Mateo 3
3
Som nachilaxanataxanaq l'enaxat Juan da'aqtaxaalec yi tojlec 'alhua
(Marcos 1.1-8; Lucas 3.1-9, 15-17; Juan 1.19-28)
1Qaq co'ollaq mashi qaÿoqteguelo soua vi'iyi, nachi so nachilaxanataxanaq l'enaxat Juan anac da da'aqtaxaatapeguelec yi tojlec 'alhua mayi huaña yi Judea. 2Qaq da l'aqtaxanaxac 'eeta':
–Qai'axañiideec qome naua qan'onataxacolli', cha'ayi mashi sa qaÿapeque da l'onataxanaxac ñi Dios mayi neta'ague da piguem da ilo'ogue 'enauacna.
3Qaq se'eso Juan nachiso som ÿiyiñi co'ollaxa so l'aqtaxanaxanec ñi Dios l'enaxat Isaías, co'ollaq 'eeta':
Huo'o ca shiÿaxaua chimaqtapeguelec yi tojlec 'alhua,
'eeta' da lÿaxanaxac:
“Qauqataxañiÿai' qome ca nqa'aic ñi qadataxala';
ÿataqta qan'onaxachiitegue qome ca llic.”
4Qaq naua alogo so Juan n'oxonqa, chigaqaiguilo na laue ana camello. Qaq so nsaataxaqui l'oc, qataq chictac ana shiiquioxoi qataq na dapic lli'i. 5Nachi anac da n'axaÿaxana somayi na chigaqau'a yi la ciudad Jerusalén, qataq 'enauac nam netalec yi 'alhua Judea, qataq nam sa qaÿapiguii 'ale'u so tala Jordán. 6Nachi namayipi i'axa't naua lasouaxashi'te da ÿaxaadeec, nachi so Juan nachilaxangui so tala Jordán.
7Qalaxayi so Juan co'ollaq ila'a da ÿataqta qalota na chigaqaigui na fariseopi qataq na chigaqaigui na saduceopi da anac da huotaique da qanachilaxan, nachi somayi 'enapega, 'eeta':
–¡Qami' n'adaxanaq llalaqpi! ¿Négue't ca qami' icoyigue'n, da yaqto' qananeltaxañiiguet cam qaica ca 'en'am da lchiquiaxac nhuaxanaguecna mayi sa qaÿapeque? 8Ÿataqta qanachaxañiita qome, yaqto' ishit da qaila'a da 'eesa da qami' qai'axañiideec naua qan'onataxacolli'. 9Qaq sa ishit qome da tatapigui qadvilli da qoñiita': “Qomi' maichi qomi' llalaqpi so Abraham.” Cha'ayi qami' shinapegalo da ñi Dios ishit da ivida'a da ÿachigoxotaigui ne'ena coma'pi ca ÿataqta llalaqpi so Abraham. 10Aca qachipe mashi sogote imetai' da iquesoxoñot ana qo'ipaqpi. Qaq 'enauac anam qo'ipaqpi mayi sa ishit da no'on ana ala, nachi anamayi qaiquesoqot. Ime, qaq qaÿasaxangui ca nodec. 11Qaq 'eesa da aÿim nagui qami' ñachilaxanguilo na 'etaxat, qaq damayi naigui da qami' qai'axañiideec naua qan'onataxacolli'. Qalaxayi nam aÿim nca'attalec, namayi dachilaxanataxana qome ca Espíritu Santo qataq ca nodec. Qaq namayi ÿataqta ÿacteec da l'añaxac, sa ishit da aÿim 'eeta'am. Qataq sa ishit da ñalau'a da chochi sachita'pe caua lapela'te. 12Qaq camayi lasoqta'a ca lchigoxosoxonaxat, da yaqto' ichigoq na trigo da nqat na lvi. Ime, qaq ÿoxotoigui ca laÿi'. Qaq na lvi, qalaq ÿavigaxat, ÿasaxangui ca nodec mayi sa ishit da 'om.
Da nachilaxanataguec so Jesús
(Marcos 1.9-11; Lucas 3.21-22)
13Huaña, nachi anac so Jesús, chigoqta'a yi Galilea da anaÿa yi tala Jordán, yim hueta'a so Juan, da yaqto' so Juan nachilaxan somayi. 14Qalaxayi so Juan co'ollaq chita'ague, nachi sa ÿaÿamaxaden da nachilaxan somayi. Nachi 'enapego' so Jesús, 'eeta':
–Aÿim mayi iuen da aÿim 'anachilaxan, qalaq ¿tá'ainco' yim aÿim 'auanaÿa?
15Qalaxayi so Jesús 'enapeco':
–Qalaxayi nagui no'on da 'auauaqta'a da nachi shinaqtec de'eda. Cha'ayi ÿaÿamaqchiguiñi da qomi' so'otaq 'enauac nam 'eetapeguecpi ñi Dios.
Nachi so Juan ÿaÿamaxadeeta. 16Qaq co'ollaq mashi qanachilaxan so Jesús, nachi ca'ai so 'etaxat. Huaña, nachi 'ico' qaÿauatoigui na piguem, nachi so Jesús ÿauaateguet so n'Espíritu ñi Dios, 'eeta'am na qoto' da naÿaña somayi. 17Nachi qai'axaÿa, chimqot na piguem, 'eeta':
–'Eda da ÿalamaxat ÿalec mayi ÿauotaxat. Damayi ÿataqta ñitootapeguec.
Atualmente selecionado:
Mateo 3: TBSNT
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
Nuevo Testamento Toba Qom, Dios Nvita Na Shiỹaxauapi © Sociedades Bíblicas Unidas, 1981.