Aˇ dahˬ 3
3
Miˬyehˇ-euˬ ehˇ dawˬ-ahˇ tsawˇ haˬ zaˬ maˬ naˇ haˬ geuꞈ-eu
1Aˇ lawˇ-aˬ, Sahˬpaˬ Miˬyehˇ pyeuꞈ-eu Miˬyehˇ neh beh taˬ-euˬ jeˬ zaˬ deuˬ laꞈ kʼoeˇ, aˬ cawˬ naˆ maˬ tseˇ nui ma laꞈ gʼoꞈ baw-eu jeˬ pyeuꞈ-eu meh. “Aˬ diˇ aˬ maˇ yaˇ kmˇ laꞈ kʼoeˇ siˬ-eu aˇ siˬ tiˬ siˬ-iˬ taˬ pyaˆ dzaˬ lehˇ naw nyaꞈ-ahˇ Miˬyehˇ ehˇ ta loˇ” lehˇ, zaˬ miˬ zaˬ kʼoeˇ gʼaˬ-ahˇ aˇ lawˇ kʼoeˇ mawˇ naˇ haˬ-euˬ meh.
2Zaˬ miˬ zaˬ kʼoeˇ gʼaˬ aˇ lawˇ kʼoeˇ mawˇ-ahˇ ehˇ kʼoꞈ nehˬ-eu, “Yaˇ kmˇ gʼahˇ ceh jaˆ-eu aˇ siˬ aˇ bawˇ kʼoeˇ bawˇ-euˬ aˇ siˬ maˬ ngeuˇ naˇ, aˇ siˬ aˇ bawˇ aˬ geu bawˇ-euˬ aˇ siˬ maˬ kaˬ, nga nyaꞈ pyaˆ dzaˬ nya meh. 3Ehˇ kʼawꞈ, yaˇ kmˇ gʼahˇ ceh jaˆ-eu aˇ bawˇ kʼoeˇ bawˇ-euˬ aˇ siˬ pyaˆ dzaˬ-eu taˬ ehˇ. Toeˬ-eu tehꞈ-ehˇ kʼawꞈ taˬ toeˬ ciˆ leˇ. Toeˬ ciˆ leˇ naˇ ya shiˇ meh lehˇ nga nyaꞈ-ahˇ Miˬyehˇ ehˇ taˬ-euˬ meh” lehˇ ehˇ kʼoꞈ nehˬ-euˬ meh.
4Aˇ lawˇ kʼoeˇ mawˇ paˇ ehˇ-eu, “Toˆ-ehˇ maˬ ngeuˇ-a. Aˇ siˬ kʼoeˇ pyaˆ dzaˬ kʼawꞈ naw nyaꞈ maˬ ya shiˇ-a. 5Aˇ bawˇ kʼoeˇ bawˇ-euˬ aˇ siˬ naw nyaꞈ pyaˆ dzaˬ naˇ, naw nyaꞈ kʼawꞈ Miˬyehˇ-ahˇ duˇ laˇ-awˇ, yaw muiˬ yaw doeˇ tseˇ paˆ nya laˇ tehꞈ-a lehˇ Miˬyehˇ siˬ nya-eu miˇ neh, kʼoeˇ loꞈ-ehˇ ehˇ-eu meh.”
6Aˇ bawˇ kʼoeˇ bawˇ haw muiˬ dui dui-awˇ, aˇ siˬ kʼawꞈ kuiˇ dui dui paˬ-ehˇ gʼeh gaˇ, zaˬ miˬ zaˬ kʼoeˇ gʼaˬ ya mawˇ-euˬ meh. Aˇ siˬ kʼoeˇ ya pyaˆ dzaˬ-awˇ, zaˬ siˬ tsawˇ gahˇ ahˇ laˇ law nmˇ-aˬ, maˬ gaˇ dui dui tehꞈ-a lehˇ aˬ yawꞈ noeˬ-euˬ meh. Kʼoeˇ miˇ neh, aˇ siˬ ui cuiˆ pyaˆ-awˇ dzaˬ haw-euˬ meh. Kʼoeˇ naˇ, aˬ yawꞈ-euˬ kʼaˬ dzeˇ zaˬ gʼaˬ-ahˇ kʼawꞈ ui cuiˆ biꞈ-awˇ, kʼaˬ dzeˇ zaˬ gʼaˬ kʼawꞈ dzaˬ-euˬ meh. 7Aˇ siˬ kʼoeˇ dzaˬ gʼaˬ-euˬ nehˬ-ehˇ, aˬ yawꞈ nyaꞈ noeˬ siˬ noeˬ mawˇ nya laˇ-awˇ, “Mehˬ tsoeˬ maˬ dm luꞈ law hawˇ nyaˬ” lehˇ, yawˬ haˇ yawˬ ha noeˬ leˇ-euˬ meh. Kʼoeˇ miˇ neh, aˬ yawꞈ nyaꞈ siˬ guˬ aˇ paꞈ guꞈ tawꞈ-awˇ, yawˬ ha-euˬ gʼawˇ mawˇ-ahˇ dm kaˬ-euˬ meh.
8Kʼoeˇ ngeh nah uˬ ciꞈ uˬ taw paw, Miˬyehˇ pyeuꞈ-eu Sahˬpaˬ Miˬyehˇ yaˇ kmˇ laꞈ kʼoeˇ gaˇ ma cah haw le-eu teˇ saˇ-ahˇ aˬ yawꞈ nyaꞈ ya gaˬ ngeh, aˇ bawˇ uˬ moˆ cehˆ zaꞈ-euˬ meh. 9Ehˇ kʼawꞈ, Miˬyehˇ pyeuꞈ-eu Sahˬpaˬ Miˬyehˇ kʼaˬ dzeˇ zaˬ gʼaˬ-ahˇ kuˇ-awˇ, “Nawˇ aˬ gaˇ jawˇ luꞈ te” lehˇ, naˇ haˬ-euˬ meh.
10Kʼoeˇ ngeh, kʼaˬ dzeˇ zaˬ gʼaˬ oˬ toˬ-awˇ ehˇ-eu, “Nawˇ yaˇ kmˇ laꞈ kʼoeˇ gaˇ ma cah luꞈ-eu teˇ saˇ ngaˇ ya gaˬ-euˬ ma. Ehˇ kʼawꞈ, ngaˇ mehˬ tsoeˬ maˬ dm luꞈ-eu miˇ neh nawˬ-ahˇ guˆ-awˇ dzuˇ zaꞈ luꞈ-eu ma” lehˇ ehˇ kʼoꞈ nehˬ-euˬ meh.
11“Nawˇ mehˬ tsoeˬ maˬ dm luꞈ nga lehˇ, nawˬ-ahˇ aˬ suˇ gʼaˬ ehˇ mehˬ nehˬ laꞈ-euˬ ta. Ngaˬ neh taˬ dzaˬ lehˇ ehˇ taˬ-euˬ aˇ siˬ kʼoeˇ nawˇ pyaˆ dzaˬ teˬ loˇ” lehˇ, aˬ yawꞈ-ahˇ Miˬyehˇ pyeuꞈ-eu Sahˬpaˬ Miˬyehˇ naˇ haˬ-euˬ meh.
12“Nawˬ neh ngaˬ nehˬ-ehˇ bi jawˇ le-euˬ zaˬ miˬ zaˬ heu gʼaˬ, ngaˬ-ahˇ aˇ siˬ kʼoeˇ biꞈ laꞈ-eu miˇ neh ngaˇ dzaˬ-euˬ ma” lehˇ, kʼaˬ dzeˇ zaˬ kʼoeˇ gʼaˬ Miˬyehˇ pyeuꞈ-eu Sahˬpaˬ Miˬyehˇ-ahˇ ehˇ kʼoꞈ nehˬ-euˬ meh.
13“Aˬ jeˬ miˇ neh nawˇ kʼoeˇ loꞈ-ehˇ mˇ teˬ” lehˇ, Miˬyehˇ pyeuꞈ-eu Sahˬpaˬ Miˬyehˇ zaˬ miˬ zaˬ gʼaˬ-ahˇ naˇ haˬ ngeh,
“Aˇ siˬ kʼoeˇ pyaˆ dzaˬ-awˬ lehˇ aˇ lawˇ ngaˬ-ahˇ muˇ juˇ juˇ-eu miˇ neh pyaˆ dzaˬ-euˬ ma” lehˇ, zaˬ miˬ zaˬ gʼaˬ ehˇ kʼoꞈ nehˬ-euˬ meh.
Miˬyehˇ yaˇ kʼaˬ daˇ-euˬ
14Kʼoeˇ ngeh, Miˬyehˇ pyeuꞈ-eu Sahˬpaˬ Miˬyehˇ aˇ lawˇ kʼoeˇ mawˇ-ahˇ heu loꞈ-ehˇ ehˇ nehˬ-euˬ meh. “Nawˇ kʼoeˇ loꞈ-ehˇ mˇ-euˬ baˬ da neh kʼehˬ nehˬ kʼaˆ nehˬ-eu jeˬ-ahˇ ya daˬ tehꞈ-a. Jeˬ zaˬ dawˬ tawˆ luꞈ laꞈ kʼoeˇ, nawˇ tehꞈ-ehˇ heu loꞈ-ehˇ yaˬ kʼehˇ yaˬ nehˬ-euˬ gaˇ ya daˬ tehꞈ-a. Nymˬ-mˇ neh aˇ dahˬ beh-awˇ, nawˬ-euˬ uˬ maˆ miˇ tsaˬ-ahˇ ciˬ daˬ-awˇ joe joe-ehˇ cah-awˬ. Maˬ shiˇ tiˬ ziˇ nawˇ miˇ tsaˬ ya dzaˬ tehꞈ-a. 15Nawˇ hawˇ-eu zaˬ miˬ zaˬ naw nyaꞈ yaw kaˬ, tiˬ gʼaˬ tiˇ gʼaˬ muiˇ ni ngaˇ jahˇ ma. Aˬ yawꞈ-euˬ zaˬ deuˬ hawˇ-eu nawˬ-euˬ zaˬ deuˬ, aˬ myah luꞈ tiˬ gʼaˬ tiˇ gʼaˬ muiˇ tehꞈ-a. Aˬ yawꞈ-euˬ zaˬ deuˬ nawˬ-euˬ uˬ duˬ nawˬ pyehˆ-awˇ, aˬ yawꞈ maꞈ-euˬ aˬ kuiˇ kuiˇ nuiꞈ-ahˇ nawˇ toˆ tehꞈ-a” lehˇ ehˇ nehˬ-euˬ meh.
16Kʼoeˇ naˇ, Miˬyehˇ pyeuꞈ-eu Sahˬpaˬ Miˬyehˇ zaˬ miˬ zaˬ gʼaˬ-ahˇ heu loꞈ-ehˇ ehˇ nehˬ-euˬ meh. “Aˬ nyiˇ pi luꞈ ngeh maˬ ehˇ, aˬ nyiˇ ciˬ ngeh maˬ ehˇ, nawˇ ya mˇ-eu shaˬ zahˬ heu naˆ maˬ tseˇ naꞈ dzehˬ laˇ ni ngaˇ jahˇ ma. Nawˇ kʼoeˇ naˆ naˆ-ehˇ ya shaˬ kʼawꞈ, nawˬ-euˬ kʼaˬ dzeˇ zaˬ-ahˇ nawˇ aˬ myah luꞈ nui kʼahˇ jaˆ tehꞈ-a. Ehˇ kʼawꞈ, nawˬ-euˬ kʼaˬ dzeˇ zaˬ uˆ lahˇ-eu uˬ moˆ nawˇ ya jawˇ tehꞈ-a” lehˇ ehˇ nehˬ-euˬ meh.
17Miˬyehˇ pyeuꞈ-eu Sahˬpaˬ Miˬyehˇ-aˬ, kʼaˬ dzeˇ zaˬ gʼaˬ-ahˇ kʼawꞈ heu loꞈ-ehˇ ehˇ nehˬ-euˬ meh. “Nawˬ-euˬ miˬ zaˬ-euˬ ehˇ dawˬ naˇ haˬ-awˇ, ngaˬ neh taˬ dzaˬ lehˇ ehˇ taˬ-euˬ aˇ siˬ-ahˇ nawˇ dzaˬ-euˬ meh. Nawˇ kʼoeˇ loꞈ-ehˇ mˇ-euˬ miˇ neh, miˇ tsaˬ-aˬ, yaˬ kʼehˇ yaˬ nehˬ-eu jeˬ-ahˇ ya daˬ tehꞈ-a. Nawˇ ya dzaˬ ya dawˇ-eu gʼaˇ duˬ, nawˬ-euˬ tiˬ ziˇ maˬ naˬ leˇ ni miˇ tsaˬ-ahˇ ya beuˬ tehꞈ-a. 18Miˇ tsaˬ-aˬ, yaˇ moꞈ hawˇ-eu aˬ gah baw duˆ deuˬ bi dehꞈ doˆ laˇ-awˇ, bawˇ tsahˬ sahˬ lahˬ deuˬ-ahˇ nawˇ ya dzaˬ tehꞈ-a. 19Miˇ tsaˬ yuˇ-awˇ nawˬ-ahˇ beh taˬ-euˬ loꞈ-ehˇ, miˇ tsaˬ-ahˇ nawˇ maˬ ya gʼoꞈ uˇ-iˇ kʼoeˇ keuˆ ni, nawˇ kʼaˇ ka dzaˬ-eu jeˬ-ahˇ miˇ tsaˬ neh bi dehꞈ doˆ laˇ-awˇ aˇ siˬ aˇ nuiˆ bi nuiˆ laˇ-eu gʼaˇ duˬ, kuˬ pyuˇ kuˬ tsaˇ tsiˇ ni nawˇ ya mˇ sehꞈ leꞈ tehꞈ-a. Miˇ tsaˬ shaˬ jehˆ yuˇ-awˇ nawˬ-ahˇ tehˆ taˬ-euˬ loꞈ-ehˇ, nawˇ miˇ tsaˬ paˇ ya pyeuꞈ kʼoꞈ-iˇ tehꞈ-a” lehˇ ehˇ nehˬ-euˬ meh.
20Aˬdaˬ-aˬ, aˬ yawꞈ-euˬ miˬ zaˬ-ahˇ Eˇbaˆ#3.20 ‘Aˬdaˬ’ lehˇ ehˇ-eu dawˬ tsuiꞈ-aˬ, ‘tsawˇ haˬ zaˬ’ lehˇ ehˇ mawꞈ-eu meh. ‘Eˇbaˆ’ lehˇ ehˇ-eu-aˬ, ‘dehꞈ-eu saꞈ laˇ’-ahˇ ehˇ mawꞈ-awˇ, Jaˇ liꞈ heu deuˆ laꞈ kʼoeˇ ehˇ mawꞈ-eu dawˬ tsuiꞈ-aˬ, ‘tsawˇ haˬ zaˬ deuˬ’ lehˇ ehˇ mawꞈ-eu meh. lehˇ myahˇ nehˬ-euˬ meh. Aˬ jeˬ miˇ neh ehˇ naˇ, aˬ yawꞈ-aˬ, tsawˇ haˬ zaˬ dawˬ tawˆ luꞈ-euˬ aˬ ma ma dzahˇ gʼaˬ pyeuꞈ-eu meh. 21Miˬyehˇ pyuꞈ-eu Sahˬpaˬ Miˬyehˇ-aˬ, Aˬdaˬ hawˇ-eu Eˇbaˆ aˬ nyaꞈ dzeˇ zaˬ-ahˇ, jeˬ zaˬ baˆ kʼoˆ mehˬ tsoeˬ guꞈ-awˇ bi dm-euˬ meh.
Aˬdaˬ hawˇ-eu Eˇbaˆ-ahˇ yaˇ kmˇ laꞈ nyiˇ teh doˆ-euˬ
22Kʼoeˇ naˇ, Miˬyehˇ pyeuꞈ-eu Sahˬpaˬ Miˬyehˇ ehˇ-eu, “Nymˬ-mˇ poˆ-aˬ, tsawˇ haˬ heu gʼaˬ aˬ dui-ahˇ duˇ laˇ gʼaˬ-awˇ, yaw muiˬ yaw doeˇ tseˇ paˆ nya-eu zaˬ siˬ tsawˇ gahˇ kʼawꞈ ahˇ laˇ gʼaˬ-euˬ meh. Heu gaˇ paˇ bi jawˇ-awˇ dehꞈ-eu saꞈ laˇ biꞈ-eu aˇ bawˇ kʼoeˇ bawˇ-euˬ aˇ siˬ pyaˆ dzaˬ pyaˆ dzaˬ-ehˇ jawˇ naˇ, mˬ maˬ maˬ byaˆ zaˇ ziˇ maˬ shiˇ ni aˬ yawꞈ dehꞈ tehꞈ-a. Kʼoeˇ loꞈ-ehˇ maˬ geuꞈ nya-a.” 23Kʼoeˇ miˇ neh, tsawˇ haˬ kʼoeˇ gʼaˬ-ahˇ yaˇ kmˇ laꞈ nyiˇ teh doˆ nehˬ-awˇ, miˇ tsaˬ yuˇ-awˇ aˬ yawꞈ-ahˇ beh-euˬ loꞈ-ehˇ, miˇ tsaˬ-ahˇ bi ka dzaˬ bi ka dawˇ-iˇ-euˬ meh. 24Kʼoeˇ naˇ, dehꞈ-eu saꞈ laˇ aˇ bawˇ jaˆ gaˇ tsawˇ haˬ tiˬ gʼaˬ-iˬ maˬ ya iˇ-eu gʼaˇ duˬ, Jeˬluˇbeˬ#3.24 ‘Jeˬluˇbeˬ’ lehˇ ehˇ-eu-aˬ, aˬ dahˇ tsoꞈ-awˇ, tsawˇ haˬ tiˬ kʼoeˆ jeˬ zaˬ tiˬ kʼoeˆ lehˇ gʼeh-eu, yaw sahˇ ahˇ-awˇ muiˬ-eu shawˇ-eu jawˇ duˬ-ahˇ loꞈ piˇ-eu jeˬ-ahˇ ehˇ-eu meh. hawˇ-eu, miˇ ma oeˬ coeˇ oeˬ pyawˬ luꞈ-ahˇ mi seuˬ pyawˇ-eu miˬ dzaˬ doꞈ luꞈ-eu mi cehˇ-ahˇ, yaˇ kmˇ-euˬ nahˇ ma doˆ kʼehˬ paw bi jaˆ-awˇ, dehꞈ-eu saꞈ laˇ aˇ bawˇ dawˬ peh tsawˇ haˬ tiˬ gʼaˬ-iˬ maˬ bi laˇ ni bi loꞈ tsoeˬ-euˬ meh.
Atualmente selecionado:
Aˇ dahˬ 3: AHK
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
Akha Bible Revision (Latin Script) © Thailand Bible Society, 2011.