Matiyo 4
4
Yang Pagsatsat ni Iblis kang Isa
(Mark. 1:12-13; Luk. 4:1-13)
1Ansinyan dyadaa si Isa ng Nyawa ng Tohan adto sang kamingawan kay antak satsatun yan ni Iblis. 2Na, pagkatapos ni Isa magpowasa sa suud ng 40 na allaw aw 40 na gabi, yamagutum da yan. 3Ansinyan dyomood kanan yang manatsatay aw laong nan, “Kong bunna ikaw yang Anak ng Tohan,#4:3 Yang pyaglaongan na Anak ng Tohan sambok na ngaan atawa titolo para kang Isa Almasi na way labot sang pagpanganak kanan. Yang karim ipasabot sini na titolo na yang kariko ng kinaiya aw kabarakat ng Tohan iyan kang Isa Almasi. sogowa yaning mga bato na amainang ng pan.”
4Awgaid tyomobag si Isa aw laong nan, “Yamakasorat sang Kitab, ‘Yang manosiya di amabowi sabap sang pagkan gaid, kondi sabap oman sang pyaglaongan ng Tohan.’ ”#4:4 Yani na ayatan yamakasorat sang Kitab Tawrat, Pangagama 8:3.
5Pagkatapos sinyan dyadaa yan ni Iblis adto sang Awrosalam, yang tyatawag na sotti na syodad, aw painduga nan adto sang labi na makagwas na bain sang Baay ng Tohan. 6Ansinyan yagalaong si Iblis kang Isa, “Aw bunna ikaw yang Anak ng Tohan, layog adto daum. Kay yamakasorat sang Kitab na
“ ‘Osogoon ng Tohan yang mga malaikat nan sang pagatiman kanmo.
Asakgawon kaw nilan antak yang siki mo di komuug sang bato.’ ”#4:6 Yani na ayatan yamakasorat sang Kitab Jabor 91:11-12.
7Tyomobag si Isa, “Aon oman yamakasorat sang Kitab na yagalaong, ‘Ayaw pagtigia yang Tohan na kanmo Tagallang.’ ”#4:7 Yani na ayatan yamakasorat sang Kitab Tawrat, Pangagama 6:16.
8Pagkatapos sinyan dyadaa da oman yan ni Iblis adto sang mataasay na butay aw pyapakita nan kanan yang kariko ng mga pyagadatowan adi sang babawan ng donya aw yang kadyawan sinyan. 9Ansinyan yagalaong si Iblis kang Isa, “Yang kariko sinyan atag ko kanmo kong mosojod kaw kanak.”
10Tyomobag si Isa, “Panaw da, kay Iblis, kay yamakasorat sang Kitab, ‘Yang Tohan na kanmo Tagallang, yan gaid yang asambayangan aw apangagadan mo.’ ”#4:10 Yani yang yamakasorat sang Kitab Tawrat, Pangagama 6:13.
11Pagkatapos sinyan pyapanawan da yan ni Iblis. Ansinyan dyomatung yang mga malaikat aw yatiman nilan si Isa.
Yagasogod si Isa Magosiyat sang Probinsya ng Jalil
(Mark. 1:14-15; Luk. 4:14-15)
12Ansinyan pagdungug ni Isa na yamapiriso da si Yahiya, byomarik yan sang probinsya ng Jalil. 13Awgaid wa da yan magauya adto sang Nasarit kondi adto da sang Kapirnaom, sambok na longsod sang kilid ng Linaw ng Jalil na adto yakabutang sang lopa na yatag sangaon sang mga tribo ni Sibolon aw Naptali. 14Na, ansinyan yamatoman yang pyaglaongan ni Nabi Isayas na laong nan,
15“Yang lopa ni Sibolon aw yang lopa ni Naptali na
iyan sang daan pasingadto sang dagat, yang banwa na adto sang dipag ng tobig ng Yordan,
yan yang banwa na tyatawag oman ng Jalil na pyagauyaan ng mga dili ng Yahodi.
16Yang mga otaw na yagauya ansan maynang iyan silan sang kaduguuman,
awgaid makakita da silan ng allag na labi na mabislaw.
Maskin iyan silan sang kaduguuman aw yamalluk silan matay,
akaallagan da silan.”#4:16 Yani na mga ayatan yamakasorat sang Kitab Tawrat, Nabi Isayas 9:1-2.
17Sikun sidto na wakto yagasogod da si Isa magosiyat aw laong nan, “Pagtawbat kamo aw biyai mayo yang mga dosa mayo kay masaid da domatung yang pagdato ng Tohan.”
Yang Pagpili ni Isa sang ona na mga Inindowan nan
(Mark. 1:16-20; Luk. 5:1-11)
18Ansinyan sarta yagapanaw si Isa sang kilid ng Linaw ng Jalil, kikita nan yang dowa na maglomon na si Simon na tyatawag oman ni Pitros aw yang mangod nan na si Andriyas. Yamamokot silan kay mangingisdaay silan. 19Yagalaong kanilan si Isa, “Abay da, agad kamo kanak. Sikun adon inangun ta kamo na mangingisdaay ng otaw antak mangagad silan kanak.” 20Na, pagdungug sinyan bibiyaan dayon nilan yang kanilan pokot aw yamagad silan kang Isa.
21Ansinyan pyomanaos si Isa pagpanaw aw kikita oman nan yang dowa na maglomon na si Yakob aw si Yahiya na mga anak ni Sibidi. Yanagpona silan ng pokot adto sang bangka upud sang ama nilan. Tyatawag silan ni Isa na amagad kanan. 22Ansinyan bibiyaan da nilan yang bangka aw yang ama nilan aw yamagad silan kanan.
Yagaindo si Isa aw Yagapakadyaw yan sang mga Masakitun
(Luk. 6:17-19)
23Ansinyan yamakarimpud si Isa pomanaw sang tibok probinsya ng Jalil. Yagaindo yan adto sang mga pagsasambayangan ng mga Yahodi aw yagaosiyat yan ng Madyaw na Gogodanun makapantag sang pagdato ng Tohan aw pyapakadyaw nan yang kariko ng mga masakitun. 24Na, yang gogodanun makapantag kanan yamakarimpud oman adto sang bangsa ng Siriya. Agaw, dyadaa da ng mga otaw yang kariko ng mga masakitun adto kanan, mga otaw na bali na kasakit yang lawas nilan, mga kyakasaytanan, mga byababoy-baboy aw mga yamasadi yang lawas nilan. Aw yang kariko nilan pyapakadyaw ni Isa. 25Ansinyan madaig yang mga otaw na yamagad kanan. Aon mga taga Jalil, aon oman sikun sang probinsya ng Dikapolis,#4:25 Yang mana ng Dikapolis Sampoo na mga Longsod. taga Awrosalam, taga Yahodiya aw sikun oman adto sang dipag ng tobig ng Yordan.
Atualmente selecionado:
Matiyo 4: kqe-e
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
© 2012, Wycliffe Bible Translators, Inc. All rights reserved.