LUK 17
17
Kem kama
(Met 18.6-7, 21-22; Mrk 9.42)
1Sateichii mpounii mpou bou- mei dakii tamle, “Meinahgo kem kama tiimatu tang karam kahem tei gongling tangle, nlenii kahem tiikakaimei tei kadaziikapii kamage tangpo! 2Mpounii nahmei kacheng aikak kito hangniniigo kem kama kikii chyiikai kalei sungnii, mpou kagung kikii kakaryii kuitu kadi hangninii kuikaisii dwijai kikii toikai kalei teinapou bibwile. 3Gonyii roinapii sakai wolo.
“Go sanapiinii kem kama tiile- pochiinii mpougo n-gilo, sateikii mpounii lung kali lepochiinii, mpou- go magapyiilo. 4Sateichii mpounii tingnei kakii godato kem kama tii sanakii tiikalei kito, goda gong sanakii gong siinii ‘I-lung kali takle’ sii tam lepochiinii mpougo maga- pyiilo.”
Kamalum
5Sateichii Tiilamlwi kapyiimeinii Bangpii dakii tamle, “Nyiimah kamalum tei dibui matulo!”
6Teito Abangpiinii tamle, “Gonyii- nii njang gaiti lwirou hangninii langkii kamalum tei lei lepochiinii gonyiinii ruibang aigo ‘maa pai mpat tosii dwijai phyiiryiito lungtulo’ sii tamchii, teiteinii gonyii sam switangle.
Kikaleimeinii tii kamajyii tha
7“Sateichii goki kaleipii teinii lu raksii mak-kii Jao koikaleipii teinii lu kito nlai kagong kak, ‘kalangsii liitlo, bamsii chiitulo, sii mpou dakii tamtang karam mei gonyii kakto ta leipo’? 8Tei tungpii, Inii chii tang karam jangpii nang tiikadalo; ‘Inii chii sang sak sang kasuta gu nga ngalo, tei tainii chii sak losii mpou dakii tam lakpo’? 9Mpounii kakhatsii katam tei kikaleipii teinii katii kapung jangpii mpougo hakalang tam leipo? 10Tei takumpiinii gonyii dakii kakhat kabam hangtei tiisang takle sekchii, ‘nyiinii samah kado kasu kikaleimeile; nyiimah tii kamajyii tha tei nyiinii tiitakle sii gonyiinii tamlo.’ ”
Jisunii mei keariigo tii mbi kapyii
11Jisunii Jerosalem tat kaliit tinglang kak, mpounii Samariya sateichii Galili kak tat liitle. 12Sateichii mpounii nam hangniniiki tat kaliit kak, mpara tiisii kaleimei kearii akak dhiisii kasat tei mpounii kadou takle. 13Sateichii ahnyiinii lat sagoisii tamle, “He Pumpii Jisu, nyiigo lungsyii pyiilo!”
14Mpounii ahnyiigo ngouwo sek-kii, mpounii ahnyii dakii tamle, “Gonyiinii maasii kanat kajum Atingmeigo mangoulo.” Teito ahnyii- nii pwidi lamto tat leibangpii, ahnyii mah ra katii tei biwo takle. 15Sateichii ahnyii kak kito mei hangninanii mpou gamtei biwo takle katu tei ngouwo sek-kii, mpounii nlaigong rok sagoisii Saraago toile. 16Mpounii Jisu pibangto koumangsii Jisugo hakalang tamle, sateichii mpounii Samariyameile. 17Teito Jisunii tamle, “Inii keariigo tii mbi- pyii makde? sokchyii teinii kadaki leipo? 18Kaki lui aipou supiinii nlaigong Saraago tam matoi tang karam dousu takpo?” 19Teito Jisunii mpou dakii tamle, “Tusat tosii tat tulo, gomah kamalum teipiinii n-go tii mbipyii takle.”
Saraamah sating sazyii gong tang karam sam
(Met 24.23-28, 37-41)
20Kabijai katiimei kangkanii Saraamah Sating sazyii tei kadadou gong tangpo sii Jisu dato n-nhiile. Mpounii ahnyiigo khekalatle, “Sa- raamah Sating sazyii teinii tikabui tiisii kasiiti tiisii gong lakle. 21Sateichii ‘julo, aiki leile!’ mak-kii ‘teiki leile!’ sii ahnyiinii tam lakle, kadapochiinii Saraa mah Sating sazyii teinii gonyii lungki teito leile.”
22Teito Jisunii mpou boumei dakii tamle, “Tinglang hangtei gong leitakle gonyiinii meinah Sapfii mpoumah leimik hang kito tingneikii leimik ngoukainyii tang karam tei, nlenii gonyiinii ngoulakle.” 23Sa- teichii ahnyiinii gonyiigo tam tangle, ‘julo, aiki!’ mak-kii ‘julo, teiki leile!’ nlenii maado maa sulo, ahnyii taido swisulo. 24Kadapochiinii sating kapeek sek-kii bam hangninii kito kakilam va katu takumpiinii gong tangle. 25Nlenii mpounii kamage kalak hangkapii pung tangle satei- chii mei ai-ha ainii mpougo mazhii lakle. 26Noha mah tinglang kak ki takumpii nii, Meinah Sapfii mpou mah tinglang kak kitei tei takum tangle. 27Noha nii Malyii lung tat kaliit piinei katang tei, meihangnii chiisii saksii sapwimei sapfiimei kanoulotsii bamle; sateichii dwidi gongsii ahnyiihang go tiimaga aile. 28Tei takumpii Lot mah tinglang kak kitei, ahnyiinii chiile, sakle, ahnyiinii lyiile, ahnyiinii joile, sateichii tiimakhiile. 29Nlenii Lotnii Sodom kito tat kapatpiinei leimik sating gamto mipii sateichii tingtang katii- pii tingryii takumpii ryii m-mangpyii siinii kalei kagago tiimaga aile. 30Meinah Sapfii Mpougo kamangou piinei leimik teitakum tangle.
31“Teipiinei leimik, kangkanii ki kapouryii gam kalei sateichii mpou pot teinii ki kalung kalei tei hum poi matu sulo; sateichii lu kito kalei ah teiniido tei takumpiinii nlaigong matu sulo. 32Lot nou gotei maning gonglo! 33Kata kangkanii mpou karing dounyiisii fii kaleimei teinii teitei maga tangle, nlenii mei kata kangkanii mpou mah karing tei maga ai-lepochiinii karing tei doutangle. 34Inii gonyiigo tam leile, teipiinei tinghum mei hangna zyii- gam zyii tangle, hangniniigo poiwo tangle, sateichii hangniniigo kaibam tangle. 35Sapwimei hangna kaswisii atii toutangle; hangniniigo poiwo tangle, sateichii hangniniigo kaibam tangle. 36Lubam kito mei hangna tha tiisii leitangle: hangniniigo poisii tutangle, hangniniigo masakdek tangle.”
37Teito ahnyiinii mpou dato n-nhiile, “Bangpii kada kipo?” mpou- nii ahnyii dakii tamle, “Katai pum kalei nitei, kalaangdo ndwisii leitangle.”
Atualmente selecionado:
LUK 17: NAG2
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
Maram Naga, KARANU KABI SAMTAM © Bible Society of India, 2007.