Матай 20
20
Юзим бавдагы исшилер акында таварых
1«Алладынъ Патшалыгы эртенъ мен эртенъликте юзим бавына ялшылар алмага шыккан уьй иесине усайды. 2Ол исшилер мен, бир куьнге бирер динар тоьлемеге деп, ярасып, оларды оьзининъ юзим бавына йиберди.
3Уьшинши саьатке#20:3 Уьшинши саьат: саьат 09:00. ювыклаганда ол шыгып, майданда бос турган баска аьдемлерди коьрди. 4Оларга да: „Келинъиз сиз де Меним юзим бавыма, сизге тийислисин берермен“, – деди. Олар бардылар.
5Тагы да алтыншы эм тогызыншы саьатке#20:5 Алтыншы эм тогызыншы саьат: саьат 12:00 эм 15:00. ювыклаганда шыгып соьйтип этти. 6Сонъында он биринши саьатке#20:6 Он биринши саьат: саьат 17:00. ювык заманда шыгып, бос турган баска аьдемлер тапты да оларга: „Сав куьнди сиз мунда бос неге турасыз?“ – деди.
7Олар ога: „Бизди бирев де ялга алмаган“, – дедилер.
Уьйдинъ иеси оларга: „Сиз де меним юзим бавыма келинъиз, куллыгынъызга коьре мен тоьлермен“, – деди.
8Кас каралганда юзим бавынынъ иеси оьзининъ ис юргистуьвшисине: „Исшилерди шакыр да, сонъында келгенлерден баслап, бириншилерге дейим, олардынъ кыйын акларын бер“, – деди.
9Он биринши саьатлерде келгенлер бирер динар алдылар. 10Биринши болып келгенлер олардан коьп алармыз деп саклаган эдилер. Тек олар да бирер динар алдылар. 11Куллык акларын алганлай, олар уьйдинъ иесине разы болмаганларын айтып басладылар: 12„Бизден сонъ келгенлер бир саьат ислегенлер, а сен оларды бизи мен – куьннинъ кыздырувына тоьзип ислегенлер мен – тенъ эттинъ“, – дедилер.
13Юзимши олардынъ биревине яваплап: „Досым, мен мунда янъылыс этпеймен: сен мени мен бир динарга яраспаганма эдинъ? 14Оьзинъдикин ал да кет; мен бу арттагыларга да сага бергенимди бермеге суьемен. 15Мен оьзимнинъ акшамды суьйгенимше кулланмага эркин тувылманма? Йок десе меним юмартлыгым уьшин куьнлейсинъме?“ – деди.
16Арттагылар мине сондай алдыда, а алдыдагылар артта болаяклар».
Иса оьлип тирилеегин уьшинши кере билдиреди
17Ерусалимге бара турганда Иса он эки соктасын йолдынъ бир янына шыгарып оларга:
18«Мине биз Ерусалимге бараятырмыз. Онда Аьдем Улы бас дин куллыкшылары ман дин аьлимлерининъ колына берилеек. Олар Оны оьлтирмеге оьким шыгараяклар.
19Оны маскаралап, камышыламага эм кашка кермеге баска миллетлилерге тапшыраяклар, тек Ол уьшинши куьнинде тирилеек», – деди.
Зебедей улларынынъ тилеги
20Сол заманда Зебедей улларынынъ анасы уллары ман Исадынъ касына келди. Ога бас ийип, тилеги бар экенин айтты.
21Иса: «Сен не тилейсинъ?» – деди.
Кыскаяклы: «Меним бу эки улыма Патшалыгынъда бирине онъ янынъда, экиншисине сол янынъда олтырмага разылыгынъды бер», – деп тилек салды.
22Иса явапка: «Не тилегенинъизди билмейсиз. Мен ишеек аяктан#20:22 Бу аятта аяктан ишуьв эм сувда шомылдырылув – азап шегуьвдинъ символлары. ишпеге, Мен шомылдырылаяк сувда шомылдырылмага боларсызба?»
Олар: «Болармыз», – дедилер.
23Сонъ Иса оларга: «Элбетте, Мен ишеек аяктан ишеексиз, [Мен шомылдырылаяк сувда шомылдырылаяксыз]. А онъ янымда эм сол янымда олтырувга эркинлик беруьв Меним колымда тувыл. Ол орынлар Атам кимлерге аьзирлеген болса, соларга байыр», – деди.
24Муны эситип, калган он сокта эки кардашка ашувландылар. 25Иса оларды касына шакырып, булай айтты: «Сиз билесиз, миллетлердинъ басшылары халкты юмсайдылар, уьйкен аьдемлери де оларды бойсындырадылар. 26Сизинъ аранъызда сондайлар болмасын. Керисинше, сизинъ аранъызда уьйкен болмага суьйген – ыргатынъыз болсын. 27Сизинъ аранъызда биринши болмага суьйген – кулынъыз болсын. 28Сондай болып Аьдем Улы да Оьзине куллык эттирер уьшин тувыл, Оьзи куллык этпеге, курман болып коьплерди куткарып, Оьзининъ янын бермеге келген».
Эки сокырдынъ коьзлери ашылады
29Олар Ериходан шыкканда, коьп халк Исадынъ артыннан барды. 30Онда йолдынъ янында олтырган эки сокыр, Исадынъ оьтип бараятырганын эситип: «Даут Улы, Бийимиз, бизди языксын!» – деп кышкырып басладылар.
31Халк болса, оларды тыйып, уьндетпеске шалысты, а олар: «Даут Улы, Бийимиз, бизди языксын!» – деп тагы да бек кышкырыкладылар.
32Иса токтап, оларды шакырып: «Мен сизге эткендей не зат тилейсиз?» – деп сорады.
33Олар: «Бийимиз! Коьзлеримиз ашылсын деп тилеймиз», – дедилер.
34Иса, языксынып, олардынъ коьзлерине тийди. Сол саьат сокырлардынъ коьзлери ашылдылар эм экеви де Онынъ артыннан кеттилер.
Atualmente selecionado:
Матай 20: NOG
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
© Институт перевода Библии, Москва, 2011