RIPHUTNA 16
16
Hagari neh Ismaela
1Abrama nupui Saraii khan nai rêng rêng nei pêk mak a. Nikhomsela, Saraii khan Aigupta mi, suaknu khatkah arming Hagari a nei a. 2Saraii khan Abrama ziangah, “Pumapa lakin nai inei rangin ne phal mak a; khasikin, ringaiihoi takkan ki suaknu hih zâlpui inla, ki rang nai a ne nei pêka rang,” a ti a. Abrama khan Saraii thu khah a zôm tâk a. 3Khanchu, Saraii khan a suaknu Aigupta mi, Hagari khah a ṭhui a, a pasal Abrama ziangah khan a thâikêm rangin a pêk tâk a. Hi thil hih Abrama kha Kanan ramah kum sômkah a om nunga tlung a nit. 4Abrama khan Hagari khah a lei zâlpui a; Hagari khan nai a vong tâk a; nai a vong iti a riat kaneh chu a pi khah a musit zel tâk a.
5Khanchu, Saraii khan Abrama ziangah, “Hingka taka Hagari hin a ne imusit hih nangma thonsual a nit. Ki suaknu hih keimah ngêiin ni thâikêm rangin nang kî pêk a nit kha; nikhomsela, nai a vong iti a riat kaneh chu a ne imusit tâk a nit. Pumapa khan nangmah neh keima kâr thu hih tûm â dik ei init ngaitua riseh,” a ti a.
6Abrama khan Saraii kha a sâm a, “A ṭhat, ni suaknu a nit a, ni thu nuaia om a nit, ni nuam lam angka takin a chungah tho roh,” a ti a. Khanungchu, Saraii khan Hagari khah deng ân thei tâk a, khasika khan Hagari khah ai rot tâk a nit.
7 Pumapa Vântirtôn khan Hagari khah ramchârah Sur panna lampui tuikuang kôlah khan artongpui a. 8A ziangah, “Hagar, Saraii suaknu, taka rithoka nî hong im? Taktiang ipan rang tâk chêm?” a ti a.
Ani khan “Ki pi Saraii ziang ata kî rot a nit,” a ti a.
9 Pumapa Vântirtôn khan a ziangah, “Ni pi ziangah kîr nôk inla, a thu thun va om roh,” a ti a. 10Pumapa Vântirtôn ngir khan a ziangah, “Ner chihei khah tep zoi loi rakka tamin lân pung ki ti. 11Ringai roh, nai ni vong tâk a, naipa nei ni ta; Pumapa khan ni dengthei tuang khêk irî a lei riat tâk sikin ni naipa riming kha Ismaela#16:11 ‘Pathianin a riat’ tina a nit. ni sak rang a nit. 12Nikhomsela, ni naipa khah ram sakuartung angka nîng a ta; mi tu khom doi a ta, ani khom khah mi tinin doi an ti. Ani chu a suapuihei lâi ata a ranin om a ti,” a ti a.
13Hagari khan a lungrilin, “Pathian ki mu ti tak a, ki mu nung khomin ki thuhei hih la sîr rangin ki lai ring mai a nit hi te,” a ti a. Khanchu, ama risônpuitu Pumapa riming khah “El-roi,” #16:13 ‘Mu thei Pathian ni nit’ tina a nit. a be a. “Ne mutu Pathian chu kî mu tâk a nit hi,” a ti a. 14Khasika khan, kha tuikuang khah “Beer-lahai-roi”#16:14 ‘Ringna muna tuikuang’ ‘ne mutu Pathian iring tuikuang’ tina a nîng a ti. ibe a nit tâk a, Kades neh Bered khua kâra om a nit.
15Hagari khan Abrama khah naiipa a nei pêk a; khanchu, Abrama khan a naipa riming khah “Ismaela” a sak tâk a.#Gal.4:22. 16Abrama khah Hagarin Ismaela a nei pêk lâiah khan kum sômiriatkah kum irukkah mi a nit.
Atualmente selecionado:
RIPHUTNA 16: BIATBSI
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
The Bible Society of India
© 2014, Used by permission. All rights reserved. More