Maˍkuˆ 3
3
Laˍ puˍ htiˍ pakˍ siˉ jiˉ mangˉ na taeng pyo biˍ jiˍ
1Yuˉdaˆ changˉ ceuˉ hpawm lang kyaˉ hkaoˉ veu Yeˍsuˆ awngˉ lae laeˍ beu changˉ laˍ puˍ htiˍ pakˍ siˉ biˍ jiˍ uiˉ htiˍ hu ca jiˉ. 2Changˉ htiˍ baˍ uiˍ aˍ Yeˍsuˆ changˉ daˉ mangˉ na Yuˉdaˆ changˉ ceuˉ beu vanˍ sin nuing veu hpa yat taeng pyo biˍ naeˍ jiˉ laˍ. Baˍ taeng pyo biˍ jiˍ la nae ang si na saˉ siˉ yao hawˍ hu jiˉ. 3Yeˍsuˆ changˉ laˍ puˍ htiˍ pakˍ siˉ jiˉ mangˉ na hta laˉ yao, changˉ ang muˉ tawngˍ naˍ veu cung laˉ bao nae ha biˍ jiˍ. 4Yeˍsuˆ Hpaˍriˆsaeˉ uiˉ na naˉ jiˉ, vanˍ sin nuing veu kanˉ ang maenˍ vaˍ naeˍ uiˉ aˉ hkvangˍ piˍ ceuˉ laˍ. Kanˉ ang haiˉ vaˍ naeˍ uiˉ aˉ hkvangˍ piˍ ceuˉ laˍ. A sak na saeˍ ceuˉ laˍ. A sak na piˉ caeˉ ceuˉ laˍ nae changˉ uiˉ na naˉ yao, caˇ, Hpaˍriˆsaeˉ uiˉ muiˉ kyapˆ nae ca jiˉ. 5Yeˍsuˆ nuing ba yinˍ yao, Hpaˍriˆsaeˉ uiˉ na hu jiˉ. Yawng nuing ba kaenˍ naeˍ hka naeˉ hingˉ na nuing ba baˍ mawnˍ baˍ pyawˍ nae hpeuˍ jiˍ. Haeˉ mae beu, changˉ daˉ mangˉ na, Nang laˍ puˍ hingˍ kang ngangˉ voˍ, nae ha biˍ yao, yang laˍ puˍ hingˍ kang ngangˉ yao, yang laˍ puˍ yangˍ pyo laˉ laeˍ yao, ang anˉ lawˉ hpeuˍ laˉ laeˍ jiˍ. 6Haeˉ mae beu, htiˍ chitˍ nae Hpaˍriˆsaeˉ uiˉ awkˍ taw aeˉ yao, Yeˍsuˆ na aˉ mae yaˍ saeˍ jeuˇ nae Heˍrot changˉ htiˍ baˍ uiˍ kawngˉ kanˉ sing laeˍ lang jiˉ.
Gaˍliˉlaeˉ lang awng htang veu changˉ ang byaˍ chawnˉ ngangˉ lui jiˉ
7Yeˍsuˆ nae yang ta peˍ uiˍ Gaˍliˉlaeˉ lang awng htang kaˉ seu lae laeˍ beu, Gaˍliˉlaeˉ ang meungˉ hkaoˉ veu ca naeˉ changˉ ang muˉ uiˉ muiˉ yang nawngˍ veu hkeˍ laeˍ jiˍ. 8Yeˍsuˆ kanˉ vaˍ jiˍ hkaˉ hko laˉ hko uiˉ na changˉ uiˉ yaˍ kyaˍ beu, Yuˉdaˆ ang meungˉ, Yeˍruˆsaˍlaemˍ vengˍ, Iˉduˉmaeˉ ang meungˉ, Yawˍtanˍ langˍ ba hingˉ pakˍ kyaˍ htang veu duingˉ naeˉ changˉ uiˉ, Tuˆloˆ vengˍ, Siˉdongˍ vengˍ veu duingˉ naeˉ changˉ uiˉ ang byaˍ uiˍ muiˉ yang kawngˉ chawnˉ hko lui lang jiˉ. 9Changˉ ang byaˍ uiˍ Yeˍsuˆ na baˍ naengˍ yang nae uiˉ saˍ laiˍ, Yeˍsuˆ maˇ yang ta peˍ uiˍ na, Heuˍ htiˍ mangˍ haenˍ htaˍ vo, nae ha biˍ jiˍ. 10Aˉ mae yao nae baoˇ Yeˍsuˆ nawˍ changˉ daˉ hpa yat ang ca uiˉ na ang byaˍ hu taeng pyo biˍ jiˍ. Hingˉ pa nae changˉ daˉ uiˉ Yeˍsuˆ ang to na vaˍ siˍ yao yatˍ naengˍ lang jiˉ. 11Deˍ yaˍ ang haiˉ uiˉ muiˉ Yeˍsuˆ na aˉ lawˍ beun myangˉ yao muiˉ, deˍ yaˍ ang haiˉ awngˉ ngangˉ biˍ jiˍ changˉ uiˉ yang tawngˍ naˍ veu bawk kumˉ ngangˉ yao, Naˇ Hpaˍ caoˍ beu Ang yaˍ mangˍ ngaˇ nae haoˉ jiˉ. 12Yaˇ aˍ sangˍ jeuˇ nae hao na baˍ piˍ bae siˉ nae, Yeˍsuˆ deˍ yaˍ uiˍ na ang tangˍ haengˍ nae aˉ mingˍ piˍ jiˍ.
Naiˍ htangˍ htiˍ cheˍ nyiˍ hu na cheˉ yuˉ jiˉ
13Hingˉ nawngˍ veu Yeˍsuˆ miˉ kuingˍ veu lae yao, yang cheˉ yuˉ jiˉ uiˉ na haoˉ yao, yawng muiˉ Yeˍsuˆ kawngˉ lae jiˉ. 14Yeˍsuˆ changˉ htiˍ cheˍ nyiˍ hu uiˉ na cheˉ yuˉ peunˉ yao, yawng na naiˍ htangˍ nae ang maengˉ piˍ yao, yawng Yeˍsuˆ kawngˉ ca yao, haeˉ mae baoˉ naeˍ yaˇ mawnˍ pyawˉ naeˉ uiˉ ang buinˉ tangˍ na maˍ taw naeˉ uiˉ saˍ laiˍ Yeˍsuˆ yawng na caiˍ yao kaˍ naeˍ. 15Deˍ yaˍ ang haiˉ uiˉ na kaˍ taw naeˉ uiˉ saˍ laiˍ nae aˉ yaˍ piˉ ca jiˉ. 16Cheˉ yuˉ jiˉ changˉ htiˍ cheˍ nyiˍ hu uiˉ beu ang maengˉ yangˍ maˇ, Peˍtaˍruˆ nae maengˉ jiˉ Siˉmunˍ, 17Miˍ ciˍ guingˍ naeˍ ang yaˍ nae a tekˆ paeˍ ya jiˉ Bawˉneˍraˍgaetˆ ang maengˉ piˍ jiˍ Zeˍbeˍdaeˉ beu ang yaˍ Yaˍkok nae Yaˍkok beu ang hpaeˉ Yoˉhanˍ, 18Anˍdeˍreˍ, Hpiˆliˆpuˆ, Baˍhtawˉlaˍmaeˉ, Maˍhtaeˍ, Htoˉmaˆ, Aˍlaˍhpaeˉ beu ang yaˍ Yaˍkok, Htaˍdaeˇ, changˉ ceuˉ na hak naeˉ mangˉ Siˉmunˍ nae 19Yeˍsuˆ na kawngˍ yaˍ jiˉ Yuˉdaˆ Iˉsaˍkaˍroˆ yawng yaˇ.
Ang suingˉ Yeˍsuˆ nae Beˍlaˍzeˍbuˆlaˆ
20Hingˉ nawngˍ veu, Yeˍsuˆ nae yang ta peˍ uiˍ yumˉ veu chawnˉ ngangˉ laeˍ lang beu, changˉ ang muˉ ang byaˍ uiˍ muiˉ htiˍ cangˍ chawnˉ langˉ laeˍ lang yao, hingˉ pa nae, ang caˍ caˍ laeˍ nyamˍ baˍ ca. 21Hingˉ awˍ lawng na Yeˍsuˆ changˉ ceuˉ uiˉ ya bae yao, Yeˍsuˆ mangˉ yaeˍ cangˍ hpeuˍ jaˇ nae saˉ chu lae jiˉ. 22Yeˍruˆsaˍlaemˍ vengˍ veu ca yao lui jiˉ Camˉ lik ang hkiˍ saˍ laˉ uiˉ muiˉ, Changˉ niˉ maˇ deˍ yaˍ Beˍlaˍzeˍbuˆlaˆ mangˉ awngˉ ngangˉ biˍ byaˇ. Deˍ yaˍ ang haiˉ ang huiˍ mangˍ na cuˉ yao, deˍ yaˍ uiˍ na kaˍ taw byaˇ, nae ciˍ jiˍ. 23Yeˍsuˆ yawng na haoˉ yao uˆ paˍ maˍ htiˍ lumˍ hkai yao piˉ kyaˍ jiˍ. Saˍtanˍ nawˍ yangˉ yang nae baˍ kaˍ awkˍ laeˍ taw. 24Ang meungˉ htiˍ meungˍ hingˍ baˍ yaˍ baˍ teungˍ lang nae si lang baoˉ vaˍ, ang meungˉ hingˉ ngaˍ baˍ yiˍ baˍ naenˍ hki. 25Yumˉ htiˍ yumˍ hkaoˍ veu yumˉ changˉ uiˉ baˍ yaˍ baˍ teungˍ lang nae si lang baoˉ vaˍ, yumˉ tuˍ hingˍ nga baˍ yiˍ baˍ naenˍ hki. 26Saˍtanˍ muiˍ yang hkaoˉ veu baˍ yaˍ baˍ teungˍ lang nae si lang baoˉ vaˍ, hingˉ maˇ baˍ mangˍ nae ya kangˍ ya chaw aengˉ naˇ. 27Changˉ kaˍ ang ca mangˉ na kaˉ huˍ veu hpui yao baˍ chiˍ baoˉ vaˍ, aˉ mangˉ muiˉ yang yumˉ hkaoˉ veu lae yao, yumˉ keungˍ ciˍ kawˉ uiˉ na yatˍ lae yao baˍ kaˍ. Changˉ kaˍ ang ca mangˉ na hpui chiˉ baoˉ naeˍ yaˇ yang yumˉ hkaoˉ veu ang keungˍ ang kawˉ uiˉ na yatˍ lae yao kaˍ naeˍ.
Ang hkawˍ laˉ ang seungˍ sangˉ na tiˍ si jiˉ
28Ga nawng na maˉ manˉ nae hkai laˍ siˍ naeˇ, changˉ yaˍ uiˍ beu naˍ hokˍ hkaˉ hko laˉ hko nae Hpaˍ caoˍ na hpaˉ batˆ jiˉ naˍ hokˍ hkaˉ ca naeˉ uiˉ na caeˉ taw naeˉ uiˉ aˉ hkvangˍ na ang ya yaˇ. 29Hta yao muiˉ, Ang hkawˍ laˉ ang seungˍ sangˉ na hpaˉ batˆ naeˉ changˉ uiˉ ngaˍ naˍ hokˍ poiˉ naeˉ na aˉ mae beu muiˉ baˍ ya laeˍ taw laˇ. Aˉ mae yao nae baoˉ vaˍ, tuingˍ co tuingˍ cat naˍ hokˍ ca naeˉ yaˇ. 30Yawng Yeˍsuˆ na deˍ yaˍ awngˉ ngangˉ biˍ jiˍ nae ha biˍ yao, Yeˍsuˆ haeˉ mae tawpˍ jiˍ.
Yeˍsuˆ beu yang muing nae yang hpeˉ uiˉ
31Haeˉ mae beu, Yeˍsuˆ yang muing nae yang hpeˉ yaˉ yetˍ ang ngiˉ veu hkeu lui nae cung yao Yeˍsuˆ na haoˉ lae lao nae changˉ htiˍ hu na tawk yaˍ jiˍ. 32Changˉ ang muˉ ang byaˍ Yeˍsuˆ na duingˉ cawtˍ biˍ yao ca beu, nang muing nae nang hpeˉ yaˉ yetˍ nang na ang nyiˉ veu saˉ langˍ ngaeˉ nae yawng ha biˍ jiˍ. 33Yeˍsuˆ mangˉ ga muing nae ga hpeˉ uiˉ aˍ aˍ sangˍ nae naˉ jiˉ. 34Yeˍsuˆ yang htang veu duingˉ cawtˍ biˍ jiˍ uiˉ na hu yao, nawng ngaˍ ga muing ga hpeˉ uiˉ yaˇ nae ha biˍ jiˍ. 35Hpaˍ caoˍ beu a loˍ veu vaˍ naeˍ uiˉ changˉ ngaˍ ga muing, ga hpeˉ, ga miˍ uiˍ yaˇ nae ha biˍ jiˍ.
Obecnie wybrane:
Maˍkuˆ 3: pyy
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
© 2022, Wycliffe Bible Translators, Inc. All rights reserved.