JON 1
1
Karing mah samtam
1Karei reisang kito samtam tei leile, samtam tei Saraago kaswisii leile, sateichii samtam tei Saraale. 2Karei reisang kito mpounii Saraago kaswisii leile; 3mahlyii hangtei mpou paikito tiile sateichii tii mpat kabam kito mpou haisupiinii mah hangninii kado tii mpat makle. 4Mpou dato karing tei leile, sateichii karing tei meinah mah kava teile. 5Kava teinii kamyii kito vasii leile, sateichii kamyii teinii teigotei ngam womakle.
6Mpoumah sampao kapung sapfii mpou Jon go Saraanii lang magongle. 7Mpounii teimah kava mah kaang kito sakchyii pyiitang karam jangpii, kalei kaga hangnii mpou paikito malum matutang karam jangpii, mpounii sakchyii pungtang karam jangpii gongle. 8Mpounii kava tei makle, nlenii kava gotei sakchyii tiitang karam jangpii gongle. 9Meihang go tii-mva kapyii kasang kava tei sazyii pouryii gong leile.
10Mpounii sazyii pouryiito leile sateichii sazyii pouryii tei mpou paikito tii-mpat takle, nlenii sazyii pouryii meinii mpougo timakle. 11Mpounii lungkalei mpou sazyiiki mpounii gongle, nlenii mpou sazyii kito lungkalei mpoumeinii mpougo lukaipyii makle. 12Nlenii mpougo lukakaimei hang go, mpou zei kito malum kalumei hang go, Saraamah nahmei tiimatu tang karam mah teimaham tei mpounii pyiitakle; 13ahnyii teinii zai mah kito, mak-kii pumzai mah kito mak-kii meinah mah kamaning kamazhii kito manaamakle, nlenii Saraa datole.
14Samtam teinii pumzai ndat totakle, sateichii jumage kapyii ninado kasang teipii tokryiisii nyiikak kito lungle, Pfii mah nah sapfiimei hangniniisang hangninii roinii tiisii kalei pumtei kava takumpii nyiinii mpoumah pumtei kava tei ngoutakle.
15Jon-nii mpoumah kaang kito sakchyii tiisii saasii tamle, “Inii tam kabam ‘Ah tei aile, gutaito gongkalei mei Mpou teinii gusung dibuile; dapokii mpounii gudoi reile.’ ”
16Sateichii mpoumah katokryii kito jumage kapyii phyiiryiito jumage kapyii teido nyiihangnii doutakle. 17Kadapokii ajaitingshang tei Moses paito pyiitakle; nlenii jumage kapyii ninado kasang tei Jisu Krista paito gongle. 18Saraago mei kaniido ngousang ngoumakle, Saraago njoisii kalei, Pfii dato kalei, nah sapfii mpou teinii mpougo mati mangou pyiile.
Jon dwi mpum kapyiipii mah samtam
(Met 3.1-12; Mrk 1.1-8; Luk 3.1-18)
19“Nang tapo?” sii n-nhii matu tang karam jangpii Jehudimeinii Jerosalem kito Atingmei sateichii Lebiameigo lang kamagong kak,
20Jon nii khekasu tiimakle, nlenii madupii sateichii matei sagaisii “Inii Krista teimakle” sii mpounii tam mpatle.
21Teito ahnyiinii nhiile, “Teitiile- ponii, nang tapo?”
“Nang Ilaijahpo?” Mpounii kheka- latle,
“I-teimakle.” “Nang lungkakaling- meipo?” sii ahnyiinii n-nhiile. Teito mpounii khekalatle, “I-tei makle.”
22Teijangpii ahnyiinii mpou dakii tamle, nyiigo lang kamagongmei dakii nyiinii khekalat tang karam jangpii, “Nang tapo? Nangnii go-kaang kito kadapeileziipo?”
23Mpounii tamle, Lungkakalingpii Isaiyanii tam kabam takumpii: “Bangpii mah pwidi tiimajyiilo, sii sazyii kamarong kito saa kalei rok hangninii tei I-le!”
24Farasismeinii lang kamagong sampao kapungmei teinii 25teito mpougo nhiile, “Teitiileponii nang Kristado mak, Ilaijahdo mak lungka- kalingmeido makleponii, nang dajangpiinii dwi mpumpyii leipo?”
26Jon-nii ahnyiigo khekalatle, “Inanii dwipii mpumpyiile; gutaito gongkalei gonyiinii tikasu Ah tei gonyii kak kito satsii leile; 27Mpoumah pichot ring tei Inii loktoi tang karam Inii kajyii makle.”
28Aihang ai Jon-nii dwi mpum pyiisii kalei, leimik kapatlam mah Jordan karyii Betani kito pat takle.
Saraa mah Jaonah
29Adoipiinei tei Jisunii mpoulam pang gongkalei tei ngouwosii mpounii tamle, “Julo, Saraa mah Jaonah, sazyii pouryiimei mah kem kama hang poitoi kapyii tei! 30Inii tam kalei Mpou tei aile, ‘gusung dikaki mei hangninii gutaito gong leile, nlenii mpounii gusung dikile, dapokii n-gu lung kasunato mpounii leitakle,’ sii Inii tam kalei mpou tei aile. 31Inanii mpougo timakle, nlenii mpougo Isrelmeinah dakii mati ma- ngou tang karam jangpii Inii dwipii mpum pyiisii gongle.”
32Sateichii Jon-nii sakchyii tiisii tamle, “Rangii teinii sating gamto mahou takumpii hum kapyii tei Inii ngoutakle sateichii teiteinii mpou phyiiryiito bampyiile. 33Iniido mpougo timakle, nlenii dwi kito mpum pyiilosii n-gu lang kamagong mpounii n-gu tamle, rangiinii hum kapyii sateichii bam kapyii nangnii kangou mpou ai rangii kamateipii mpum pyiisii kalei mpou teile. 34Inii ngoutakle ninado Saraa nah sapfii mpou teilesii Inii sakchyii pyii takle.”
Jisumah boumei kareimei
35Adoi piinei leimik tei nlailoisii Jon nii mpou boumei hangnago kaswisii satle; 36Teito Jisunii tat kalei tei jusii mpounii tamle, “Julo, Saraa mah Jaonah tei!”
37Mpou-boumei hangna teinii mpounii tam kalei tei shiiwosek-kii, Jisu-tai swi wotakle. 38Teito Jisunii nryiigongsii, ahnyiinii taiswi kalei tei ngou wosek-kii ahnyii dakii tamle, “Gonyiinii dapei fiileipo?” Teito ahnyiinii mpou dakii tamle, “Rabbi” (katunii Madhiikapyiipii) “Nang daki lungleipo?”
39Mpounii ahnyii dakii tamle, “Patlo ninado julo.” Ahnyiinii patsii mpounii kalungni tei ngoutakle; sateichii ahnyiinii teipiinei leimik tei mpougo kaswisii bam takle, daponii tei tinglang tei pung keariikii ki kak kiile.
40Jon-nii katam tei shii wosii, mpoutai swikatu hangna kak kito hangninii tei Saimon Pitar taika- rhiipii Andru teile, 41Mpounii karei kito mpou sung katingpii Saimon go douwosii mpou dakii tamle, “Nyiinii Messaiya (katunii Krista) go doutakle.” 42Mpounii Saimon go Jisu dakii pang gongtakle. Jisunii mpougo jusii tamle, “Nangnii Jon nah sapfii mpou Saimonle, nlenii n-go Kaifas sii lat tangle.” (Kaifas katu ai kadat mpat sekkii Pitar teitiile dapeigo- pokii kuitu kadigole.)
Jisunii Filip nei Nathanel go kalat
43Adoi piinei leimik tei Jisunii Galili ki gongtangle katupii sat totakle, sateichii mpounii Filip go dou wosii, Jisunii mpou dakii tamle, “Gutai swi wolo.” 44Filipnii Andru nei Pitar mah namdi Bethsaida kitole. 45Filipnii Nathanel go ngou wosii mpou dakii tamle, “Mosesnii ajaitingshang kikii ryii kabam Mpou gotei nyiinii dou wotakle teinii Joseph nah sapfii mpou Nazaret ki Jisu teile.”
46Teito Nathanelnii mpou dakii tamle, “Nazaret kito mah kata kabi patto buipo?” Filipnii mpou dakii tamle, “Gongsii julo.”
47Nathanelnii mpouda gong kalei tei Jisunii ngou wosii mpoumah kaang kito tamle, “Julo, kasang Isrelmeinah tei aiki leitakle, mpou dato samah kado tiikama gale!”
48Nathanelnii mpou dakii tamle, “Nangnii n-gu kada takumpiinii tiwopo? Jisunii mpougo khekalatle, Filipnii n-go lat kasunato nangnii kadiitbang kangto kalei tei Inii ngoutakle.”
49Nathanelnii mpougo khekalatle, “Rabbi,” (katunii Madhiikapyiipii) “Nangnii Saraa nah sapfii mpou teile, Nang Isrelmeinah mah Sagongle.” 50Jisunii mpou dakii khekalatle, “Inii n-go kadiitbang kangkii ngoulesii katam jangpii nangnii n-gu malum leipo? Aidoito kisii tha kadi kadi tei nangnii ngoutangle.” 51Sateichii mpounii ahnyii dakii tamle, “Inii go- nyii dakii kasangpii tam leile, katunii sating gam laat kabam sateichii Saraa mah sating gamlui hangnii meinah sapfii mpou phyiiryiito pisii humsii kabam tei gonyiinii ngoutangle.”
Atualmente selecionado:
JON 1: NAG2
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
Maram Naga, KARANU KABI SAMTAM © Bible Society of India, 2007.