Matiu 23

Haneiam u tson ateira tara Lo na u Parasi

(Mak 12:38-39, Luk 11:43,46, Luk 20:45-46)

1-2Be Iesu e poeiena turu katuun u parpara koru na turu katunun tsitsilo i tanen, “U tson ateira tara Lo na u Parasi e ka mer a nitsunono tegi hatarare menaien a man Lo tere Mosis. 3Na limiou go hengoeiam a mamanaka te ranga mera rien limiou. Kaba limiou goma kukutiemi a markato i taren, taraha nori pouts ema kukutieri a man lo te hake rien i tamilimiou. 4Nori e roron hake ria a man lo a man tiama turu katuun, a man lo te kamer a toukui pan. Kaba nori ema antunan kukutieri ta töa ta pal lo tara man lo teka.

5“A mamanaka te roron katoe ren e kato silerien tegi tara meraien u katuun. Hena, nori e roron hakits naria a matsi bokis i poleren na i limaren te kamena u raranga tere Sunahan iahanen. Na nori e kato hanigan töa ner a man runguna a man hasobö a man ngahangaha i taren bate tataabala koruna. 6Na nori e ron ngilin gum ria turu gumgum tara pal kapan tara pöata tara kannou, na e ron ngilin gum koru has ria turu gumgum u niga koru na i luman lotu. 7Nori e roron ngiler u katuun egi hapan raien tara makumun töana, na nori e ngil haser u katuun egi ngö raien u Rabai.

8“Kaba u katuun ema tatei ngö raroui limiou u Rabai (te poeiena a Tson Hihatuts) taraha alimiou e ka memiou a töa puku a Tson Hihatuts, nonei a Tsunono, na limiou u munmun toulana. 9Ba limiou tema tatei ngöemi ta töa ta katununa i puta e Tamamilimiou, taraha alimiou e ka memiou a töa puku a Tamamilimiou, te kana i Kolö. 10Na u katuun ema tatei ngö has rari limiou u Hihatutus, taraha alimiou e ka memiou a töa puku a Hihatutus, e Mesaia. 11A katuun te pan bala ranou limiou e tatein na katunun kui uanou i tamilimiou. 12A katuun te solo sei peiseiena a peisanen, a solonen ena hala puteier romana. Kaba katuun te haka pute iena a peisanen, nonei ena luena romana a solo pan.”

A man markato a man omi turu tson ateira tara Lo na u Parasi

(Mak 12:40, Luk 11:39-42,44,52, Luk 20:47)

13E Iesu e ranga lel me poeiena, “Alimiou u tson ateira tara Lo na limiou u Parasi, a nomi pan e butu noa i tamilimiou! Alimiou u gamogamo, na limiou te ron hatu kap ramiou u katuun tegi tasu uen tara Nipepeito tere Sunahan, na limiou pouts has ema antunan tasumi. 14Alimiou e roron katoemiou u singona turu lotu u ngahangaha turu rung tuun, bate lu tsipon bemi a peisa milimiou a manka turu amoaba. Te markato uamilimiou teka alimiou e luemou a nihahuna a omi koru.

15“Alimiou u tson ateira tara lo na u Parasi, alimiou u gamogamo! Alimiou e roron la koru uamiou turu tsiktsikina i lehana na i tasi, tego kato menami ta töa ta katuun, a katunun tsitsilo i tamilimiou. Kaba pöata te lu sabe tsipone mia limiou a töa, ba limiou te kato tsipone mien a katuun a omi koru tena hahune ria romana i hel. Na limiou e katoe men ba nonei te omi bala koru len ranou limiou.

16“A nomi pan e butu noa i tamilimiou, alimiou u matakiou te haröto tsipon nemiou a maroro turu katuun bate poeiemiou, ‘Tega hamanaia ta katuun tara Luman Lotu Pan bate poeiena e manana iasa, a ka pinopino. Kaba tega hamanaia ta katuun tara goul tara Luman Lotu Pan bate poeiena e manana iasa, aa, nonei e tatei markato koru has uana temar ranga uanen.’ 17Alimiou u katuun u matakiou u tutu! Saha ka te panina, a goul, tsi a Luman Lotu Pan te hagöagonena a goul? 18Na limiou e poe hasemiou, ‘Tega hamanaia ta katuun tara makumun haats, a ka pinopino. Kaba tega hamanaia ta katuun tara manka te kana tara makumun haats, aa, nonei ega markato koru has uu temar ranga uanen.’ 19Alimiou u katuun u matakiou! Aha te panina, a manka te kana tara makumun haats? E möa. A makumun haats te hagöagonena a manka te kana i tanen, nonei te panina. 20A katuun te hamanana tara makumun haats e hamana hasna tara manka te kana i tanen. 21Na katuun te hamanana tara Luman Lotu Pan e hamana hasna tere Sunahan te kana i tanen. 22Na katuun te hamanana i Kolö e hamana has uana tere Sunahan na turu gumgum u göagono te gum nen.

23“Alimiou u tson ateira tara Lo na limiou u Parasi, a niomi pan e butuna romana i tamilimiou! Alimiou u gamogamo! A mamana matsi kaan hasoksoka a matsi tetenei te kana tara kui, alimiou e roron patsike men ba limiou te halemi e Sunahan a man hamalotona a man makum. Na markato te hala menari a hamalotona makum tere Sunahan e nigana. Kaba limiou e totone miou a mar hihatuts a kapan tara Lo te markato uana teka: a markato te hamou hamatskö menari u raranga turu katuun, na markato te taatagi mera nei e Sunahan u katuun, na markato a mana. 24Alimiou u matakiou te ngilin haröto tsipon rami u katuun a maroro. Alimiou e roron hakats hapara nemiou a man markato pinopino, kaba limiou ema kato tsiponemi a markato a niga te panna i matana e Sunahan.

25“Alimiou u tson ateira tara Lo na u Parasi, a niomi pan e butunoa i tamilimiou, u katuun u gamogamo! Alimiou e roron kato hagogosemiou a murina a kap na pelete, kaba iahanen e korkorianana, te kato has uana a torimilimiou te habutena a markato tara kop na te hagua be menami limiou u ngilngilina turu tuenrei. 26Alimiou u Parasi u matakiou! Alimiou go kato hagogoso mam meiam a torimilimiou, ba markato i tamilimiou te niga has noa i biou.

27“A niomi pan e butunoa i tamilimiou u tson ateira tara lo na u Parasi, u gamogamo! Taraha alimiou e heremi u kioun mate te tara ha hiaka hanigan töana ielesala, kaba i iogana e saputena u tsinön mate na mamanaka a koreme. 28Nonei noahas tara markato teka. Ba u katuun te tarer a peisa milimiou bate poeier alimiou u katuun u matskö. Kaba i iogana i tamilimiou e saputu mena a markato turu gamo na mamana markato a omi.”

E Iesu e rangein u tson hihatuts e luer romana a nihahuna

(Luk 11:47-51)

29Be Iesu e ranga lenina me poeiena, “A niomi pan e butunoa i tamilimiou u tson ateira tara Lo na u Parasi, alimiou u katuun u gamogamo! Alimiou e roron kuiemiou u kahokaho u niga turu propet ti mate bate hake miou a manka a man tara hanigan töa turu kahokaho turu katuun u matskö. 30Ba limiou te poeiemiou, ‘Sanena ara ti kaia tara pöata turu tuburara i manasa, ara sane ma taguhu rari ien tegi atung hamate meraien u propet.’ 31Ba turu raranga i tamilimiou, alimiou e hatara marei nemiou te hatutubunei uami limiou turu katuun ti atung hamatir u propet i manasa! 32Na limiou e markato has uamiou ti markato uaien, bate hahonoto tale miou a man markato a man omi i taren.

33“Alimiou u katunur tara kökötsi a omi na u gamogamo! E möa koru tego antunan bus ba mena milimiou romana a nihahuna i hel. 34Tara markato teka alia e hala ragou limiou u propet na u katuun u atei na u tson ateira tara lo. Ba limiou tena atung hamate ramiou a palai bate tapala ramien tara kuruse bate kato hamate ramen, ba limiou te lahus ramia a palai turu luman lotu i tamilimiou bate kute meramien tara mamana man taun. 35Ba limiou te alate miou romana u katuun u matskö ti atung hamatir i manasa, e taniaia tere Ebol bate lana tere Sakaria a pien tere Berekaia ti atung hamateia u tubumilimiou i gusuna Luman Lotu Pan na makumun haats. 36Alia e ranga hamana koru mera goulimiou, a nihahuna tara man markato teka e lue mou limiou u katunura i romana!”

E Iesu e taatagini a han i Jerusalem

(Luk 13:34-35)

37Be Iesu e poeiena, “A tei Jerusalem, atei Jerusalem, alimiou e roron atung hamate ramiou u propet bate titi hatu ramiou u katuun te hala mera mei e Sunahan i tamilimiou! A pöata a para alia i ngilin gono mera mei limiou i tar bate hatongo kap ragou limiou, temar gono mena nei a keriou u tuna i kopina pakapakanen. Kaba limiou ema ngil mi! 38Tara, man luma i tamilimiou e kaka puku koruna. 39Alia e ranga mera goulimiou, alimiou ema tatei tara lele moi lia e antunana te pei moa limiou, ‘E Sunahan ega kalali a katuun te la nama tara solona a Tsunono.’”

Obecnie wybrane:

Matiu 23: HLA 2020

Podkreślenie

Udostępnij

Kopiuj