Noo Mian 8
8
CAB. VIII
1Tra v’eh er jeet neose jeh’n clieau, deiyr earrooyn mooarey dy leih er. 2As cur‐my‐ner haink lourane, as hug eh ooashley da, gra, Hiarn, my she dt’aigney eh, foddee oo mish y yannoo glen. 3As heeyn Yeesey magh e laue, as venn eh rish, gra, My aigney’s eh, bee er dty ghlenney. As chelleeragh va’n louraanys echey er ny ghlenney. 4As dooyrt Yeesey rish, Jeeagh nagh n’insh oo shoh da doinney erbee, agh immee royd, as jeeagh oo hene da’n taggyrt, as cheb yn oural doardee Moses son feanish daue.
5As tra va Yeesey er n’gholl stiagh ayns Capernaum, haink #8.5 Captan‐keead. centurion huggey guee er, 6As gra, Hiarn, ta my ermooinjerey ny lhie ching ec y thie jeh’n chingys‐craaee, ayns stayd feer treih. 7As dooyrt Yeesey rish, Hig‐yms, as nee’m eh y lheihys. 8As dreggyr yn centurion, gra, Hiarn, cha vel mee feeu oo dy heet stiagh fo my chlea: agh ynrycan loayr y fockle, as bee my harvaant er ny lheihys. 9Son ta mish mee hene my ghooinney ayns pooar, as sidooryn aym foym: as ta mee gra rish y dooinney shoh, immee, as t’eh goll: as rish fer elley, Tar, as t’eh cheet: as rish my harvaant, Jean shoh, as t’eh dy yanno eh. 10Tra cheayll Yeesey shoh ghow eh yindys, as dooyrt eh roosyn va geiyrt er, Dy firrinagh ta mee gra riu, Lheid y credjue lajer shoh, cha vel mee er gheddyn ayns Israel hene. 11As ta mee gra riu, dy jig ymmodee veih yn niar as veih yn neear, as dy soie ad sheese marish Abraham, as Isaac, as Jacob, ayns reeriaght niau. 12Agh bee #8.12 Ny Hewnyn an‐chreestee. cloan y reeriaght er nyn yiooldey magh gys y dorraghys sodjey‐mooie: ayns shen vees keayney as snaggeraght feeacklyn. 13As dooyrt Yeesey rish y centurion, Immee royd, as ’naght myr t’ou er chredjal, myr shen dy jig oo jeh. As va e er‐mooinjerey er ny lheihys ayns yn oor cheddin.
14As tra va Yeesey er jeet stiagh ayns thie Pheddyr honnick eh moir e ven ny lhie, as ching ayns y chiassaghey. 15As venn eh rish y laue eck, as daag yn chiassaghey ee: as ren ee girree, as shirveish orroo.
16Tra va’n fastyr er jeet, hug ad lhieu huggey ymmodee va drogh‐spyrrydyn ayndoo: as deiyr eh magh ny spyrrydyn lesh fockle, as laanee eh ooilley ny va ching. 17Myr shoh va cooilleenit shen ny loayr Esaias y phadeyr, gra, Ghow eh hene er ny aslayntyn ainyn, as dymmyrk eh nyn ghoghanyn. 18Nish tra honnick Yeesey ear‐rooyn mooarey dy leih mygeayrt‐y‐mysh, hug eh sarey dy gholl gys y #8.18 Dy aarkey Ghalilee. cheu elley. 19As haink scrudeyr dy row huggey, as dooyrt eh rish, Vainshter, eiyr‐yms ort raad erbee dy jed oo. 20As dooyrt Yeesey rish, Ta tuill ec ny shynnee, as idd ec eeanlee yn aer, agh cha vel ec mac y dooinney wheesh boayl aaght son e chione. 21As dooyrt fer elley jeh e ynseydee rish, Hiarn, lhig dou hoshiaght goll thie dy oanluckey my #8.21 Tra yiow eh baase. ayr. 22Agh dooyrt Yeesey rish, Eiyr orrym’s, as lhig da ny merriu nyn merriu y oanluckey.
23As tra v’eh er ghoaill lhuingys, hie e ynseydee mârish. 24As cur‐my‐ner hrog sterrym mooar ayns yn aarkey, myr shen dy row ny tonnyn brishey harrish y lhong: agh v’eshyn ny chadley. 25As haink e ynseydee huggey, as ghooisht ad eh, gra, Hiarn, saue shin: bee mayd caillit. 26As dooyrt eh rhoo. Cre’n fa ta shiu agglagh, shiuish dy chredjue moal? Eisht dirree eh, as hug eh yn gheay, as yn aarkey fo‐harey, as va kiuney vooar ayn. 27Agh ghow ny deiney yindys, gra, Cre’n dooinney eh shoh, dy vel ny eer geayghyn as y faarkey ayns biallys da!
28As tra ve’h er jeet gys y cheu elley, gys cheer ny Gergese‐nee, haink daa ghooinney va drogh‐spyrrydyn ayndoo magh ny whail, veih mastey ny hoiaghyn, as cha keoi shen v’ad, nagh by‐lhoys da dooinney erbee goaill yn raad shen. 29As cur‐my‐ner deïe ad, gra, Cre’n eïe t’ayd orrin, Yeesey Vac Yee? vel oo er jeet dy nyn dorchaghey rhoish y traa? 30As tammylt voue va beiyhaghey griagh mooar dy vuckyn. 31As ghuee ny drogh‐spyrrydyn er, gra, My eiyrys oo magh shin, lhig dooin goll stiagh ayns ny muckyn. 32As dooyrt eh roo, Gow‐jee reue. As tra v’ad er jeet ass ny deiney, hie ad stiagh ayns y ghriagh dy vuckyn: as cur‐my‐ner roie yn slane griagh gour nyn mullee lesh yn eaynee gys y cheayn, as‐vad baint ayns ny ushtaghyn. 33As roie ny bochillyn roue, as haink ad gys yn ard‐valley, as dinsh ad dy chooilley nhee: as mychione ny deiney va seaghnit lesh ny drogh‐spyrrydyn. 34As cur‐my‐ner, haink y slane ard‐valley magh quail Yeesey, as tra honnick ad eh, ghuee ad er, eh dy gholl roish ass ny ardjyn oc.
Atualmente selecionado:
Noo Mian 8: CON1810
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
© British and Foreign Bible Society 1810, 2019