. 23Huaiziak in Toupa Pathian in amah alakkhiakna lei let ding in Eden huan a kipan ahawlkheta hi. 24Mihingte adelhkheta a; hinna sing lampi veng ding in Eden huan suahlam pang ah cherubte leh mei namsau kilek zualzual a-omsakta hi.
Atualmente selecionado:
GENESIS 3: PAITBSI
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.