MATTHEW 4
4
Jisu ni naigrik
(Mk. 1.12,13; Lk. 4.1-13)
1Boni yaohon ha Jisu khe Soithan ni naigrik ha hajengling ha bese langjao hi dong ba. 2Odehe, basain jang bisagin bohor jang bisagin jiya-lingya bani yaohon ha bo hukhri jao kha. 3Boha Soithan boni ha phai hi thi ba, Ning Madai ni basa ning thikhade, ebo longthai buthu khe hon jamane hukhum ri lah.
4Thikhabo, Jisu thiphin ba, Subung de hon jang mang mang de thangya, Madai ni khuh ha khrip grao baigoyaba jang se thang ba, thi hi reb du.
5Boni yaohon ha bokhe nolei gathar ha lang hi Madaikhoh ni nohkhu ha song rihi, boni ha thi ba, 6Ning Madai ni basa ning thikhade, ora ni phrang galai lah.
Nini balam ha deglarao khe bo hukhum ri nang
Ode bonsi ni yao jang ning khe bamkhu nang,
Ode niyakha de, nini igah bumai nang ma se, thi hi Madai ni laisi ha reb du.
7Jisu bokhe thiphin ba, Gabra, nini Madai khe da nainai, thi hi bo reb du.
8Odehe, Soithan hading judao thaoyaba ha bokhe langphin hi, habsao ni khrip muima khe phnu hahi thi ba, 9Ning yasgu thu hi ang khe khlim khade ebo khrip khe ninthane ang rithar nang.
10Boha Jisu thiphin ba, Soithan, thang lah, Gabra, nini Madai khe khlim hi bokhe se ning mani lah.
11Odehe, Soithan haiger lang kha, ar deglarao phai hi bokhe naiso-nuso kha.
Galili raji ha Jisu khusi dangjen ba
(Mk. 1.14,15; Lk. 4.14,15)
12Odehe, Johan remjao kha thi hi Jisu khna ba jang Galili raji ha bo thangla ba. 13Odehe, Nazareth khe dangkhlai hi Kapernaum dihkharnai dergong ha Zebulun jang Napthali haphai ha bo donghi ba. 14Gorasali Isai grao thiyaba phura gibi jathar mani khlai hi olei japhai ba,
15Zebulun ar Napthali ni raji,
Dihkharnai ni lama ha, Jordan dikhong nar,
Jentailrao ni Galili!
16Andar ha kham hi dongyarao
Gabang jnama khe nu nang.
17Bo bubli ni phrang se Jisu grao baipha langhi thi ba, Khah phin lah, sorgo raji sampha kha, thi hi bo grao thijen ba.
Jisu nah remyarao bri khe long ba
(Mk. 1.16-20; Lk. 5.1-11)
18Galili dihkharnai dergong ha bo daopha lang baha, boha Simon (Peter thiyaba) ode boni buphlung Andri, bonsi khaphlung gini khe jeh saiba nu ba; bonsi nah remyaba ning. 19Jisu bonsi niha thi ba, Ani yaohon ha phai lah, ang nisi khe subung remyaba slam nang. 20Boha ning bonsi jeh dangkhlai langhi boni yaohon rikpha langla kha.
21Oraha ni phrang thangba ha gibin daphlung gini Zebedai-ni basa Jakob jang boni buphlung Johan khe bonsi ni bupha Zebedai ni rung ha bonsi ni jeh buthu khe slamba nuhi bonsi khe Jisu long ba. 22Boha ning, bupha jang rung khe dangkhlai langhi bonsi boni yaohon rikpha langla kha.
Jisu limyarao-sayarao khe ham riba
(Lk. 6.17-19)
23Odehe, Jisu bikhoh ni noh buthu ha sling rihi, Raji ni graojma hamba khe sainthi ba, ode subung buthu ni bising ha jadi jadi jathai ar jadi jadi raoyayaba khrip khe ham ri hi, Galili raji ni khrip ha bo thangpha lang ba. 24Odehe, Suria raji khrip ha boni graojma gublung thar ba. Odebani, khrip subung limyaba ar jadi jadi sathai sayarao, sgainjik gajaoyarao, murkhi jayarao, adur jayarao khe boni ha labu ba, ode, bonsi khe bo ham rithar ba. 25Galili raji ni phrang, Dekapoli nogor ni phrang, Jerusalem ni phrang, Judai raji ni phrang, ode Jordan nar ni phrang subung buthu gabang yaohon rikpha ba.
Atualmente selecionado:
MATTHEW 4: DIMASBSI
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
Dimasa N.T. with PSA amp PRO (BSI)
© The Bible Society of India, 2006.
Used by permission. All rights reserved worldwide.