IRPHUTNA 15
15
Abrama kuanga Pathian thuthung
1Kha zoiin chu Abrama kuang Pathianin, “Abram chi no ro, kei hi ni pho le lômman hlutak ki ni,” tiin Rengpa thu chu irmang angin an hriata. 2Khan Abrama’n, “O Rengpa Pathian, imo ni ni ipêk hrang, nâi nei loiin ki oma, ki’rchonhai khom hi Damaska khua mi Eliezera’n mo a ilua hrang ni ma?” a tia.
3Khan Abrama’n, “Irngai roh irchi ni pe mak chea: en roh ki ina suak hi kêng ki’rchon lua hrang a ini ta,” a tia. 4“Khan irngai ro, kha mi khan ni’rchon lua thei no ni; nangma rîla ra ngêtin kêng nir chon chu a ilua hrang,” tiin Rengpa thu an hriata. 5#Rom 4.18; Heb 11.12 Khan pên tiang a hruaia, “Irvân khi en ro, ârsihai khi ni tep theiin chu tep ro, a tia. Khanchu Rengpa’n ni’rchihai chu khihai ang khin an la itam hrang a ni,” a tia. 6#Rom 4.3; Gal 3.6; Jak 2.23 Khan Rengpa kha a iam zela; khanchu Rengpa’n a felna sikin mi iamomin a bêa.
7Khan a kuang, “Hi ram lua hranga Kaldaihai khua, Ur ata hruai suaktu Rengpa kha ki ni,” a tia. 8Khan Abrama’n, “O Rengpa itin mo ki ilua hrang ti ki inhriat thei hrang?” a tia. 9Khan ama khan, “Sehrât irla kum thuma le kêlpui kum thum mi le belrachal kum thum mi le vasu le phervalite ni hong chôi pe ta,” a tia. 10Khanchu a hong chôi pea, a laitaka a tuk tanhaia, phalkhatin a’rboptirhai vinga, vatehai chu tuk loiin. 11Irmuhai saruak fâk hrangin an chuma khan, Abrama’n a le’nhnotpaihai ngai.
12 #
Job 4.13-14
Khan khohloi misa tâk tôn chu Abrama chu a inmusu tâka; khan irngai ro, zîng irkhêltak hin a hong zîng dela. 13#Fes 1.1-14; Tîr 7.6 Khan Abrama kuang Pathianin, “Ni’rchihai chu an ram ni loina hmuna chu mikhualin la om an ta, an sin an la itho pehai hrang a ni kha; kum 400 dengthei tuang an ta; 14#Fes 12.40-41; Tîr 7.7 khan an sintho pehai chungthu khom ngaitua ki ti: khanchu sumpuan tamtak neiin suak an ti. 15Nangma chu ni’rchibulhai kuang irtharngam takin fe ni ti, ni sam chuak vinga tarin nang phûm an ti. 16Khan irlo minlinahai khom hin hong an ta; Amor-hai sualna hi a la’rkip no sikin,” a tia.
17Khan, hiang hi a nia, misa a tâka rammual a hon thimin chu, irngai ro, meikhu senduk irzâmin kôlirtêk angin meichok luai luai inlôi a oma; 18#Tîr 7.5 kha nî tena chu Rengpa’n, “Hi ram hi, Aigupta Tui ata Tuipuilian (Eufrates) tui dênin ni’rchihai ki pêk ta, 19Ken-hai, Keniz-hai, Kadmonhai, 20Hit-hai, Periz-hai, Refaim-hai, 21Amor-hai, Kanaan-hai, Girgas-hai le Jebus-hai khom ki pêk sa,” tiin Abrama kuanga thu a thung tâka.
Atualmente selecionado:
IRPHUTNA 15: HRACLBSI
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.