Matiu 27

E Iesu i lu menai tere Pailat

(Mak 15:1, Luk 23:1-2, Jon 18:28-32)

1Ba tara bongbong koru ba u pris pan na pal kapan hoboto has turu Jiu e hagum hoboto siler tegi koru pakö menaien e Iesu. 2Ba nori e kitse rien a tsien me la menarien tere Pailat a gamman.

E Judas e mate hakapa

(Aposol 1:18-19)

3E Judas nonei a katuun te hala menai e Iesu turu katuun ti paköeien, nonei e tara marei ti hopö kap hamanasa menaien e Iesu tega mate uen. Ba nonei e palisena u hakhakats i tanen me lu pouts mena nei u topisa u maloto a moni silva turu pris pan na tara pal kapan turu Jiu. 4Ba nonei e poeiena, “Alia u kato a markato a omi koru ti hala menai lia a katuun tema kato homiei ta töa taka, ba nonei tena mate nou!” Ba nori e poeier, “Ema ka uanei i tamulam. A ka i tamölö pepeisa.” 5Be Judas e lapo ba nena a moni tara Luman Lotu Pan me lana, ba nonei ena hakutena.

6Ba u pris pan e luer a moni me poeier, “A moni teka a hihol te kato hamate meri a katuun. A Lo i tarara e hapiou nena a mar moni teka egima hakeia tara kolo tara Luman Lotu Pan.” 7Ba nori e hagumur me kitser u ranga, ba nori ena holeri a moni teka a makumun tsiktsiki ti kukuiei a tabeli, tegi kaho raia u katunura tara a man han i lehana. 8Nonei te ngö sila beri a makum teka, “U Tsiktsikina turu Rahatsing” tara man pöata i romana.

9-10Na u raranga tere propet Jeremaia na i manasa e butu hamana talana, “Nori i lui u topisa u maloto a moni silva, a hihol ti haka bei u Jiu a katuun teka, ba nori ena hole rien a makum te kukuie ria a tabeli, temar ranga mei lia a Tsunono.”

E Iesu e kaia turu kout tere Pailat a gamman

(Mak 15:2-5, Luk 23:3-5, Jon 18:33-38)

11Be Iesu e tuolna i matana e Pailat a gamman be Pailat e rangate nen, “Alö a King turu Jiu?” Be Iesu e ranga palisinen, “Alö peisa has te ranga namen.” 12Kaba nonei ema ranga palisei u ranga ti kout meien u pris pan na pal kapan. 13Be Pailat e poeiena i tanen, “Alö be hengo hasem u mamana u raranga te kout meri lö u katuun teka?” 14Kaba e Iesu ema ranga palis töa ii, be gamman e asingoto koruna.

E Pailat e rangein e Iesu ga mate

(Mak 15:6-15, Luk 23:13-25, Jon 18:39–19:6)

15Turu mamanu hiningal tara pöata tara kannouna turu Paska, e Pailat e roron hapuresen a man töa man karabus, na u katuun peisa has ti ron poei a solora u katuun ti hapureser. 16Na tara pöata teka a töa katuun a omi koru e kaia tara karabus ti atei sil u katuun, a solonen e Barabas. 17Ba tara pöata ti gonogonoia u katuun, be Pailat e rangata ranen, “Alimiou e ngilemiou esi tegi hapureseia tara karabus, e Barabas tsi e Iesu te ngöeri e Kristo?” 18Nonei e atei sil a saha ka tina hala sileien e Iesu i tanen, taraha nori i hiomi.

19Tara pöata te gum noaia e Pailat turu kout, ba tahol i tanen e hale neien u raranga me poeiena, “Alö goma katoei ta ka tara katuun teka. Alia e tare gulen turu sinasoho i tar i bong, balia e toku korugu. Taraha nonei e möa ta töa taka ta omi i tanen.”

20Ba u pris pan na pal kapan turu Jiu e hatagala korueier u hakats turu katuun me kitser u ranga tegi rangata menai e Pailat bate hapuresener e Barabas tara karabus bate hala menari e Iesu tara tou mate. 21Be gamman e rangata lel ranen, “Esi tara huol a katuun teka te ngile milimiou tegi hapuresi?” Ba nori i poeier, “E Barabas!”

22Be Pailat e rangata ranen me poeiena, “Ga saha ka te katoe gou lia tere Iesu te ngöeri e Kristo?” Ba nori hoboto e poeier, “Nila namia tara kuruse!” 23Be Pailat e poeiena, “E ha koruna? A saha ka omi te katoeien?” Ba nori e ku sei bala tuun len meier, “Nila namia tara kuruse!”

24E Pailat e atei sili nonei ema antunan kato len nai taka, na u katuun i tanian hiagetageta hamanasa. Ba nonei e luena u ramun me galusena a limanen i matar u katuun hoboto, me poeiena, “Alia u möa ta ka ta omi tego ha atung hamate sil mei lia a katuun teka! A ka peisa i tamilimiou.” 25Ba u katuun hoboto e hatanganar me poeier, “A nihahuna tara tou mate i tanen e tatei la uana i tamulam na tara galapien i tamulam!”

26Be Pailat e purese bera neien e Barabas tara karabus. Ba nonei e halahus nena e Iesu me hala mena neien i taren tegina nila menaien tara kuruse.

U soldia i hahakosia tere Iesu

(Mak 15:16-20, Jon 19:2-3)

27Bu soldia tere Pailat e lu menari e Iesu tara luma tere gamman, ba u soldia hoboto emi gono hahise ren. 28Ba nori e hiser u hasobö i tanen me haseie rien u hasobö u rörö u ngahangaha te tara herei u hasobö tara king. 29Ba nori e hil haperperere ier a kolits a hihitoka me hasoge ren i bakuna e Iesu, ba nori e hapile rien a tsi ruei tara pal matou i tanen. Ba nori e hatukun ria i matanen me hahakosir me poeier, “Solosei iam a King turu Jiu!” 30Ba nori e kahuse ren, me luer a tsi ruei i tanen me obi narien i bakunen. 31Pöata ti hahakos hakapaien tere Iesu, ba nori e his ba narien u hasobö u rörö ba nori e hasogo poutse rien u hasobö i tanen, me lakasa meren tegina nila menaien tara kuruse.

E Iesu i nila naia tara kuruse

(Mak 15:21-32, Luk 23:26-43, Jon 19:17-27)

32Tara pöata ti laien, ba nori e sabeier a töa tsonuna i Sairini, a solonen e Saimon. Ba nori e hatöe rien a kuruse tere Iesu. 33Ba nori e la uer tara makum te ngöeri i Golgota, te poeiena “A Makum turu Lakö.” 34Tara makum teka ti katsin haueien e Iesu u uain ti sohaleien u meresin u mal koru. Ba nonei e ua torohane nen, me raman ua nanen.

35Ba nori e nila narien tara kuruse, me satu siler a man hasobö i tanen. 36Ba nori e gumur me pepeito kap naren. 37Ba nori e hopö naria u raranga ti kout meien e Iesu i bakuna a kuruse te poeiena: Nonei e Iesu teka, a King turu Jiu. 38Ba nori e nila has naria a huol a katuun a kopkop tara man kuruse i rehina e Iesu, a töa tara pal matou na tai tara pal keruka.

39-40Bu katuun ti hula laia i matanen e ranga hangisei ria tere Iesu me tsibtsibil ner a bakuren me poeier, “Alö a katuun te tatei rureiem a Luman Lotu Pan bate kui poutse men turu topisa u lan, taguhi a peisa mölö! Tego Pien Tson uu lö tere Sunahan, bara, koul talama tara kuruse!”

41-42Ba u pris pan na u tson ateira tara Lo na pal kapan e markato has uar iesana ti ranga hangisei uen bate poeier, “Nonei e taguhu hanigeir a palair u katuun, gehana ba nonei tema antunan taguhu poutsenei a peisanen? Nonei a Kingina i Israel, Ga nonei ega koul ba tala nema a kuruse bara te hamane ren! 43Nonei e hamanana tere Sunahan ba nonei te poeiena nonei a Pien tson tere Sunahan. Bora, ge Sunahan ega ngil taleien bate taguhe nen!” 44Bu katuun u kopkop ti nila gono meien e mar ranga hangisei has uar ti ranga uu a palaier u katuun.

E Iesu e mate hakapa

(Mak 15:33-41, Luk 23:44-49, Jon 19:28-30)

45Ba tara gusuna söasa bu kuhil e kopo kap nena a han hoboto, me antunan töana tara topisa a aua. 46Ba tara 3 kilok be Iesu e ku hapanina me poeiena, “Eli, Eli, lama sabaktani?” E poeiena, “O Sunahan i tar, Sunahan i tar, alö e laba sile mulei lia aha?” 47Ba palair u katuun ti tuol ia i susuku e hengor me poeier, “A katuun teka e ngöeiena e Elaitsa!” 48Ba töa i taren e pita boroborona, mena hapötöe nei u spants u uain u melil, me hakei nen i runguna a tsi ruei, me hasoa nanen tere Iesu tego ua menaien. 49Ba palai e poeier, “Haka banaiam, bara te tarera tega la uama e Elaitsa batemi taguhe nen!”

50Be Iesu e ku hapan lenina, ba nonei e hala banena u namnamei i tanen be matena. 51Ba u labalaba pan te kuteia i Luman Lotu Pan e takiis katana iasa me la nitöana i puta. Bu tsiktsiki e tagasina, bu hatu e tapose kaakatana. 52Bu kioun mate e takalata hobotor, ba para a katuun tere Sunahan ti mate e taker me töatöa poutsur. 53Ba i murina te takei poutsia e Iesu tara tou mate i tanen, ba nori e labaner u kiou me la uar i Jerusalem, bena butu ria turu katuun u parpara.

54Ba tsunono turu soldia na u soldia i tanen ti pepeito kapiin e Iesu e tarer a mamanaka te butu, na nun has, ba nori e matout korur me poeier, “U mana koru lahas nonei a Pien Tson hamana tere Sunahan!” 55U touhaliou u parpara ti kukutie ma e Iesu i Galili na ti taguhe men i tuol ma i lehana bate taratara kap has rima. 56Na i gusuren e Maria Matalina na e Maria e tsinana ere Jemis mere Josep, ne tsinana a galapien tson tere Sebedi ere Jemis mere Jon.

E Iesu i hongeia tara kiou

(Mak 15:42-47, Luk 23:50-56, Jon 19:38-42)

57Tara pöata te lahi ia a ka, ba töa katuun te kamei a moni a parpara koru e la nama, a solonen e Josep. Nonei a katununa i Arimatia, na nonei has a töa katunun tsitsilo tere Iesu. 58Ba nonei e la uana tere Pailat mena rangate neien u tuenrei tere Iesu. Be Pailat e haniga nena tega lu menai e Josep u tuenrei tere Iesu. 59Be Josep e lue nen, me pitse neien u labalaba u hiaka u tsimus na u gogoso nitöa. 60Mena hakeie nen tara kiou hamatskö i tanen te hakaho naien turu lapo. Ba nonei e hategele tupe nei a matana kiou a töa hatu pan me lana. 61E Maria Matalina na taina Maria i gum ia i hapalana a kiou, bate tara uar tara kiou.

U soldia i taratara kapiin a kiou

62Ba turu hamahö, turu Lan u Göagono, ba u pris pan nu Parasi e lar mena gono ria tere Pailat. 63Ba nori e poeier, “O Tsunono, alam e hakats kap nem u raranga te kati e Iesu a katuun a gamogamo tara pöata te töatöa noa ien ba nonei e poeiena, ‘I murina u topisa u lan ba lia te takei pouts gou.’ 64Bora alö go halan tu raranga tegi taratara kap haniga menai a kioun mate e antunana turu hatopisana u lan, taraha u katunun tsitsilo i tanen ena mots larima bate kope ren batena poeier turu katuun, ‘Nonei e takei poutsia tara tou mate.’ Ba u gamo i taren tena karase nou u gamo mam.” 65Be Pailat e poeiena i taren, “Lu raiam u soldia batena taratara kap haniga nitöa ner a kiou.” 66Ba nori e lar, mena harokoto kap ner a hatun pilpili na tara kiou, ba nori e haka rer a palair u soldia tegi taratara kapiin a kiou.

Obecnie wybrane:

Matiu 27: HLA 2020

Podkreślenie

Udostępnij

Kopiuj