Panagnaꞌan 47
47
1Manjari hap pī ne si Yusup ngakahan sultanin, paꞌinne, “Tekka ne samakun duk meꞌ pungtinaꞌikun amban lahat Kanaꞌan. Binoꞌo weꞌ de meꞌ bili-biliden duk meꞌ sapiꞌden duk meꞌ kēmonden. Īꞌ ne siye laꞌi si Gosen.” 2Nuhut si Yusup isab lime pungtinaꞌinen bakas pineneꞌ weꞌ ne duk pinakilale weꞌ ne si sultanin. 3Paꞌin sultanin si meꞌ pungtinaꞌi Yusupin, “Ine hinang-hinangbin?” Nambung siye, paꞌinde, “Kami, meꞌ daraꞌakannun, kēmon kami magpangkat-mamangkatin, iye bahan-bahan kamihin magipat bili-bili.” 4Ubus paꞌinde pe si sultanin, “Pitu ne kami patennaꞌ tuꞌu si lahat inin peggeꞌ gaꞌ niyaꞌ pamakan meꞌ hayep kamihin laꞌi si lahat Kanaꞌan peggeꞌ sigpit manamal meꞌ aꞌa malaꞌihin sabab unusin. Ampunun kami weꞌ niyaꞌ aka kami si kaꞌu. Māku-māku kami hadja weꞌ kami, daraꞌakannun, patennaꞌ laꞌi si lahat Gosen.”
5Manjari paꞌin sultanin pu si Yusup, “Na, tekka ne samanun duk meꞌ pungtinaꞌinun. 6Patennaꞌun siye dem lahat mahāpin. Subey siye patennaꞌ laꞌi si Gosen. Duk bang kataꞌuhannu bang sine-sine siye mataꞌu magipat hayep manamalin kabayaꞌankun iye isab subey magipat meꞌ hayepkun.”
7Manjari binoꞌo weꞌ si Yusup samanen pinakilale si sultanin. Pākuhan si Yakub amban Tuhan ledjikiꞌ sultanin. 8Tilew sultanin si Yakub paꞌinne, “Piyen tahun ne umulnun?” 9Paꞌin si Yakub, “Da hatus duk tellumpūꞌ tahun ne umulkun. Pandak du umulkun duk tiggelanku tuꞌu si dunya luwal ku kasigpitan. Gaꞌ pe taꞌabutku tahaꞌan umul kapapuꞌankun.” 10Ubus maꞌid ne si Yakub duk pināku-pākuhan kahāpan weꞌ ne sultanin duk tahalaꞌ ne iye amban pagharapande.
11Manjari inurungan weꞌ si Yusup samanen duk meꞌ pungtinaꞌinen meꞌ bulak mahāp pagpakanan hayepin dem lahat Misir. Kuweꞌ bakas pangandaꞌakan sultanin, laꞌi siye si lahat Gosen palaꞌihan puweblo Rameses. 12Duk si Yusup ngagastuhan samanen duk meꞌ pungtinaꞌinen duk meꞌ usbanen sampay mākanak madikiꞌin.
Pesōng unusin
13Manjari gaꞌ niyaꞌ kinakan si Misir sabab unusin hangkan sigpit manamal meꞌ aꞌahin. Lamma meꞌ aꞌa si lahat Misirin duk meꞌ aꞌa si lahat Kanaꞌanin peggeꞌ inusan siye manamal. 14Kēmon sīn meꞌ aꞌahin dem lahat Misir duk dem lahat Kanaꞌan ginuna ne pamelli kinakan amban si Yusup. Ubus binoꞌo weꞌ si Yusup sīnin pī inennaꞌ dem astanaꞌ sultanin. 15Pag ubus ne pamelli weꞌ meꞌ aꞌa Misirin duk Kanaꞌanin kēmon sīnden, pī ne meꞌ aꞌa Misirin pu si Yusup duk paꞌinde, “Urunganun kami kinakan peggeꞌ gaꞌ ne niyaꞌ sīn kami. Suddanen matey kami bang gaꞌi kami urungannu kinakan.” 16Nambung si Yusup, paꞌinne, “Boꞌohun bi pitu meꞌ hayepbin pagsambiꞌ kinakan bang gaꞌ niyaꞌ sīnbi.” 17Hangkan binoꞌo weꞌ de meꞌ hayepden pī pu si Yusup duk pagsambiꞌde kinakan meꞌ kuraꞌden duk meꞌ bili-biliden, meꞌ sapiꞌden duk meꞌ asnuden. Sā miyaꞌan sinambiꞌan weꞌ si Yusup hayepden duk kinakan tahun miyaꞌan.
18Pag ubus tahun miyaꞌan, pī ne isab siye si iye tahun mapaturulin duk paꞌinde, “Kataꞌuhannu, Tuwan, weꞌ ubus ne kēmon sīn kamihin, duk kēmon hayep kamihin luꞌu ne si kaꞌu. Gaꞌ ne niyaꞌ talebbi si kami luwal saꞌ baran kamihin duk bulak kamihin. 19Tabangun kami! Daꞌa kami pasagadanun matey! Hāp pe kami manjari banyagaꞌ sultanin, daꞌa bang matey. Eddoꞌun bulak kamihin para si sultanin panambiꞌ kinakan. Urunganun kami binihiꞌ duk niyaꞌ tanem kami duk hadja gaꞌi luꞌuhan dīne bulak kamihin duk kami ellum.”
20Iye ne miyaꞌan, binelli weꞌ si Yusup para si sultanin kēmon bulakan laꞌi si Misirin. Pinabellihan weꞌ meꞌ aꞌa Misirin dangan-dangan meꞌ bulakden peggeꞌ sigpit siye manamal sabab unusin. Hangkan tapī meꞌ bulakden si sultanin. 21Duk kēmon meꞌ aꞌa dem lahat Misirin manjari banyagaꞌ sultanin. 22Meꞌ bulak meꞌ imamin hadja gaꞌi binelli weꞌ si Yusup peggeꞌ meꞌ imamin ginastuhan weꞌ sultanin hangkan niyaꞌ kaꞌellumande duk gaꞌi subey pabellihande bulakden. 23Ubus paꞌin si Yusup si meꞌ aꞌahin, “Na, ellew inin bakas tabellite ne kaꞌam duk meꞌ bulakbin para si sultanin. Tiyaꞌ ne binihiꞌbin. Magtanem ne kaꞌam. 24Pag magani ne kaꞌam bahagiꞌun bi lime. Da bahagiꞌ si sultanin, ampat bahagiꞌin si kaꞌam ne duk niyaꞌ ne binihiꞌbi duk kinakanbi kēmon magdembuwaꞌ lumaꞌin sampay anakbin.” 25Paꞌinde, “Asal tinimbul kami weꞌ nu. Magsukul ne kami weꞌ manjari banyagaꞌ sultanin kami, Tuwan.” 26Ubus, hinang si Yusup miyaꞌan manjari saraꞌ ne sabab meꞌ bulak diyalem lahat Misir. Duk iye miyaꞌan saraꞌin sampay kuweꞌitu weꞌ si lime bahagiꞌ subey sultanin kabahagiꞌan da bahagiꞌ. Luwal bulak meꞌ imamin hadja gaꞌ tapī si sultanin.
Nessaꞌ si Yakub
27Manjari patennaꞌ meꞌ aꞌa Hibranihin dem lahat Misir laꞌi si Gosen. Pesōng dayaden duk ngaꞌekka tubuꞌden. 28Patennaꞌ si Yakub laꞌi si Misir sampūꞌ duk pitun tahun duk umulnen taꞌabut ne da hatus duk ampatpūꞌ duk pitun tahun. 29Pag sōng matey ne si Yakub, pinasanan weꞌ ne anaknen si Yusup hap pī si iye. Ubus paꞌinne pu si Yusup, “Bang kew malasa si aku bettadun tangannun diyawaꞌ paꞌaku duk napa kew weꞌ tuhutnu du sessaꞌku inin. Daꞌa ku kubulun tuꞌu si Misir. 30Saguwaꞌ pag matey ne ku pabihingun ku si meꞌ kapapuꞌankun. Boꞌohun bangkeykun tahalaꞌ amban Misir harap pī si kubul kapapuꞌankun.” Paꞌin si Yusup, “Tuhutku du teꞌed panessaꞌnu inin.” 31Ubus paꞌin si Yakub, “Napa kew si aku.” Ubus napa ne si Yusup. Ubus miyaꞌan, patukkuꞌ si Yakub diyataꞌ pabākanne magsukul si Tuhan.
Atualmente selecionado:
Panagnaꞌan 47: yakV
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
© 2019, Wycliffe Bible Translators, Inc. All rights reserved.