Matta 9
9
Emi Tnu-Tnu Dna Nna Anyi Ye
1Ntu cenu, Yesu wa lo eya wa je piya lo Kafarnafum, owa yi. 2Esa fyewyi aza ɓe n ʼɓi nayi fi-fiyi da yi ntu na pece. She Yesu ɓo gye ɓa gaiciya ga, wa ci eɓi nyasan yi ge “Nugun, laka! Miku oha laifi zhin gafara!”
3“Tukwo-mwa,! Eza deye gna ge wo zhin Shekwoyi nu.” A Yahudawayi abyeda nu gna je lo nu. 4Yesu ɓei kpe a aɓonubozhin ye, Wa nya ɓa ge, kniyi nu zhin fyei zhin aɓo nukwoyi nubo a? 5“Kni dei nu gna wo lo fwa-fwa, a cige miku ha laifi zo, kwo kuwa a la ho kagna?” 6Ntu cenu, Ma wu fye ge mi iko yi lo dna na nyi ma zo alaifi, wa pmi da ɓi nyasan yi wa gna, “Lakala, kmi ha pece ha lo ho puwa.”
7Eɓi ho wa laka woi gye agna wa lo wonya.
8Odna wo azayezhi, shi aɓeye ɓo zhin ai gye ɓa la Shekwoyi tu she wa ga aza iko lo nu.
9Shi Yesu ɓo zan-zan lo n zokwo yi, wa gye gadu gwoyi, Matta, n dna na gadu gwo ba. “Be ha ze mi bara,” Yesu nu gnawo lo nu. Matta laka wa gni lo nwoi.
10Esa nu Yesu ɓei dna n wa bara yi ɓai gyi nyagyi, (n Matta puwa), azagyifiyi ɓei fi ɓo n zhin azhi-ɓeyi.
11She a Farisiyawa yi ɓei gye ɓa nya Yesu abara ge, “Kniyi nu zhin efye Male yi ye wohin ɓedo n naza deye pya ya?”
12Yesu wa gna ɓage, “A lafiya da ta zan shigbe da shin, sai anyasan yi. 13Fye lo fye zan aya ye awyega shin, ‘Mi ta ye sadaka lo n na nyaga yim, Mi ye fya ze asun-sun gye yi.’ Ma ɓe, ntu ge ma yi alaifi da ɓa ɓe Shekwoyi aba to ge aza n ɓa yi ɓahin ge aɓe-fyeceyi m.”
14N wyihoyi Yohana batisma zhin yi abara ɓa ɓe Yesu aba ɓa nya wo ge, “Kniyi nu zhin to oha bara yi zhin azumi n gye yi ɓedo na Farisiyawa yi ma?”
15Yesu wa nya ge, “Kwo bmiya lo mula ɓa anugundo ɓa wun bugba to ɓai gyi nyagyin, mulaɓai gnisun n ɓai? Ama esa ɓelo a la Miya n ɓa ba, n sayi nu n ɓa to ɓei gyi nyagyi m.
16“Nyikanu ɓagu eje kwokwoyi ta n je woiwoyi ya? Ntuge kwo ɓei jesaya na tagu ba, oɓwo ko ladu n pata. 17Ko nyikanu ɓa fi nuwan shu-shuyi woi-woyi n pwakun kwokwoyiʼa? Nuwan shu-shuyi ye ɓa bma kwo har pwakun ɓa cepwo anab nuwan zeya. Sai dai a fi anab woi-woi n pwakun woi-woi, aɓa bwa ɓa pma vinya.”
18Wo gni woi da ɓo, aduwa nyakun tukwoda ɓe wa yashi n Yesu a pita ba wa ga wo mwa-mwa: a gna wo, “Emi ɓi ye bwa fi nu, ama ho ɓami ha je wo wye-wyei ga, ndei ha ɓe ha to wo bwa.”
19Yesu nwa bara yi, ɓa gni lo n woyi. 20Ɓai ye filo n zan yi mi, Nyikwoza ho wo yi ku eye bwa awo-cei-aba ami yi zewo ya, wa lo wa to Yesu je kpe bwa. 21Ntu ge wo ɓo zhin nubo ge, “Ko ma bwa wo bwa to-to, miɓa kagna.”
22Yesu wa pmiwye ya wa gye wo wa gna, “Nyigun, bugba bui-bui! Eho gaiciya ga la ho kagna!” Nyikwozahi wa bwa lafiya nsayi-sayi yi.
23Esa nu Yesu ɓo si tukwodayi puwa, wagye azai nawyi, ai gyi afi-nya, 24Wa gna, “A kun ɓaya, ntu ge ɓinyinkwoyi deye to fi m, ama wowan gye nu.” Aza ma wo san, ɓai kpe wa gye. 25She aza ɓo la za kun ya zhi n bmi, Yesu wa lo aba n ɓinyikwoyi ɓo dna, Yesu wa tabwa shi wo, wa je wye-wyei bwa. 26Nabari kwagnami n ekniyi vinya ntu aɓo wowo yi ɓo n Yesu ɓo zhin nyi.
27Shi Yesu ɓo gmi n puwa yi, awyebwayi ngun aba, ɓa vi wo ɓe ɓai gna, “Osu Dauda Nugun, gye yi sunsun.”
28Wa pmi wa to ɓa wye bwa wa gna, “Ntu fye gaiciya ga ɓo, fye gye wyeba!”
29Wa pmi wa to ɓa wye bwa wa gna, “Ntu fye gaiciya ga ɓo, fye gye wyeba!”
30Nsai-sayi, ɓa gye wyeba, Yesu wa tu ɓa gbe ge, ɓa to gna zaho-zaho yi m. 31Ama to ɓa ce pyi m, sai ɓa da nabari laɓa n zhimi.
32Yesu wa laka ɓo, wa she gun takpeɓeda, ntu ge azafun nukwoyi ɓo fi wo. 33Yesu wa kun ɓaya, zahi wa ya ɓeda da. Ca wo aza yezhi n mwa ɓai gna, “Yi to shin aɓeye gyem.”
34Ama a Farisiyi ɓa gna, “Nya ko zhin woi kun azafun nukwoyi ya nyi, ntu ge wo ɓai lo n wohin, Shetan dna lo n wo mi, azafun nukwoyi su.”
Atnu-Tnuyi Apma Nɓa Yi-yi-i
35Yesu wa zan laɓa na zhi ɓiyi n na azhi dnagmai yi woi wu aza dna na Yahudawayi aduwa nyakun, woi danabari manayi ntu Shekwoyi ebe mi ɓo woi ka anyasan gna abaho-bahoi n wa lo. 36Aza sun-sun a wan wo, ntu ge ɓaɓo na ɓei mwa begye to akpe shi ɓa ɓa zhin ko aba n ɓa-ɓa lo ntu bmazhin ɓom, n wu gye akni ntna knayi.
37Wa gna wa bara ge, “Wyido lo mwa ama atnu-tnuyi bwa sun lo fyewyi nu. 38Fye zhin aduwa ga Dagayi wyido nya watnu n na tnu-tnu zhin-yaje yi nwo fwa.”
Atualmente selecionado:
Matta 9: GAW
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
Alkawali Woiwoyi
(Gbagyi New Testament)
Copyright © 1997 by Biblica, Inc.®
All rights reserved worldwide.